প্ৰগতিবাদী ৰাজনৈতিক আৰু আৰ্থ-সামাজিক মতাদৰ্শৰ ধ্বজা বহন কৰি আন দিশে এলান্ধুক’লীয়া ধ্যান-ধাৰণাক প্ৰশ্ৰয় আৰু উদগণি দিয়া চীনৰ শেহতীয়া কৰ্মকাণ্ডই প্ৰকৃতিপ্ৰেমীৰ বাবে প্ৰত্যাহ্বান কঢ়িয়াই অনাৰ লগতে সমগ্ৰ বিশ্বৰ পৰিৱেশতন্ত্ৰৰ ভাৰসাম্য বিনষ্ট কইবলৈ আগবাঢ়িছে।
জীৱজন্তু, বিষেশকৈ বাঘৰ শৰীৰৰ বিভিন্ন অংশ, গঁড়ৰ খৰ্গৰ দ্বাৰা পৰম্পৰাগতভাৱে প্ৰস্তুত কৰা ঔষধৰ ওপৰত চীন চৰকাৰে নিষেধাজ্ঞা উঠাই লোৱাৰ সিদ্ধান্তই অসমৰ আপুৰুগীয়া সম্পদ গঁড় আৰু বাঘৰ অস্তিত্বলৈ অশনি সংকেত কঢ়িয়ই আনিছে।
উল্লেখ্য যে চীনত অসমত নিধন হোৱা গঁড়ৰ খৰ্গৰ এখন অবৈধ বজাৰ আছে। ঘাইকৈ চীনৰ চাহিদা পূৰণ কৰাৰ বাবেই অসমত গঁড় নিধন হৈ আহিছে। এতিয়া মুক্ত বজাৰত গঁড়ৰ খৰ্গ বিক্ৰি হ’লে সেয়া কেনে ভয়ানক হ’ব সেয়া সহজেই অনুমেয়।
এচাম বিশেষাধিকাৰপ্ৰাপ্ত নাগৰিকৰ স্বাৰ্থক বৃহৎ ৰাষ্ট্ৰীয় স্বাৰ্থ হিচাপে চলাই নিজৰ ঘৰুৱা পাৰিপাৰ্শিক অৱস্থাক অৱলীলাক্ৰমে ধ্বংস কৰিব পৰা, আমেৰিকাক প্ৰত্যাহ্বান জনাই অত্যাধুনিক মাৰণাস্ত্ৰৰ প্ৰতিযোগিতাৰে কৰি নিজৰেই এচাম নাগৰিকৰ নাগৰিক অধিকাৰ খৰ্ব কৰা, সংখ্যাগৰিষ্ঠ নাগৰিকক ক্ৰয় ক্ষমতাহীন কৰা অদূৰদৰ্শী, অবিবেচক চীন ইতিমধ্যে ইয়াৰ চুবুৰীয়া দেশসমূহৰ প্ৰতি এটা অভিশপ্ত শক্তি হৈ পৰিছে।
চীনৰ শেহতীয়া সিদ্ধান্তই সমগ্ৰ বিশ্বৰ পৰিৱেশপ্ৰেমীসকলক শংকিত আৰু মৰ্মাহত কৰি তুলিছে। সোমবাৰে চীনৰ ষ্টেট কাউঞ্চিলে মন্তব্য কৰিছিল যে ১৯৯৩ চনত বলৱৎ হোৱা নিষেধাজ্ঞা আংশিকভাৱে উঠাই লৈ বাঘ আৰু গঁড়ৰ শৰীৰৰ অংশ ঔষধ প্ৰস্তুত, গৱেষণা আৰু সাংস্কৃতিক বিনিময়ৰ বাবে ব্যৱহাৰ কৰা হ’ব। চীনৰ তৰফৰ আৰু কোৱা হৈছে যে এই ব্যৱসায় কঠোৰভাৱে নিয়ন্ত্ৰিত কৰা হ’ব আৰু বন্দী জীৱসমূহৰ শৰীৰৰ অংশহে ব্যৱহাৰ কৰাৰ অনুমতি প্ৰদান কৰা হ’ব।
বন্যপ্ৰাণী অধিকাৰ কৰ্মীসকলে প্ৰকাশ কৰিছে যে চীনৰ এই কাৰ্যই জীৱজন্তুৰ চোৰাং বেহাক যথেষ্ট উদগণি যোগাব।
তেওঁলোকে আৰু কৈছে যে চাহিদা বৃদ্ধি পাই যোৱাৰ লগে লগে লোভনীয় ধনৰ বিনিময়ত চোৰাং কাৰবাৰীয়ে সংৰক্ষিত বনঞ্চলত প্ৰৱেশ কৰিব।
এই পৰ্যন্ত অসমত ৫টা গঁড় চোৰাং চিকাৰীৰ হাতত মৰা পৰিছে। অৱশ্যে এটা পূৰ্বৰ ূছৰৰ তুলনাত যথেষ্ট কম। উল্লেখ্য যে চীনৰ পৰম্পৰাগত ঔষধত গঁড়ৰ খৰ্গ আৰু বাঘৰ হাড়ৰ বহুত মূল্য আছে। যদিওবা কোনো বৈজ্ঞানিক ভিত্তি নাই তথাপিও কামোত্তেজনাবৰ্ধক ঔষধৰ উপৰিও জ্বৰ, বাঁত বিষ, নিদ্ৰাহীনতা, মেনিনজাইটিছ নিৰাময় কৰিবলৈ পৰম্পৰাগতভাৱে প্ৰস্তুত এই ঔষধ ব্যৱহাৰ কৰা হয়।
ইতিমধ্যে বিশ্ব বন্যপ্ৰাণী নিধিয়ে (WWF) এটা বিবৃতিযোগে সাৱধান কৰি দিছে যে চীনৰ এই সিদ্ধান্তটো বন্যপ্ৰাণী সংৰক্ষণৰ প্ৰতি এটা বৃহৎ প্ৰত্যাহ্বান হিচাপে ঠিয় হ’ব।
যদিওৱা জীৱ-জন্তুৰ অংগ কেবল চিকিৎসালয় আৰু প্ৰাচীন ঔষধতহে ব্যৱহাৰ কৰা হ’ব এই বাণিজ্যই কোনখিনি বৈধ কোনখিনি অবৈধ—তাকে লৈ উপভোক্তা আৰু আইন বলৱৎকাৰীৰ মাজত এটা দ্বিধাৰ সৃষ্টি কৰিব। ইয়ে চোৰাং চিকাৰৰ প্ৰৱণতা যথেষ্ট বৃদ্ধি কৰিব বুলি বিশ্ব বন্যপ্ৰাণী নিধিয়ে সাৱধান কৰি দিছে।
