আবকাৰী বিভাগৰ কামৰূপ মহানগৰ জিলাৰ গুৱাহাটী সদৰ চক্ৰই মহানগৰীত দেশী -বিদেশী অবৈধ সুৰাৰ বিৰুদ্ধে অভিযান চলাই আহিছে।
বৃহস্পতিবাৰে কামৰূপ মহানগৰ জিলাৰ আবকাৰী অধীক্ষক দেৱজিৎ নাথ আৰু উপ-আবকাৰী অধীক্ষক অনন্ত কলিতাৰ নেতৃত্বত গুৱাহাটী সদৰ আবকাৰী চক্ৰই ধীৰেনপাৰাৰ পাহাৰীয়া অঞ্চলত চুলাই মদ প্ৰস্তুত কৰা ভাটীত এক অভিযান চলায়।
অভিযানৰ উমান পাইয়ে চুলাই মদ প্ৰস্তুতৰ লগত জড়িত লোকসকল পলাই যাবলৈ সক্ষম হয়।
অৱশ্যে, অভিযানকাৰী দলটোৱে চুলাই মদ প্ৰস্তুত কাৰ্যত ব্যৱহৃত চাৰি হাজাৰ হাজাৰ লিটাৰ পাছ , প্ৰায় ১০০ লিটাৰ চুলাই মদ, ১৮ টা ড্ৰাম আৰু ৪ টা সা-সঁজুলি জব্দ কৰা হয়।
মহানগৰীৰ বিভিন্ন আওহতীয়া অঞ্চলত চুলাই মদৰ ভাটী চলি থকাৰ কথা বিভিন্ন সময়ত প্ৰকাশ পাই আহিছে।
আবকাৰী বিভাগে সময়ে সময়ে এইদৰে ঘাটী উৎখাত কৰি অহাৰ পাছতো কিন্তু মহানগৰীত চুলাই মদৰ প্ৰচলন অব্যাহত থকাৰ ঘটনা পোহৰলৈ আহি আছে।