ক’ৰ’না প্ৰতিৰোধৰ বাবে জাৰি কৰা লকডাউন কিছু কিছু ক্ষেত্ৰত শিথিল হৈছে যদিও একেবাৰে যেন জৰুলা কৰি পেলাইছে ৰাজ্যৰ কৃষক সকলক।
ৰাজ্যৰ অনান্য প্ৰান্তৰ লগতে নগাঁৱৰ চামগুৰিৰ বান বিধ্বস্ত লাওখোৱা অঞ্চলৰ লগতে ৰূপহীহাটৰ বিভিন্ন ঠাইত কৃষকৰ মাজত এতিয়া সৃষ্টি হৈছে হাহাকাৰ পৰিস্থিতিৰ।
লাওখোৱাৰ ভূৰবন্ধাত পূৰ্বৰ দৰে কেচা শাক-পাচলি বিক্ৰী কৰিব নোৱাৰাত এতিয়া পথাৰতে নষ্ট হৈছে স্কোৱাচ, ভেণ্ডি, বেঙেনা, জলকীয়া ইত্যাদি।
বহু বিঘা ভূমিত কৰা স্কোৱাচ, বিলাহী, ৰঙালাওকে ধৰি বহু কেইবিধ পাচলি বিক্ৰী কৰিব নোৱাৰি কৃষকে নিজ হাতেৰে নষ্ট কৰি পেলাবলৈ বাধ্য হৈছে।
বেংক তথা বিত্তীয় প্ৰতিষ্ঠানৰ পৰা ঋণলৈ পাচলি খতি কৰি এইদৰে লোকচানত পৰা খেতিয়কসকলে অনাগত দিনত চৰম আৰ্থিক অনাটনৰ সন্মুখীন হ’ব বুলি আশংকা কৰিছে ।
ইফালে ৰূপহীহাটৰ ছাইদৰীয়াকে ধৰি বৃহত্তৰ অঞ্চলটোত শ শ বিঘা কৃষি ভূমিত বিনষ্ট হৈছে তৰমুজ খেতি।
অঞ্চলটোৰ অধিকাংশ খেতিয়ক তৰমুজৰ খেতিৰ ওপৰতেই নিৰ্ভৰশীল, তৰমুজৰ খেতি কৰিয়ে তেওঁলোকে পোহ-পাল দি আহিছিল নিজৰ ঘৰ-পৰিয়ালটি।
কিন্তু এইবাৰ লকডাউনৰ ফলত তৰমুজ খেতি পথাৰতে সমুলঞ্চে বিনষ্ট হোৱাত খেতিয়কসকলৰ পানীত হাঁহ নচৰা অৱস্থা হৈছে।
বিধ্বস্ত পথাৰৰ পৰাই চামগুৰি আৰু ৰূপহীহাটৰ দুৰ্ভগীয়া খেতিয়কসকলে তেওঁলোকক সকাহ দিয়াৰ বাবে উপযুক্ত ব্যৱস্থা গ্ৰহণ কৰিবলৈ ৰাজ্য চৰকাৰ তথা কৃষি বিভাগক অনুৰোধ জনায়।
