অসমৰ মুখ্য নিৰ্বাচনী বিষয়া মুকেশ চাহুৱে সোমবাৰে কয় যে যিসকলৰ নাম ভোটাৰ তালিকাত আছে তেওঁলোকে আগন্তুক লোকসভা নিৰ্বাচনত ভোটদান কৰিব পাৰিব। অসমত তিনিটা পৰ্যায়ত অনুষ্ঠিত হ’বলগীয়া নিৰ্বাচনত মুঠ ২,১৭,৬০,৬০৪ গৰাকী ভোটাৰে ভোটদানৰ বাবে সাজু হোৱা বুলিও তেওঁ লগতে জানিবলৈ দিয়ে।
‘’ভোটাৰ তালিকাত যিসকল লোকৰ নাম অন্তৰ্ভুক্ত হৈছে তেওঁলোকে ভোটদান কৰিব পাৰিব,’’-যোৱা বছৰ অসম চৰকাৰে প্ৰকাশ কৰা ৰাষ্ট্ৰীয় নাগৰিক পঞ্জীৰ চূড়ান্ত খচৰাত যিসকলৰ নাম বাদ পৰিছে তেওঁলোকৰ কি হ’ব বুলি সোধা এক প্ৰশ্নৰ উত্তৰত মুখ্য নিৰ্বাচনী বিষয়াগৰাকীয়ে এইদৰে কয়।
অসমৰ এক বৃহৎ সংখ্যক জনসাধাৰণৰ মাজত চূড়ান্ত খচৰাত বাদ পৰা লোকসকলে ভোটদান কৰিব পাৰিবনে নে নাই তাক লৈ এক সন্দেহৰ সৃষ্টি হৈছিল। যোৱা বছৰ প্ৰকাশ পোৱা ৰাষ্ট্ৰীয় নাগৰিক পঞ্জীৰ চূড়ান্ত খচৰাত প্ৰায় ৪০ লাখ লোকৰ নাম বাদ পৰিছিল।
উল্লেখযোগ্য যে ভাৰতৰ নিৰ্বাচন আয়োগে দেওবাৰে সমগ্ৰ দেশৰ লগতে অসমতো লোকসভা নিৰ্বাচনৰ দিন ঘোষণা কৰে। সেই মতে, অসমত ১৪ টা লোকসভা সমষ্টিৰ বাবে অহা ১১, ১৮ আৰু ২৩ এপ্ৰিলত তিনিটা পৰ্যায়ত ভোটগ্ৰহণ অনুষ্ঠিত হ’ব।
চাহুৱে কয় যে অসমত বৰ্তমান ১,০৬,২৭,৮২২ গৰাকী মহিলা ভোটাৰকে ধৰি মুঠ২,১৭,৬০,৬০৪ গৰাকী ভোটাৰ আছে। ‘’এইবাৰ ১৮ৰ পৰা ১৯ বছৰৰ বয়সৰ ভিতৰৰ প্ৰথমবাৰৰ বাবে ভোট দিবলগীয়া ৭,০৬,৪৮৯ গৰাকী ভোটাৰ আছে,’’ বুলি উল্লেখ কৰি লগতে কয় যে প্ৰথমবাৰৰ বাবে ভোটদান কৰিবলগীয়া মহিলাৰ সংখ্যা হৈছে ৩,০১,৭৭৪গৰাকী।
ভোটকেন্দ্ৰ সমূহৰ স্পৰ্শকাতৰ সন্দৰ্ভত সোধা এক প্ৰশ্নৰ উত্তৰত চাহুৱে কয় যে ৰাজ্যখনৰ মুঠ ২৮,১৪৩ টা ভোটগ্ৰহণ কেন্দ্ৰৰ ভিতৰত ৩,৬৬৩ টা অতি স্পৰ্শকাতৰ আৰু ১,৯১৩ টা জটিল ভোটগ্ৰহণ কেন্দ্ৰ হিচাপে চিনাক্ত কৰা হৈছে।
মুখ্য নিৰ্বাচনী বিষয়া চাহুৱে লগতে জানিবলৈ দিয়ে যে অহা ১১ এপ্ৰিলত প্ৰথম পৰ্যায়ত ৭৫,১৬,২৮৪ গৰাকীয়ে আৰু ১৮ তাৰিখৰ দ্বিতীয় পৰ্যায়ত ৬৮,৩৬,৪৯৪গৰাকী ভোটাৰে ভোটদান সাৱ্যস্ত কৰিবলৈ সাজু হোৱাৰ বিপৰীতে ২৩ এপ্ৰিলত তৃতীয় পৰ্যায়ত ৭৪,০৭,৮২৪ গৰাকীয়ে ভোটদান কৰিব।