ভালপোৱা, আৱেগ আৰু বেদনা-বিধূৰ পৰিৱেশৰ মাজতে কিংবদন্তি শিল্পী জুবিন গাৰ্গৰ জন্মদিন উদযাপন। ক্ৰান্তদৰ্শী শিল্পীগৰাকীৰ অকাল মৃত্যুৰ পিছত তেওঁৰ প্ৰথম জন্মদিনটো উপলক্ষে যোৱা মাজনিশা কাহিলীপাৰাত থকা তেওঁৰ বাসগৃহত অনুৰাগীয়ে ভিৰ কৰে।
জুবিনৰ ৫৩ সংখ্যক জন্মদিন উপলক্ষে অনুৰাগী, বন্ধু-বান্ধৱী, পৰিয়ালৰ আন্তৰিক মৰম আৰু স্মৃতিচাৰণৰ জোৱাৰ।
মাজনিশা জন্মদিনৰ কেক কটা অনুষ্ঠানৰ বাবে আগ্ৰহেৰে অপেক্ষা কৰি ঘৰৰ বাহিৰত সমবেত হৈছিল বৃহৎ সংখ্যক অনুৰাগী।
আৱেগে বিহ্বল হৈ জুবিনৰ পত্নী গৰিমা শইকীয়া গাৰ্গে অনুৰাগীৰ সৈতে উদযাপনৰ বাবে বাহিৰলৈ ওলাই আহিল।
অনুৰাগীয়ে আৱেগিক হৈ জুবিনৰ গীত গাই জুবিন সংগীতৰ মায়াজালত আৱদ্ধ হৈ পৰে। শিল্পী মানস ৰবিন আৰু অজয় ফুকনেও মাজনিশা যোগদান কৰি তেওঁৰ বাবে কেক কাটি এই উদযাপনত অংশ লয়।
মানস ৰবিনে লগতে ঘোষণা কৰে যে জুবিন গাৰ্গৰ জন্মদিনৰ উপহাৰ হিচাপে “অমৰ জুবিন, প্ৰাণৰ জুবিন” শীৰ্ষক গীত এটা মুকলি কৰা হ’ব। আনকি কিছুমানে গীটাৰৰ আকৃতিৰ ডিজাইন কৰা কেকও লৈ আহিছিল।
পুৱাৰ পৰাই সোণাপুৰ ডিমৰীয়াবাসীয়ে তেওঁলোকৰ হাৰ্টথ্ৰবক সন্মান জনাই কেইবাটাও অনুষ্ঠানৰ আয়োজন কৰিছে। ইয়াৰ ভিতৰত আছে ৰক্তদান অভিযান, ১০০ টা নাহৰ পুলি ৰোপণ, নাম কীৰ্তন, ভাওনাৰ প্ৰদৰ্শনৰ লগতে অন্যান্য সাংস্কৃতিক অনুষ্ঠান।
আনহাতে, জুবিনৰ জন্মদিনৰ প্ৰাক সন্ধ্যাটোত দীঘলীপুখুৰী পাৰত সচেতন নাগৰিকৰ উদ্যোগত আয়োজন কৰা হয় প্ৰকৃতিপ্ৰেমী জুবিনৰ নামত উৎসৰ্গিত এটি অনুষ্ঠান। জুবিন গাৰ্গৰ প্ৰকৃতিৰ প্ৰতি থকা মৰম, বিশেষকৈ গছ-গছনি সংৰক্ষণৰ প্ৰতি থকা তেওঁৰ আগ্ৰহ, দায়বদ্ধতা আৰু স্থিতিক তুলি ধৰি মহেশ ডেকাই নিৰ্মাণ কৰা এখনি চুটি তথ্যচিত্ৰও প্ৰদৰ্শন কৰা হয়।
কেইবাগৰাকীও শিল্পীয়ে এই অনুষ্ঠানত গীত পৰিৱেশন, কবিতা পাঠ আদি কৰাৰ লগতে জুবিনৰ আদৰ্শ প্ৰতিফলিত কৰা এখন বাটৰ নাটো প্ৰদৰ্শন কৰে।
জুবিন গাৰ্গ অবিহনে এই প্ৰথম জন্মদিনটো সমগ্ৰ অসম আৰু লগতে বাহিৰৰ সকলো অনুৰাগীয়ে আৱেগিকভাৱে উদযাপন কৰিছে।
