দিল্লী চ’লো কৃষক সমদলৰ অপ্ৰতিৰোধ্য গতিত থৰকাছুতি হেৰুৱাৰ উপক্ৰম হৈছে দিল্লী আৰক্ষীৰ।
ইতিমধ্যে পঞ্জাৱ-হাৰিয়ানা সীমান্ত অতিক্ৰম কৰি হাৰিয়ানা-দিল্লীৰ সীমান্ত কঁপাই তুলিছে হাজাৰ হাজাৰ কৃষকে।
হাজাৰ হাজাৰ কৃষকক ভেটা দিবলৈ দিল্লী আৰক্ষীয়ে অতি কঠোৰ তথা বৰ্বৰ পদক্ষেপ গ্ৰহণ কৰিছে।
ইফালে দিল্লী আৰক্ষীয়ে হাৰিয়ানা-দিল্লী সংযোগী সকলো পথ ছীল কৰি দিয়াৰ লগতে সীমান্তত মোতায়েন কৰি ৰাখিছে আৰক্ষীসহ বিশালসংখ্যক কেন্দ্ৰীয় সংৰক্ষিত নিৰাপত্তা বাহিনীৰ জোৱান।
প্ৰকাণ্ড প্ৰকাণ্ড ব’ল্ডাৰ পেলাই ইটোৰ লগত সিটোক শিকলিৰে মেৰিয়াই তলা লগাই ৰাজপথত পেলাই থোৱা হৈছে, যাতে কৃষক সমদলটোৱে ব’ল্ডাৰ আঁতৰাই টেক্টৰ পাৰ কৰাই দিল্লীৰ অভিমুখে আহিব নোৱাৰে।
লগতে পঢ়ক : পঞ্জাৱ-হাৰিয়ানা সীমান্তত অপ্ৰতিৰোধ্য কৃষক সমদল! : দলঙৰ পৰা বেৰিকেড নদীত পেলাই আহিছে আগুৱাই
আনহাতে কাটা তাঁৰ আৰু ফেন্সিং মেৰিয়াই বেৰিকেডেৰে ৰাজপথ ভেটা দি ৰাখিছে দিল্লী আৰক্ষীয়ে। এই প্ৰচণ্ড শীততো শীতল পানী ভৰ্তি তথা কন্দুৱা গেছৰ বাহনেৰে ঠাণ্ডা পানী আৰু কন্দুৱা গেছ নিক্ষেপ কৰা হৈছে কৃষকসকলৰ ওপৰত। জানিব পৰা মতে নলাৰ কদৰ্য আৰু বিষাক্ত পানীও নিক্ষেপ কৰা হৈছে কৃষকৰ ওপৰত।
তথাপিও স্তব্ধ হোৱা নাই কৃষকৰ দিল্লী অভিমুখী যাত্ৰা। অৱশেষত দিল্লী আৰক্ষীয়ে কৃষক সমদলক ছত্ৰভংগ দিয়াবলৈ আৰম্ভ কৰিছে ৰবৰৰ গুলীবৰ্ষণ।
তথাপিও ক্ষান্ত হোৱা নাই বিদ্ৰোহী কৃষকসকল। কৃষকৰ অপ্ৰতিৰোধ্য গতি ৰোধ কৰিব নোৱাৰি বিপাঙত পৰা দিল্লী আৰক্ষীয়ে কৃষকসকলক আটক কৰি ৰাখিবলৈ দিল্লীৰ ৯ খন ষ্টেডিয়াম বিচাৰি দিল্লী চৰকাৰৰ অনুমতি বিচাৰিছে।
ইপিনে দিল্লীৰ অৰবিন্দ কেজৰিৱাল চৰকাৰে দিল্লী আৰক্ষীৰ এই আবেদন অগ্ৰাহ্য কৰিছে। অৰ্থাৎ সমদলকাৰী কৃষকক আটক কৰি ৰাখিবলৈ দিল্লীৰ কেজৰিৱাল চৰকাৰে দিল্লী আৰক্ষী কডিটেনশ্যন কেম্প হিচাপে ষ্টেডিয়াম ব্যৱহাৰৰ অনুমতি দিয়া নাই। যাৰ ফলত দিল্লী আৰক্ষীয়ে সীমান্তত যিকোনো প্ৰকাৰে কৃষক সমদলটোক ভেটা দি ৰাখিবলৈ প্ৰাণপণে চেষ্টা কৰা দেখা গৈছে।
লগতে পঢ়ক : কৃষকক ভেটা দিবলৈ দিল্লী সীমান্ত ছীল : কৃষকৰ ওপৰত বৰ্বৰতাৰে শীতল পানী হিলৈ, কন্দুৱা গেছ প্ৰয়োগ
“সীমান্তৰ পৰিস্থিতি পৰ্যবেক্ষণ কৰাৰ পিছত সমদলকাৰী কৃষকসকলক আটক কৰি ৰাখিবলৈ আমাক বহু ঠাইৰ প্ৰয়োজন হ’ব। অৱেশ্যে আমি এতিয়াও নিশ্চিত হোৱা নাই।” দিল্লী আৰক্ষীৰ এজন জ্যেষ্ঠ আৰক্ষী বিষয়াই সংবাদ মাধ্যমৰ আগত কয়।
উল্লেখ্য যে কৃষি আইন প্ৰত্যাহাৰৰ দাবীত দেশৰ বিভিন্ন প্ৰান্তৰ কৃষকে ২৭ নৱেম্বৰত ‘দিল্লী চ’লো’ আহ্বানেৰে এক বিশাল প্ৰতিবাদী সমদলৰ আয়োজন কৰিছে।
এই আহ্বানৰ প্ৰতি সঁহাৰি জনায় দেশৰ বিভিন্ন প্ৰান্তৰ, বিশেষকৈ পঞ্জাৱ, হাৰিয়ানা, উত্তৰ প্ৰদেশ, উত্তৰাখণ্ড, ৰাজস্থান আৰু কেৰেলাৰ কৃষকসকলে দিল্লী অভিমুখে যাত্ৰা আৰম্ভ কৰিছে।
ইফালে ক’ৰ’ণাৰ দোহাই দি বিশাল কৃষক সমদলটোক ভেঁটিবলৈ দিল্লীৰ সকলো সীমান্ত ছীল কৰাৰ সিদ্ধান্ত গ্ৰহণ কৰিছিল কেন্দ্ৰীয় চৰকাৰে।
ইফালে কৃষক সংগঠসমূহে কেন্দ্ৰীয় চৰকাৰক প্ৰত্যাহ্বান জনায় কৈছে যে দিল্লী চৰকাৰে যন্তৰ মন্তৰলৈ তেওঁলোকক যোৱাত বাধা প্ৰদান কৰিলে দিল্লী-হাৰিয়ানাৰ সীমান্তৰ ৰাষ্ট্ৰীয় ঘাইপথতে ধৰ্ণাৰ কাৰ্যসূচী ৰূপায়ণ কৰিব।