ভাৰত পাকিস্তানৰ মাজত কাশ্মীৰকলৈ চলিথকা সংঘাতৰ অন্ত ক’ত? পাকিস্তানে কেইবাবাৰো কাশ্মীৰ সমস্যাক ৰাষ্ট্ৰসংঘৰ মজিয়াত উত্থাপন কৰি ভাৰতক হেঁচা দিয়াৰ চেষ্টা কৰি আহিছে। বুধবাৰে জেনেভাত অনুষ্ঠিত হৈযোৱা ৰাষ্ট্ৰসংঘৰ নিৰাপত্তা পৰিষদৰ অধিৱেশনত পাকিস্তানৰ আইন, ন্যায় আৰু মানৱ অধিকাৰ মন্ত্ৰী আজম নাজিৰ তাৰাৰ আৰু ভাৰতৰ স্থায়ী প্ৰতিনিধি কে ত্যাগীৰ সাক্ষাৎ হয়।
আজমে অভিযোগ কৰি কয় যে কাশ্মীৰত দীৰ্ঘদিন ধৰি মানৱ অধিকাৰ খৰ্ব হৈ আহিছে। তাত ৰাষ্ট্ৰসংঘৰ চনদ আৰু আন্তঃৰাষ্ট্ৰীয় আইনক সন্মান কৰা হোৱা নাই। কাশ্মীৰত যিদৰে সাধাৰণ মানুহৰ অধিকাৰ খৰ্ব হৈছে, সেয়া বন্ধ কৰাৰ প্ৰয়োজন আছে।
পাকিস্তানী প্ৰতিনিধিৰ বক্তব্যৰ প্ৰত্যুত্তৰত ত্যাগীয়ে, কাশ্মীৰৰ পৰিস্থিতি সন্দৰ্ভত পাকিস্তানে উত্থাপন কৰা অভিযোগ নাকচ কৰি সম্পূৰ্ণ ভিত্তিহীন আৰু মিছা বুলি উল্লেখ কৰে। লগতে কয় পাকিস্তানৰ তথাকথিত নেতৃত্বই দীৰ্ঘদিন ধৰি সেনাবাহিনীৰ নিৰ্দেশত সন্ত্ৰাসবাদক লৈ অপপ্ৰচাৰ চলাই আহিছে। গণতন্ত্ৰই ভাৰতৰ বাবে শেষ শব্দ বুলি মন্তব্য দি কয়, মানৱ অধিকাৰৰ বিষয়ে ডাঙৰ কথা কোৱাৰ পৰিৱৰ্তে তেওঁলোকে নিৰ্লজ্জভাৱে ৰাষ্ট্ৰসংঘই নিষিদ্ধ কৰা সন্ত্ৰাসবাদীক আশ্ৰয় দিয়ে।
নতুন দিল্লীয়ে ইছলামবাদক ব্যৰ্থ ৰাষ্ট্ৰ বুলি অভিহিত কৰি ইয়াৰ আভ্যন্তৰীণ ব্যৰ্থতাসমূহ চাবলৈ পৰামৰ্শ দিছে। এনে ব্যৰ্থ দেশৰ ওপৰত সভাৰ সময় নষ্ট হোৱাটো দুৰ্ভাগ্যজনক বুলিও মন্তব্য প্ৰদান কৰে ত্যাগীয়ে।
