উত্তৰ প্ৰদেশৰ বালৰামপুৰ জিলাৰ এজন স্বঘোষিত বাবা জালালুদ্দিন ওৰফে ছাংগুৰ বাবাৰ বিৰুদ্ধে ভয়ংকৰ অপৰাধৰ অভিযোগ উত্থাপিত হৈছে। ধৰ্মান্তৰকৰণৰ এক বিশাল জালৰ মাষ্টাৰমাইণ্ড হিচাপে পৰিচিত এই ব্যক্তিৰ কুকৰ্মৰ তথ্যই তীব্ৰ চাঞ্চল্যৰ সৃষ্টি কৰিছে। উত্তৰ প্ৰদেশৰ এণ্টি-টেৰৰিজম স্কোৱাডে (ATS) ছাংগুৰ বাবা আৰু তেওঁৰ সহযোগী নীতু ওৰফে নাছৰিনক গ্ৰেপ্তাৰ কৰি তদন্ত আৰম্ভ কৰিছে। ইয়াৰ পিছতেএনফ’ৰ্ছমেণ্ট ডাইৰেক্টৰেটে (ED) তেওঁৰ বিৰুদ্ধে ধন সৰবৰাহৰ তদন্তও আৰম্ভ কৰা বুলি জানিব পৰা গৈছে।
জালালুদ্দিন ওৰফে ছাংগুৰ বাবাৰ বিৰুদ্ধে অভিযোগ, তেওঁ সাধাৰণতে হিন্দু সম্প্ৰদায়ৰ বিশেষকৈ দুৰ্বল, দৰিদ্ৰ আৰু বিধৱা মহিলাসকলক লক্ষ্য কৰি ধৰ্মান্তৰকৰণৰ কামত জড়িত আছিল। তেওঁ আৰ্থিক সাহায্য, বিবাহৰ প্ৰতিশ্ৰুতি, বিদেশত চাকৰিৰ প্ৰলোভন আৰু ভীতি প্ৰদৰ্শনেৰে ধৰ্মান্তৰ কৰণ কৰি অহিছিল। তদন্তত পোহৰলৈ আহিছে যে তেওঁ “প্ৰজেক্ট” (লক্ষ্য কৰা যুৱতী), “মিট্টি পলটনা” (ধৰ্মান্তৰকৰণ), “কাজল কৰ্না” (মানসিক প্ৰভাৱ বিস্তাৰ) আৰু “দীদাৰ” (তেওঁৰ সৈতে সাক্ষাৎৰ ব্যৱস্থা)ৰ দৰে ক’ড লেংগুৱেজ ব্যৱহাৰ কৰি এই অপৰাধৰ জাল পাতিছিল। এই সংকেতৰ জৰিয়তে তেওঁ সাধাৰণ লোকৰ পৰা নিজৰ কাৰ্যকলাপ গোপন ৰাখিছিল। ATS-এ তেওঁৰ ডিজিটেল ডিভাইচৰ পৰা এই ক’ডৰ তথ্য উদ্ধাৰ কৰিছে। তদন্তত প্ৰকাশ পাইছে যে তেওঁ বিশেষকৈ ১,৫০০ৰো অধিক হিন্দু মহিলাৰ লগতে হাজাৰ হাজাৰ আন ধৰ্মৰ লোকক জোৰ-জবৰদস্তিৰে ধৰ্মান্তৰিত কৰিছিল।
প্ৰকাশিত তথ্য অনুসৰি ছাংগুৰ বাবাৰ আৰ্থিক জালৰ তথ্যই আৰু অধিক চাঞ্চল্যৰ সৃষ্টি কৰিছে। ED-ৰ তদন্তত পোহৰলৈ আহিছে যে তেওঁ তিনি বছৰৰ ভিতৰত প্ৰায় ৫০০ কোটি টকাৰ বিদেশী পুঁজি লাভ কৰিছিল, যাৰ ভিতৰত ৩০০ কোটি টকা নেপালৰ জৰিয়তে হাৱালা নেটৱৰ্কৰ মাধ্যমেৰে আৰু ২০০ কোটি টকা পোন পতিয়া কৈ লাভ কৰিছিল। এই ধন মধ্যপ্ৰাচ্যৰ দেশ পাকিস্তান, ডুবাই, ছৌদি আৰৱ আৰু তুৰ্কীৰ পৰা আহিছিল। তেওঁৰ নামত আৰু তেওঁৰ সহযোগীৰ নামত ভাৰত আৰু নেপালত ১০০ৰো অধিক বেংক একাউণ্টৰ সন্ধান পোৱা গৈছে। এই ধনেৰে তেওঁ বলৰামপুৰ, পুনে আৰু নাগপুৰত ১০০ কোটি টকাৰো অধিক মূল্যৰ সম্পত্তি ক্ৰয় কৰিছিল। তদন্তত প্ৰকাশ পাইছে যে তেওঁ চান্দ আউলিয়া দৰগাহৰ পৰা এই কাৰ্যকলাপ চলাইছিল। ইয়াৰ পৰাই তেওঁ ধৰ্মীয় সভাৰ আয়োজন কৰি হিন্দু আৰু দুৰ্বল সম্প্ৰদায়ৰ লোকসকলক লক্ষ্য কৰিছিল।
