Elephant dies due to electrocution মহানগৰীৰ গড়চুকৰ সমীপৰ গাৰোঘুলিত যোৱা নিশা বিদ্যুৎস্পৃষ্ট হৈ এটা প্ৰাপ্ত বয়স্ক মখনা হাতীৰ কৰুণ মৃত্যু ঘটে।
প্ৰায় চাৰে ফুট ওখ হাতীটোৰ এইদৰে বিদ্যুতৰ তাঁৰত লাগি মৃত্যু হোৱাৰ ঘটনাই স্বাভাৱিকতে প্ৰকৃতিপ্ৰেমীৰ মাজত প্ৰতিক্ৰিয়াৰ সৃষ্টি হৈছে।
বিদ্যুৎ বিভাগৰ হেমাহিৰ বাবে এইদৰে বন্যপ্ৰাণীৰ অকাল মৃত্যুৰ ঘটনাক বহুতেই সহজভাৱে ল’ব পৰা নাই।
হাতীটোৰ উচ্চতালৈ চাই ক’ব পাৰি যে অসমত ইয়াতকৈয়ো অধিক উচ্চতাৰ প্ৰায় ৯ ফুটলৈকে উচ্চতাৰ হাতী আছে। কিন্তু বিদ্যুৎ বিভাগে বন্যপ্ৰাণী চলাচল কৰা অঞ্চলসমূহত ইমান তলেৰে কেনেকৈ বিদ্যুৎ প্ৰবাহিত তাঁৰ সংযোগ কৰিছে তাক লৈ প্ৰশ্ন উঠিছে।
কামৰূপ (পূব) সংমণ্ডলৰ ডিএফঅ’ ৰোহিনী বল্লভ শইকীয়াই নৰ্থ ইষ্ট নাওৰ আগত জানিবলৈ দি কয় যে বন বিভাগে বিষয়টো গুৰুত্ব সহকাৰে লৈছে।
‘’মই এই বিষয়ত জিলা উপায়ুক্তৰ সৈতে কথা পাতিছো। আমি বিষয়টো গুৰুত্ব সহকাৰে গ্ৰহণ কৰিছো। ইতিমধ্যে এপিডিচিএললৈ পত্ৰও প্ৰেৰণ কৰিছো। মহানগৰীৰ উপকণ্ঠ অঞ্চসমূহত বিদ্যুৎ বিভাগৰ এনে গাফিলতিবোৰ দেখা গৈছে,’’- ডিএফঅ’ শইকীয়াই কয়।
এইদৰে বিদ্যুৎস্পৃষ্ট হৈ পৰা হাতীটোৰ মৃত্যুমুখত বিষয়টো বন বিভাগে চালিজাৰি চাই আছে বুলিও ডিএফঅ’গৰাকীয়েও জানিবলৈ দিয়ে।
বিভিন্ন ৰাজ্যত বিদ্যুৎ বিভাগৰ হেমাহিৰ বাবে বিদ্যুৎস্পৃষ্ট হৈ হাতীৰ মৃত্যুৰ ঘটনাত আদালতে সংশ্লিষ্ট বিদ্যুৎ বিভাগক সকীয়াই দিয়াৰ উদাহৰণ আছে।
যোৱা বছৰ ৰাষ্ট্ৰীয় সেউজ ন্যায়াধীকৰণে (NGT) তামিলনাডুৰ বিদ্যুৎ বিভাগক ৰাজ্যখনত বিদ্যুস্পৃষ্ট হৈ হাতীৰ মৃত্যুৰ ঘটনা বৃদ্ধিৰ বাবে জগৰীয়া কৰি তীব্ৰ সমালোচনা কৰাৰ লগতে নিজাকৈ গোচৰো লৈছিল।
উল্লেখ্য যে দেওবাৰে গোলাঘাটতো এটা প্ৰাপ্ত বয়স্ক হাতীৰ বিদ্যুৎস্পৃষ্ট হৈ মৃত্যু ঘটে।
জানিব পৰা মতে, ধলাগাঁও পথাৰৰত প্ৰায় ১৮ বছৰীয়া হাতীটোৰ মৃতদেহটোৰ ওচৰত এটা ১১কেভি লাইনৰ বিদ্যুতৰ খুটা আছিল আৰু মৃত হাতীটোৰ দেহৰ শৰীৰত পোৰা চিহ্ন দেখা গৈছিল।
ৰাজ্যখনৰ বন্যপ্ৰাণীৰ সুৰক্ষাৰ ক্ষেত্ৰত চৰকাৰে গুৰুত্ব দি বিদ্যুৎ বিভাগৰ গাফিলতিৰ যথোচিত তদন্তৰ দাবী তুলিছে প্ৰকৃতিপ্ৰেমীয়ে।
