দলীয় ৰাজনীতিয়ে এতিয়া সকলো সীমা চেৰাই শ্ৰেণীকোঠা আৰু পৰীক্ষাৰ প্ৰশ্নকাকততো প্ৰৱেশ কৰিছে।
বিজেপি নেতৃত্বাধীন মণিপুৰ চৰকাৰৰ অধীনৰ Council of Higher Secondary Education (CHSE)-এ অনুষ্ঠিত কৰা ২০১৯-২০২০ বৰ্ষৰ দ্বাদশ শ্ৰেণীৰ চূড়ান্ত পৰীক্ষাৰ প্ৰশ্নকাকতত পৰীক্ষাৰ্থীসকলক সোধা প্ৰশ্নই চকু কপালত তুলিছে সচেতন মহলৰ।
২২ তাৰিখে অনুষ্ঠিত ৰাজনীতি বিজ্ঞান বিভাগৰ পৰীক্ষাত এটা প্ৰশ্নত (ক্ৰং নং ৩২) পৰীক্ষাৰ্থীসকলক “বিজেপিৰ প্ৰতীক চিহ্ন”টো আঁকিবলৈ দিয়া হৈছে। তাৰ বাবে দিয়া হৈছে ৪ নম্বৰ।
আন এটা প্ৰশ্নত কোৱা হৈছে, “ৰাষ্ট্ৰ নিৰ্মাণৰ ক্ষেত্ৰত নেহৰুৰ চাৰিটা নেতিবাচক দিশ উল্লেখ কৰা”।
শ্ৰেণীকোঠালৈ দলীয় ৰাজনীতিক লৈ যোৱা এই কাণ্ডৰ বিৰুদ্ধে ইতিমধ্যে ৰাজ্যখনৰ বিৰোধী দল কংগ্ৰেছ সৰৱ হৈ পৰিছে।
কংগ্ৰেছে ইয়াক ছাত্ৰ-ছাত্ৰীৰ মাজত বিশেষ ধৰণৰ মনোবৃত্তি সুমাই দিবৰ বাবে প্ৰয়াস আখ্যা দিছে আৰু গৰিহণা দিছে।
আনহাতে প্ৰশ্নকেইটা “প্ৰাসংগিক” বুলি দাবী মণিপুৰ বিজেপিৰ সাধাৰণ সম্পাদক এন নিম্বাছ সিঙৰ।
টাইমছ অব ইণ্ডিয়াত এটা বাতৰিৰ সৈতে সংশ্লিষ্ট শিক্ষা পৰিষদৰ অধ্যক্ষ এল মহেন্দ্ৰ সিঙৰ এটা উদ্ধৃতি প্ৰকাশ পাইছে, য’ত কোৱা হৈছে যে কোনোটো প্ৰশ্নই পাঠ্যক্ৰমৰ বাহিৰত নহয়।
