পশ্চিমবংগৰ নইদাত কৰ্তব্যৰত বিএছএফৰ ৫৪ নং বেটেলিয়নৰ কনিষ্টবল অসমৰ কোকৰাঝাৰ মোক্ৰাপাৰাৰ নিৰেন চন্দ্ৰ ৰায়ে যোৱা শনিবাৰে আত্মহত্যা কৰাৰ ঘটনাক পৰিয়ালৰ লোকে সহজভাৱে ল’ব পৰা নাই।
চাকৰিৰ পৰা অৱসৰ ল’বলৈ আৰু মাত্ৰ চাৰিটা বছৰ বাকী থকা অৱস্থাত বিএছএফ জোৱানজনে কিয় আত্মহত্যা কৰিলে সেয়া স্পষ্ট নহ’লেও এই আত্মহত্যাৰ ঘটনাত পৰিয়ালৰ লোকে সন্দেহ ব্যক্ত কৰিছে।
সোমবাৰে মৃত ৰায়ৰ নশ্বৰদেহ কোকৰাঝাৰত আহি উপস্থিত হোৱাৰ পাছত বিএছএফৰ এটা দলে ৰায়ৰ নশ্বৰদেহ পৰিয়ালক চমজাই দিয়াৰ সময়ত শোকাকুল পৰিৱেশৰ সৃষ্টি হয়।
জোৱানজনৰ পেটত গুলী লগাৰ চিন স্পষ্ট হৈ থকা মৃতদেহ প্ৰত্যক্ষ কৰাৰ পাছত পত্নীকে ধৰি পৰিয়ালৰ সদস্যসকল শোকত ভাগি পৰে। পৰিয়ালৰ লোকে আত্মহত্যাৰ এই ঘটনাত সন্দেহ প্ৰকাশ কৰে।
মোক্ৰাপাৰাৰ বাসগৃহত মৃতদেহ আহি পোৱাৰ পাছতে অসংখ্য লোকে ভিৰ কৰে আৰু নশ্বৰ দেহত শেষ শ্ৰদ্ধা নিবেদন কৰে। ইপিনে, পৰিয়ালৰ লোকে মৃত নিৰেন চন্দ্ৰ ৰায়ৰ পুত্ৰ প্ৰসেনজিৎ ৰায়ক চৰকাৰী চাকৰি এটাত নিযুক্তি দিবলৈ দাবী জনাইছে।