আজি ফিফা বিশ্বকাপ আৰু এছিয়া কাপৰ গুৰুত্বপূৰ্ণ কোৱালিফায়িং মেচত মুখামুখি হ’ব ভাৰত আৰু ওমান। গুৱাহাটীৰ সৰুসজাই ষ্টেডিয়ামত অনুষ্ঠিত হ’ব লগীয়া এই বহু প্ৰতিক্ষিত মেচখনৰ বাবে ইতিমধ্যে সাজু হৈ উঠিছে আয়োজক।
১০৩ নম্বৰ ফিফা ৰেংকিঙৰ অধিকাৰী ভাৰতৰ সন্মুখত ৮৭ নম্বৰৰ ওমান। যুঁজ কঠিন হ’ব যদিও প্ৰৱল আত্ম বিশ্বাসেৰে ভৰি আছে ভাৰতীয় শিবিৰ।
উল্লেখ্য যে ১৯৯৪ চনৰ পিছৰে পৰা ওমানৰ বিৰুদ্ধে খেলা ছখন আন্তঃৰাষ্ট্ৰীয় মেচত সফলতাৰ মুখ দেখা নাই ভাৰতে। দুখনত ড্ৰ আৰু চাৰিখনত পৰাস্ত। এই পৰিসংখ্যালৈ চালে আজিৰ হাইভল্টেজ মেচৰ ফেভাৰিট ওমান।
দুয়োটা দলে অন্তিমবাৰৰ বাবে ২০১৮ চনত এখন প্ৰীতি মেচত মুখামুখি হৈছিল। মেচখন ড্ৰ ৰূপে সমাপ্ত হৈছিল।
সুনীল চেত্ৰী নেতৃ্ত্বাধীন ভাৰতীয় দলৰ শেহতীয়া প্ৰদৰ্শন খুব সন্তোষজনক নহয় যদিও মেচখনত জয়ী হোৱাৰ বাবে দলে সৰ্বশক্তি প্ৰয়োগ কৰিব বুলি প্ৰশিক্ষক ইগ’ৰ ষ্টিমাকে জানিবলৈ দিয়ে।
ইফালে যোৱা ২৫ বছৰৰ ধাৰাবাহিকতা অক্ষুন্ন ৰখাৰ মানসিকতাৰে সৰুসজাইৰ ষ্টেডিয়ামত প্ৰৱেশ কৰিব ওমান। দলৰ উদ্দেশ্য কেৱল জয় বুলিয়ে মন্তব্য কৰে প্ৰশিক্ষক কোমেনে।
প্ৰথমবাৰৰ বাবে গুৱাহাটীত অনুষ্ঠিত হ’ব লগীয়া প্ৰাক বিশ্বকাপৰ মেচখনকলৈ ব্যাপক উচাহ দৰ্শকৰ মাজত। মেচখনৰ বাবে মুকলি কৰি দিয়া টিকট ইতিমধ্যে শেষ হৈ যোৱা বুলি প্ৰকাশ কৰিছে অসম ফুটবল সন্থাই।
গেলেৰী পৰিপূৰ্ণ দৰ্শকৰ হৰ্ষোল্লাসৰ মাজেৰে সন্ধিয়া ৭.৩০ বজাত আৰম্ভ হ’ব হাইভল্টেজ মেচখন। আৰু ভাৰতীয় ফুটবলৰ ইতিহাসত সন্নিবিষ্ট হ’ব সৰুসজাইৰ নাম।
