মে’ মাহত মাত্ৰ দহ দিনৰ ভিতৰত চাৰিবাৰকৈ ইন্ধনৰ মূল্যবৃদ্ধি হোৱাৰ পাছত কেন্দ্ৰীয় চৰকাৰে ২২ৰ পৰা ৩০ শতাংশ পৰ্যন্ত ইথানল মিশ্ৰিত পেট্ৰ’লৰ ওপৰত আবকাৰী শুল্ক সম্পূৰ্ণৰূপে ৰেহাই দিয়াৰ কথা ঘোষণা কৰিছে। দেশত ইথানল মিশ্ৰিত ইন্ধনৰ ব্যৱহাৰ বৃদ্ধি কৰা আৰু ইন্ধন আমদানিৰ বাবে ব্যয় হোৱা বৈদেশিক মুদ্ৰা সাশ্ৰয় কৰাৰ লক্ষ্যৰে কেন্দ্ৰীয় বিত্ত মন্ত্ৰালয়ে এক আনুষ্ঠানিক জাননী যোগে এই সিদ্ধান্ত প্ৰকাশ কৰিছে।
বিত্ত মন্ত্ৰালয়ে প্ৰকাশ কৰা নতুন নিৰ্দেশনা অনুসৰি, বজাৰত উপলব্ধ ই-২২, ই-২৫, ই-২৭ আৰু ই-৩০ শ্ৰেণীৰ ইন্ধনৰ ওপৰত এই আবকাৰী শুল্কৰ ৰেহাই প্ৰযোজ্য হ’ব। ইন্ধনৰ বৰ্ধিত চাহিদা আৰু আমদানি নিৰ্ভৰশীলতা হ্ৰাস কৰিবলৈ চৰকাৰে পূৰ্বতেই ২০ শতাংশ ইথানল মিশ্ৰিত ই-২০ পেট্ৰ’লৰ প্ৰচলন আৰম্ভ কৰিছিল। শেহতীয়াকৈ কেন্দ্ৰীয় পেট্ৰ’লিয়াম মন্ত্ৰী হৰদীপ সিং পুৰীয়ে নতুন দিল্লীৰ এটা পেট্ৰ’ল পাম্পৰ পৰা ৮৫ শতাংশ ইথানল মিশ্ৰিত ই-৮৫ ইন্ধন বিতৰণ কৰি এই ব্যৱস্থাৰ আনুষ্ঠানিক শুভাৰম্ভ কৰিছিল। ২২ৰ পৰা ৩০ শতাংশ পৰ্যন্ত ইথানল মিশ্ৰিত পেট্ৰ’লক শুল্কমুক্ত কৰাৰ এই শেহতীয়া পদক্ষেপে চৰকাৰৰ বিকল্প ইন্ধন নীতিৰ স্থিতি অধিক স্পষ্ট কৰি তুলিছে।
উল্লেখযোগ্য যে ভাৰতৰ প্ৰয়োজনীয় ইন্ধনৰ সৰহভাগেই বিদেশৰ পৰা আমদানি কৰিবলগীয়া হয়, যাৰ ফলত দেশৰ বৈদেশিক মুদ্ৰাৰ ভাণ্ডাৰৰ ওপৰত যথেষ্ট চাপ পৰে। এই নিৰ্ভৰশীলতা হ্ৰাস কৰি বৈদেশিক মুদ্ৰা সুৰক্ষিত ৰখাৰ স্বাৰ্থতেই কেন্দ্ৰীয় চৰকাৰে বিকল্প ইন্ধনৰ ওপৰত গুৰুত্ব আৰোপ কৰিছে। শেহতীয়াকৈ প্ৰধানমন্ত্ৰী নৰেন্দ্ৰ মোদীয়েও দেশবাসীক ইন্ধনৰ অপচয় ৰোধ কৰিবলৈ আহ্বান জনাই প্ৰয়োজনসাপেক্ষে ঘৰৰ পৰাই কাৰ্যালয়ৰ কাম কৰা আৰু যাতায়াতৰ বাবে একেখন বাহন একাধিক ব্যক্তিয়ে ব্যৱহাৰ কৰা বা কাৰপুলিং পদ্ধতি গ্ৰহণ কৰিবলৈ পৰামৰ্শ আগবঢ়াইছিল।
চৰকাৰৰ এই সিদ্ধান্ত এনে এক সময়ত গ্ৰহণ কৰা হৈছে যেতিয়া দেশত পেট্ৰ’ল আৰু ডিজেলৰ মূল্য ধাৰাবাহিকভাৱে বৃদ্ধি পাইছে। যোৱা মাহৰ ১৫ মে’ৰ পৰা ২৫ মে’ৰ ভিতৰত মুঠ চাৰিবাৰকৈ ইন্ধনৰ মূল্যবৃদ্ধি হয়। ১৫ মে’ত সমগ্ৰ দেশত পেট্ৰ’লৰ মূল্য প্ৰতি লিটাৰত একেকোবে তিনি টকাকৈ বৃদ্ধি পোৱাৰ পাছত ১৯ মে’ত পুনৰ ৯০ পইচা বৃদ্ধি পায়। পৰৱৰ্তী সময়ত ২৩ মে’ত ৮৭ পইচা আৰু ২৫ মে’ত পুনৰবাৰ মূল্যবৃদ্ধি ঘটে। মে’ মাহৰ দ্বিতীয়াৰ্ধৰ মাত্ৰ দহটা দিনৰ ভিতৰত পেট্ৰ’ল আৰু ডিজেলৰ মূল্য সাত টকাৰো অধিক বৃদ্ধি পোৱাৰ প্ৰেক্ষাপটত সাধাৰণ গ্ৰাহকক বিকল্প ইন্ধনৰ প্ৰতি আকৰ্ষিত কৰিবলৈকে চৰকাৰে ইথানল মিশ্ৰিত পেট্ৰ’ল শুল্কমুক্ত কৰাৰ এই পদক্ষেপ গ্ৰহণ কৰিছে।
বৰ্ধিত মূল্যবৃদ্ধিৰ বোজাৰ মাজত চৰকাৰৰ এই শুল্ক ৰেহাইৰ সিদ্ধান্তই গ্ৰাহকসকলক বিকল্প আৰু পৰিৱেশ অনুকূল ইন্ধন ব্যৱহাৰৰ প্ৰতি উৎসাহিত কৰিব বুলি আশা কৰা হৈছে। আগন্তুক সময়ত বজাৰত এই ইথানল মিশ্ৰিত ইন্ধনৰ সহজলভ্যতা আৰু সাধাৰণ ৰাইজৰ মাজত ইয়াৰ গ্ৰহণযোগ্যতাই কেন্দ্ৰীয় চৰকাৰৰ এই গুৰুত্বপূৰ্ণ পদক্ষেপৰ সফলতা নিৰ্ধাৰণ কৰিব।
