গোলাঘাট জিলাৰ মেৰাপানীৰ নৱগ্ৰাম গাঁৱৰ প্ৰদীপ শইকীয়াৰ পুত্র সীমান্ত শইকীয়া নামৰ বিবাহিত যুৱকজনক অন্ধ্ৰপ্ৰদেশৰ পাকিস্তান সীমান্তৱৰ্তী আৰৱ সাগৰৰ পৰা মাছমৰীয়া জাহাজসহ আন ২২ জন ভাৰতীয় লোকৰ সৈতে পাকস্তানী নৌ সেনাই আটক কৰি নিছিল।
উক্ত ঘটনাৰ বাৰদিন পাছতো পাকিস্তান চৰকাৰে মুক্তি নিদিয়াত সীমান্ত শইকীয়াৰ নৱ-বিবাহিতা পত্নী, পিতৃ-মাতৃ তথা পৰিয়াল ভীষণ উদ্বিগ্ন হৈ পৰিছে। এটি দুমহীয়া সন্তানৰ পিতৃ সীমান্তৰ পত্নী আৰু পিতৃ-মাতৃয়ে পাকিস্তানত কাৰাৰুদ্ধ হৈ থকা সীমান্তৰ অনিশ্চিত ভৱিষ্যতক লৈ ভাগি পৰিছে। ইপিনে, সীমান্তই বৰ্তমানলৈকে পুত্ৰৰ মুখ দেখা নাই।
উল্লেখযোগ্য যে আৰৱ সাগৰত মাছ মাৰিবলৈ যাওঁতে পাকিস্তানী নৌ সেনাই যোৱা ২৮ নৱেম্বৰত সীমান্তৰ লগতে আন ২২জনক আটক কৰি নিছিল। সীমান্তৰ পৰিয়ালে ঘটনাৰ বিষয়ে জানিবলৈ পোৱাৰ পাছতে এই সন্দৰ্ভত অসম চৰকাৰক অৱগত কৰে।
আনহাতে, যোৱা ৩ ডিচেম্বৰত পৰিয়ালৰ পালৰ পৰা পৰা মুখ্য মন্ত্ৰী সৰ্বানন্দ সোণোৱালক এখন পত্ৰ প্ৰদান কৰি কেন্দ্ৰীয় চৰকাৰৰ লগত আলোচনা কৰি সীমান্তৰ মুক্তিৰ ব্যৱস্থা গ্ৰহণ কৰিবলৈ আহ্বান জনায়।
ইপিনে সীমান্তৰ পত্নী পূজা শইকীয়াই জানিবলৈ দিয়ে যে দৰিদ্ৰতা আৰু আৰ্থিক অনাটনৰ বাবেই তেওঁৰ স্বামী অন্ধ্ৰপ্ৰদেশৰ এটা কোম্পানীৰ তত্ত্বাৱধানত কাম কৰিবলৈ তালৈ গৈছিল। সীমান্তই ৬ মাহৰ পূৰ্বে ঘৰৰ পৰা অন্ধ্ৰপ্ৰদেশলৈ গৈছিল। স্বামী ঘৰৰ পৰা যোৱাৰ চাৰিমাহৰ পাছতে তেওঁলোকৰ সন্তানটিৰ জন্ম হয়।
আনহাতে, পত্নী পূজাই ৰাজ্য আৰু কেন্দ্ৰীয় চৰকাৰক অতি সোনকালে স্বামী সীমান্ত শইকীয়াক পাকিস্তানৰ পৰা মুকলি কৰি আনিবৰ বাবে আহ্বান জনাইছে।