ড’নাল্ড ট্ৰাম্পৰ পিছত FBI য়ে এইবাৰ স্বয়ং ৰাষ্ট্ৰপতি জো বিডেনৰ ঘৰত অভিযান চলাইছে। শনিবাৰে ১৩ ঘণ্টা ধৰি মাৰাথন তালাচী চলিছিল। তালাচীত আমেৰিকা যুক্তৰাষ্ট্ৰৰ ৰাষ্ট্ৰপতিৰ উইলমিংটনৰ বাসগৃহৰ পৰা আধা ডজন গোপনীয় নথি উদ্ধাৰ কৰা হৈছে। সেইবোৰ ইতিমধ্যে আমেৰিকা যুক্তৰাষ্ট্ৰৰ ন্যায়পালিকাক হস্তান্তৰ কৰা হৈছে। পৰৱৰ্তী নিৰ্বাচনৰ পূৰ্বে ডেমক্ৰেটসকলে এই তালাচীক লৈ শক্তিশালী আক্ৰমণৰ সন্মুখীন হ’ব লাগিব।
ইপিনে, বিডেনৰ অধিবক্তাই কৈছে যে এই গোপনীয় নথিপত্ৰবোৰ বহুত পুৰণি। আমেৰিকা যুক্তৰাষ্ট্ৰৰ ৰাষ্ট্ৰপতিয়েই এফবিআইক সেইবোৰ বিচাৰি উলিয়াবলৈকে তালাচী চলাবলৈ কৈছিল। তথাপি, এফবিআইৰ অভূতপূৰ্ব তালাচীয়ে আমেৰিকা যুক্তৰাষ্ট্ৰত এক আলোড়নৰ সৃষ্টি কৰিছে।
লগতে পঢ়ক: চীনক ৰঙা চকু দেখুৱাই ভাৰতৰ ‘প্ৰলয়’! এইবাৰ উত্তৰ-পূবৰ চীন সীমান্তত বায়ু সেনাৰ অনুশীলনৰ প্ৰস্তুতি
বাতৰি অনুসৰি, জো বিডেন চিনেটৰ আৰু উপ-ৰাষ্ট্ৰপতি হৈ থাকোতে উইলমিংটনৰ বাসগৃহৰ পৰা কাম কৰিছিল। এফবিআই-য়ে পুথিভঁৰালৰ পৰা সেই সময়ৰ ছয়খন নথি পত্ৰ উদ্ধাৰ কৰিছে যাৰ ওপৰত ‘শ্ৰেণীবদ্ধ’ বুলি লিখা আছে।
জানিব পৰা মতে, এফবিআইৰ ওচৰত এই তালাচীৰ বাবে হেনো কোনো চাৰ্চ ৱাৰেন্ট নাছিল। অৱশ্যে ৰাজনৈতিক মহলৰ ধাৰণা যে এই তালাচী অভিযানৰ গুৰুত্ব কম নহ’ব। আনহাতে, তেওঁলোকৰ বিশ্বাস যে ড’নাল্ড ট্ৰাম্পৰ দলে এই গুৰুত্বপূৰ্ণ নথি উদ্ধাৰ আৰু তালাচীক অস্ত্ৰ হিচাপ ব্যৱহাৰ কৰি ডেম’ক্ৰেটসকলৰ বিৰুদ্ধে প্ৰচাৰ অভিযানত ধুমুহাৰ সৃষ্টি কৰিব। মধ্যৱৰ্তী নিৰ্বাচনত ডেম’ক্ৰেটসকল বিপাঙত পৰিছিল। এনে পৰিস্থিতিত ৰিপাব্লিকানসকলৰ এই আক্ৰমণৰ ধুমুহা চম্ভালা তেওঁলোকৰ বাবে কঠিন হ’ব।
জো বিডেনৰ অধিবক্তা বব বাৱাৰে এক বিবৃতিত জনায় যে তালাচীৰ সময়ত বিডেন অনুপস্থিত আছিল। চিনেটৰ আৰু উপ-ৰাষ্ট্ৰপতি হিচাপে তেওঁৰ কাৰ্যকালৰ দস্তাবেজসমূহ উদ্ধাৰ কৰা হৈছে। এই সন্দৰ্ভত মন কৰিব লগীয়া যে বিডেন ডেলাৱেৰৰ চিনেটৰ (১৯৭৩-২০০৯) আছিল। বাৰাক অবামা ৰাষ্ট্ৰপতি হোৱাৰ সময়ত তেওঁ উপ ৰাষ্ট্ৰপতি আছিল। এই সময়ৰ নথিপত্ৰ জব্দ কৰা হৈছে। বিডেনৰ অধিবক্তাই কয় যে তেতিয়াৰ উপ ৰাষ্ট্ৰপতিয়ে ঘৰৰ পৰা বহুতো কাম কৰিছিল, সেয়েহে এই নথিপত্ৰ তাত ৰৈ গৈছে।
লগতে পঢ়ক: প্ৰেমত ঘুৰিছে ভূমণ্ডল! ৯৩ বছৰ বয়সত চতুৰ্থবাৰৰ বাবে বিবাহপাশত আৱদ্ধ হ’ল মহাকাশচাৰী বাজ এলড্ৰিন
এই সন্দৰ্ভত প্ৰতিক্ৰিয়া প্ৰকাশ কৰি জো বিডেনে কয়, “মোৰ অধিবক্তাই মোক যি কৰিবলৈ পৰামৰ্শ দিছে মই সেইটো অনুসৰণ কৰি আছোঁ।‘’ কিন্তু প্ৰশ্ন উত্থাপিত হ’বলৈ আৰম্ভ কৰিছে যে বিডেনে কিয় গুৰুত্বপূৰ্ণ চৰকাৰী নথিপত্ৰ তেওঁৰ ঘৰত ৰাখিছিল?