ডি এ বা মৰগীয়া বানচ চৰকাৰী কৰ্মচাৰীৰ কোনো মৌলিক অধিকাৰ নহয় আৰু ই সম্পূৰ্ণৰূপে চৰকাৰৰ নীতিৰ ওপৰতহে নিৰ্ভৰ কৰে বুলি কেৰালাৰ বাওঁপন্থী চৰকাৰে আদালতত এক চাঞ্চল্যৰ সৃষ্টি কৰিছে। কেৰালা উচ্চ ন্যায়ালয়ত চলি থকা এটা গোচৰৰ শুনানিৰ সময়ত চিপিএম চৰকাৰে স্পষ্টকৈ জনাইছে যে কৰ্মচাৰীক ডি এ দিয়াটো চৰকাৰৰ বাবে কোনো বাধ্যতামূলক বিষয় নহয়। চৰকাৰৰ এই স্থিতিৰ পিছতে এতিয়া সমগ্ৰ দেশৰ লগতে বিশেষকৈ পশ্চিমবংগৰ ৰাজনীতিতো তোলপাৰ লাগিছে।
পশ্চিমবংগত যি সময়ত বাওঁপন্থী সংগঠনসমূহে ডি এৰ দাবীত দীৰ্ঘদিন ধৰি আন্দোলন চলাই আহিছে আৰু চৰকাৰক তীব্ৰ সমালোচনা কৰিছে, সেই একেটা সময়ে নিজৰ শাসনত থকা একমাত্ৰ ৰাজ্য কেৰালাত তেওঁলোকৰ চৰকাৰে ডি এৰ বিৰুদ্ধে স্থিতি লোৱা কাৰ্যই সকলোকে আচৰিত কৰি তুলিছে। বাওঁপন্থীসকলৰ এই বিপৰীতমুখী স্থিতিক লৈ এতিয়া তীব্ৰ প্ৰশ্ন উত্থাপন হৈছে। এফালে বংগত ডি এৰ দাবীত নবান্ন অভিযান কৰা বাওঁপন্থীসকলে আনফালে কেৰালাত ডি এ কৰ্মচাৰীৰ অধিকাৰ নহয় বুলি কৰা মন্তব্যই তেওঁলোকৰ দুমুখীয়া নীতিটোকে প্ৰতিফলিত কৰিছে।
তথ্য অনুসৰি কেৰালাৰ বাওঁ চৰকাৰে বিগত ছয় মাহ ধৰি চৰকাৰী কৰ্মচাৰীসকলৰ ডি এৰ ধন আদায় দিয়া নাই যাৰ মুঠ পৰিমাণ প্ৰায় ১৭,৭০০ কোটি টকা। নিজৰ প্ৰাপ্য বিচাৰি বাৰে বাৰে চৰকাৰৰ ওচৰত আবেদন জনাই বিফল হোৱাৰ পিছত কৰ্মচাৰীসকলে আদালতৰ সহায় লৈছিল। ইয়াৰ প্ৰত্যুত্তৰত চৰকাৰে আদালতত কয় যে ৰাজ্যখনৰ বৰ্তমানৰ আৰ্থিক অৱস্থাৰ বাবে এই বৃহৎ পৰিমাণৰ ধন আদায় দিয়াটো সম্ভৱ নহয়। যদি এই ধন দিয়া হয় তেন্তে ৰাজ্যখনে এক ভয়াবহ অৰ্থনৈতিক সংকটৰ সন্মুখীন হ’ব বুলিও চৰকাৰে যুক্তি দৰ্শাইছে।
ইফালে চৰকাৰী কৰ্মচাৰীসকলে দাবি কৰিছে যে ৰাজ্যৰ আৰ্থিক অৱস্থা যিয়েই নহওক তাৰ বাবে চৰকাৰহে দায়ী আৰু তাৰ বাবে কৰ্মচাৰীসকলে নিজৰ প্ৰাপ্যৰ পৰা বঞ্চিত হোৱাটো উচিত নহয়। কিন্তু কেৰালা চৰকাৰে আদালতত দিয়া মন্তব্যই এতিয়া চিপিএম দলক ৰাজনৈতিকভাৱে যথেষ্ট অস্বস্তিত পেলাইছে। বিশেষকৈ কেৰালা আৰু পশ্চিমবংগত আগন্তুক নিৰ্বাচনৰ পৰিপ্ৰেক্ষিতত এই ডি এ বিতৰ্কই বাওঁপন্থী শিবিৰৰ বাবে এক ডাঙৰ প্ৰত্যাহ্বান হৈ থিয় দিছে।
