ভাৰতীয় ৰাজনীতিত আকৌ নতুন চমক। ‘ককৰোচ জনতা পাৰ্টি (চিজেপি)’ সন্দৰ্ভত চৰ্চা আৰু আলোচনাৰ মাজতে উচ্চতম ন্যায়ালয়ৰ প্ৰাক্তন ন্যায়াধীশ মাৰ্কাণ্ডেয় কাটজুৱে নতুন দল গঠনৰ কথা ঘোষণা কৰিছে। এই দলৰ নাম আকৌ ‘ইস্ক কৰো পাৰ্টি’, সংক্ষিপ্ত ৰূপত আই কে পি।
প্ৰথমতে বহুতে ভাবিছিল যে কাটজুৰ এই নতুন দলটো আচলতে ককৰোচ পাৰ্টিক উপহাস কৰিবলৈহে, কোনোৱে আকৌ দলটোৰ এনে নাম দেখি আচৰিত হৈ পৰে! তেওঁলোকে কি কৰিব, আকৌ কিবা ছিৰিয়াছ ইচ্ছ্যু? চৰ্চা আৰম্ভ হ’ল। অৱশ্যে প্ৰাক্তন ন্যায়াধীশেই সকলো বুজাই দিলে।
ছ’চিয়েল মিডিয়া প্লেটফৰ্ম এক্সত এটা দীঘলীয়া পোষ্টত কাটজুৱে কয় যে বহুতে হয়তো ভাবিব পাৰে যে এই দলৰ নামটো এটা কৌতুক বা ‘ভেলেন্টাইন ডে’ ষ্টাইলৰ প্ৰেম প্ৰচাৰৰ পদক্ষেপ। কিন্তু তেওঁ দাবী কৰে যে আই কে পি আচলতে ভাৰতৰ গভীৰ সামাজিক আৰু অৰ্থনৈতিক সংকটৰ সৈতে মোকাবিলা কৰাৰ বাবে এক “অত্যন্ত ছিৰিয়াছ প্ৰচেষ্টা”।
উচ্চতম ন্যায়ালয়ৰ প্ৰাক্তন ন্যায়াধীশ মাৰ্কাণ্ডেয় কাটজুৱে তৃণমূল কংগ্ৰেছৰ সাংসদ মহুৱা মৈত্ৰক তেওঁৰ সদ্য মুকলি কৰা অনলাইন ৰাজনৈতিক দল ‘ইস্ক কৰো পাৰ্টি’ত যোগদান কৰিবলৈ আমন্ত্ৰণ জনাইছে। ছচিয়েল মিডিয়াত এটা পোষ্টৰ জৰিয়তে তেওঁ এই নিমন্ত্ৰণী পত্ৰ প্ৰদান কৰে। নতুন দলৰ শ্লোগান হৈছে “যুদ্ধ নহয় প্ৰেম কৰক”।
কাটজুৰ মতে, ভাৰত বৰ্তমান চৰম দৰিদ্ৰতা, নিবনুৱা সমস্যা, শিশুৰ অপুষ্টি, স্বাস্থ্যসেৱাৰ অভাৱ, শিক্ষা সংকট আৰু মূল্যবৃদ্ধিৰ সমস্যাৰ সন্মুখীন হৈছে। জাতি, ধৰ্ম আৰু বৰ্ণৰ ভিত্তিত মানুহ বিভাজিত হ’লে এই সমস্যা সমাধান সম্ভৱ নহয় বুলিও তেওঁ কয়।
তেওঁ অভিযোগ কৰে যে, “স্বাৰ্থপৰ ৰাজনীতিবিদসকলে কেৱল ক্ষমতা আৰু ভোট বেংকৰ বাবে মানুহক বিভাজিত কৰিছে।” আই কে পিৰ মূল লক্ষ্য হ’ব মানুহৰ মাজত ঐক্য আৰু ভালপোৱাৰ সৃষ্টি কৰা। কাটজুৱে লিখিছে, “ধৰ্ম, জাতি বা বৰ্ণ নিৰ্বিশেষে আমাৰ দেশৰ সকলো জনসাধাৰণৰ প্ৰতি প্ৰেম (ইস্ক) থাকিব লাগে। তেতিয়াহে জনসাধাৰণৰ মুক্তিৰ বাবে এক বৃহৎ আন্দোলন সম্ভৱ হ’ব।”
আই কে পিত যোগদান কৰিবলৈ দিয়া পোষ্টত তেওঁ কয় যে আই কে পিত যোগদান কৰিব বিচৰাসকলে [email protected] ত যোগাযোগ কৰিব পাৰে।
ইপিনে, দিল্লীৰ যন্তৰ মন্তৰত ককৰোচ জনতা পাৰ্টিৰ প্ৰথমটো প্ৰতিবাদী কাৰ্যসূচীয়ে শেহতীয়াকৈ সঁহাৰি লাভ কৰিছে। কাটজুৱে এই পদক্ষেপক তীব্ৰ সমালোচনা কৰে। তেওঁ চিজেপিৰ প্ৰতিষ্ঠাপক অভিজিত দীপকেকো প্ৰত্যক্ষভাৱে “ইডিয়ট” বুলি আক্ৰমণ কৰে।
তেওঁৰ মতে, চিজেপিৰ অন্যতম দাবী আছিল কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগ। কিন্তু কাটজুৰ প্ৰশ্ন হ’ল “কোনো মন্ত্ৰীয়ে পদত্যাগ কৰিলে তেওঁৰ ঠাইত আন এজন মন্ত্ৰী আহিব। সেইটোৱে প্ৰকৃত সমস্যাটো কেনেকৈ সলনি কৰিব?”
তেওঁ এক্সত লিখিছে, “অভিজিত দীপকে যে এজন মূৰ্খ সেই প্ৰমাণ স্পষ্ট। কাৰণ তেওঁৰ এটা মূল দাবী ভাৰতৰ শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ। কিন্তু পদত্যাগ কৰিলেও তেওঁৰ ঠাইত আন এজন মন্ত্ৰী আহিব। গতিকে সেইটোত কি পৰিৱৰ্তন হ’ব?”
সূত্ৰৰ পৰা জানিব পৰা মতে সোমবাৰে ইণ্ডিয়া মিত্ৰজোঁটৰ বৈঠকতো ককৰোচ জনতা পাৰ্টিৰ বিষয়টো উত্থাপন হৈছিল। যদিও সেয়া আনুষ্ঠানিক কাৰ্যসূচীৰ অংশ নাছিল, তথাপিও কেইবাজনো বিৰোধী নেতাই এই নতুন আন্দোলনৰ ৰাজনৈতিক উদ্দেশ্যক লৈ প্ৰশ্ন উত্থাপন কৰিছিল। সভাত উপস্থিত থকা বহুতৰে মতামত আছিল যে এই ঘটনাবোৰ দেশৰ যুৱক-যুৱতীসকলৰ প্ৰকৃত অসন্তুষ্টিৰ প্ৰতিফলন।
বৰ্তমান ৰাজনৈতিক মহলত প্ৰশ্নটো মাথোঁ এটাই – ইস্ক কৰো পাৰ্টি (আই কে পি) কেৱল এটা প্ৰতীকী পদক্ষেপ নেকি, নে সঁচাকৈয়ে আগন্তুক দিনত ভাৰতৰ ৰাজনৈতিক সমীকৰণত নতুন অধ্যায় লিখিবলৈ গৈ আছে?
