কেৰেলাৰ পৰিবহণ মন্ত্ৰী কে বি কুমাৰ বৰ্তমান এক গভীৰ বিতৰ্কৰ আৱৰ্তত সোমাই পৰিছে। মন্ত্ৰীগৰাকীৰ বিৰুদ্ধে তেওঁৰ পত্নী বিধু মেননে উত্থাপন কৰিছে এক গুৰুতৰ অভিযোগ। মেননৰ মতে, তেওঁ নিজৰ স্বামীক আন এগৰাকী মহিলাৰ সৈতে আপত্তিজনক অৱস্থাত নিজৰ শোৱা কোঠাতে ধৰা পেলাইছে। কোল্লাম জিলাৰ বালাকোমত থকা নিজ গৃহতে এই ঘটনা সংঘটিত হোৱা বুলি পত্নীয়ে সংবাদ মাধ্যমৰ আগত প্ৰকাশ কৰিছে। তেওঁ জনোৱা মতে, সেইদিনা তেওঁ হঠাতে ঘৰলৈ গৈ শোৱা কোঠাত যি দৃশ্য দেখিলে সেয়া বৰ্ণনাতীত। আনকি তেওঁ সেই মুহূৰ্তৰ ফটো আৰু ভিডিঅ‘ সংগ্ৰহ কৰি থৈছে বুলিও দাবী কৰিছে। এই সমগ্ৰ কাণ্ডৰ সময়ত মন্ত্ৰীগৰাকীৰ কৰ্মচাৰী আৰু ড্ৰাইভাৰে তেওঁক বাধা দিয়াৰ লগতে মাৰপিট কৰা বুলিও তেওঁ অভিযোগ তুলিছে।
এই অভিযোগৰ পাছতে ৬০ বছৰীয়া মন্ত্ৰী কে বি কুমাৰে নিজৰ স্থিতি স্পষ্ট কৰিছে। তেওঁ সকলো অভিযোগ অস্বীকাৰ কৰিলেও এটা আচৰিত মন্তব্য কৰিছে। মন্ত্ৰীগৰাকীৰ মতে, প্ৰেম কোনো অপৰাধ নহয় আৰু প্ৰেমৰ অভিজ্ঞতা সকলোৰে থাকে। তেওঁ লগতে কয় যে এইয়া তেওঁৰ সম্পূৰ্ণ ব্যক্তিগত কথা আৰু ইয়াত কোনেও হস্তক্ষেপ কৰা উচিত নহয়। তেওঁ কোনো নাৰীক অসন্মান কৰা নাই বুলি দাবী কৰাৰ লগতে কয় যে তেওঁৰ সমষ্টিৰ ৰাইজে তেওঁৰ ওপৰত থকা বিশ্বাস হেৰুৱাই নেপেলায়। উল্লেখনীয় যে ইয়াৰ পূৰ্বেও তেওঁৰ প্ৰথম পত্নীয়েও তেওঁৰ বিৰুদ্ধে অনুৰূপ অভিযোগ উত্থাপন কৰিছিল, যিটোৱে বৰ্তমানৰ বিতৰ্কক অধিক ইন্ধন যোগাইছে।
ইফালে এই ঘটনাক কেন্দ্ৰ কৰি ৰাজ্যখনৰ বিৰোধী দল কংগ্ৰেছ নেতৃত্বাধীন ইউডিএফ সৰৱ হৈ পৰিছে। বিধানসভাৰ বিৰোধী দলৰ নেতা ভি ডি সথিছানে এই সন্দৰ্ভত মুখ্যমন্ত্ৰীক জবাবদিহি কৰিছে। তেওঁ প্ৰশ্ন উত্থাপন কৰিছে যে যদি এজন মন্ত্ৰীৰ পত্নীয়েই সুৰক্ষা আৰু ন্যায় নাপায়, তেন্তে ৰাজ্যখনৰ সাধাৰণ মহিলাৰ অৱস্থা কি হ‘ব। ৰাজনৈতিক মহলত চৰ্চা চলিছে যে এনে পৰিস্থিতিৰ বাবে কে বি কুমাৰে অতি শীঘ্ৰেই নিজৰ পদৰ পৰা পদত্যাগ কৰিব লগা হ’ব পাৰে। নিৰ্বাচনৰ মুখত এই কেলেংকাৰীয়ে চৰকাৰক যথেষ্ট অস্বস্তিত পেলাইছে।
