অন্ত পৰিল অসম ৰাজ্যিক কেবিনেটৰ বৈঠক। বৈঠকত বহুকাইটা গুৰুত্বপূৰ্ণ সিদ্ধান্ত গ্ৰহণ কৰে কেবিনেটে। বৈঠকৰ অন্তত এক সংবাদমেল যোগে অসমৰ মুখ্যমন্ত্ৰীগৰাকীয়ে কেবিনেটে গ্ৰহণ কৰা সিদ্ধান্তসমূহৰ বিষয়ে সদৰী কৰে।
ৰাজ্যিক কেবিনেটে লোৱা সিদ্ধান্ত অনুসৰি ছেমিকণ্ডাক্টৰ প্ৰকল্প ৰতন টাটাৰ নামেৰে নামকৰণ কৰা হ’ব। সমগ্ৰ ছেমিকণ্ডাক্টৰ প্ৰকল্পস্থলী ৰতন টাটা ইলেক্ট্ৰনিক চিটী, জাগীৰোড নামেৰে নামকৰণ কৰিব ৰাজ্য চৰকাৰে।
PAN IIT ALUMNI FOUNDATION আৰু ভাৰত চৰকাৰৰ সহযোগত ৰাজ্যত ১০ টা দক্ষতা বিকাশ কেন্দ্ৰ স্থাপনৰ সিদ্ধান্ত গ্ৰহণ কৰিছে ৰাজ্যিক কেবিনেটে। মুখ্যমন্ত্ৰীয়ে সদৰী কৰা মতে, ৯০ কোটি ব্যয় সাপেক্ষে ৰাজ্যত নিৰ্মাণ কৰা হ’ব এই ১০ টা দক্ষতা বিকাশ কেন্দ্ৰ।
অসম বিধানসভাত উত্থাপন কৰিবলগীয়া কেইবাখনো বিধেয়কত কেবিনেটে অনুমোদন জনোৱাৰ কথাও সদৰী কৰিছে মুখ্যমন্ত্ৰীয়ে। ইয়াৰ ভিতৰত আছে নতুনকৈ বিশ্ববিদ্যালয়সমূহৰ উপাচাৰ্য নিযুক্তি প্ৰক্ৰিয়া তাৎক্ষণিক কৰিবৰ বাবে সংশোধনী বিধেয়ক বিধানসভাত উত্থাপন কৰিব ৰাজ্য চৰকাৰে।
এতিয়াৰে পৰা নতুনকৈ উত্তীৰ্ণ হোৱা অভিযন্তাসকলে ৰাজ্য চৰকাৰৰ নিবিদাৰ জৰিয়তে ঠিকা লাভ কৰাৰ ক্ষেত্ৰত পাঁচ বছৰৰ বাবে কিছু প্ৰয়োজনীয় চৰ্তাৱলী শিথিল কৰাৰ সিদ্ধান্ত গ্ৰহণ কৰিছে ৰাজ্য চৰকাৰে।
ৰাজ্যিক কেবিনেটৰ আন এক গুৰুত্বপূৰ্ণ সিদ্ধান্ত হৈছে, এতিয়া পৰা ব্যক্তিগত বিশ্ববিদ্যালয় স্থাপন কৰিবলৈ ৰাষ্ট্ৰীয় নিৰাপত্তা নিষ্পত্তিৰ (National Security Clearance)প্ৰয়োজন হ’ব। গৃহ বিভাগ আৰু ৰাজনৈতিক বিভাগে ৰাষ্ট্ৰীয় নিৰাপত্তা নিষ্পত্তি ( Security Clearance) পাছত হে কোনো ব্যক্তিয়ে অসমত ব্যক্তিগত বিশ্ববিদ্যালয় স্থাপন কৰিব পাৰিব। ইয়াৰ লগতে অসমৰ ব্যক্তিগত বিশ্ববিদ্যালয়সমূহ সম্পূৰ্ণৰূপে ধৰ্মনিৰপেক্ষ হ’ব লাগিব। এই ব্যক্তিগত বিশ্ববিদ্যালয়সমূহে তদুপৰি ধৰ্মান্তৰকৰণ দৰে কাৰ্যক সমৰ্থন কৰিব নোৱাৰিব বুলি সিদ্ধান্তগ্ৰহণ কৰিছে।
