সোমবাৰে নিশা ঘোষণা কৰা কৰা হ’ল ২০২৩ বৰ্ষৰ ‘ফিফা দ্য বেষ্ট’ সন্মান। বিশ্ব ফুটবলৰ মুৰব্বী সংস্থা ফিফাৰ বৰ্ষশ্ৰেষ্ঠ সন্মানৰ শ্ৰেষ্ঠ পুৰুষ খেলুৱৈ হিচাপে বিবেচিত হয় ফুটবল বিশ্বৰ অবিসম্বাদী সম্ৰাট লিঅ’নেল মেছি।
বিশ্বকাপ বিজয়ী আৰ্জেণ্টাইন তাৰকাগৰাকীয়ে তীব্ৰ প্ৰতিদ্বন্দ্বিতাৰ অন্তত নৰৱে’ তথা মানচেষ্টাৰ চিটিৰ তাৰকা আৰ্লিং হালাণ্ডক অতিক্ৰমি তৃতীয়বাৰৰ বাবে ফিফাৰ বৰ্ষশ্ৰেষ্ঠ পুৰুষ খেলুৱৈৰ সন্মান লাভ কৰে।
পুৰুষৰ শাখাত মেছি শ্ৰেষ্ঠ বিবেচিত হোৱাৰ বিপৰীতে মহিলাৰ শাষাত বৰ্ষশ্ৰেষ্ঠ খেলুৱৈৰ সন্মান লাভ কৰে স্পেইন তথা বাৰ্চিলোনাৰ তাৰকা আইতানা ব’নমাটিয়ে। লক্ষণীয়ভাৱে দুয়োগৰাকী তাৰকাই ২০২৩ বৰ্ষৰ বেলন ডি অ’ৰ সন্মানো লাভ কৰিছিল।
মানচেষ্টাৰ চিটিৰ ট্ৰেবল বিজয়ী প্ৰশিক্ষক পেপ গুৱাৰ্ডিঅ’লাই পুৰুষৰ শ্ৰেষ্ঠ প্ৰশিক্ষক বঁটা লাভ কৰাৰ বিপৰীতে ইংলেণ্ডৰ প্ৰশিক্ষক ছাৰিনা উইগমেনে অভিলেখ চতুৰ্থবাৰৰ বাবে মহিলাৰ শ্ৰেষ্ঠ প্ৰশিক্ষকৰ বঁটা লাভ কৰে।
ইফালে ব্ৰাজিলিয়ান তাৰকা তথা মানচেষ্টাৰ চিটিৰ এডাৰছনে পুৰুষৰ শ্ৰেষ্ঠ গ’লৰক্ষকৰ বঁটা লাভ কৰাৰ বিপৰীতে মানচেষ্টাৰ ইউনাইটেড আৰু ইংলেণ্ডৰ মেৰী ইয়াৰপছে মহিলাৰ শাখাত শ্ৰেষ্ঠ গলৰক্ষক হিচাপে বিবেচিত হয়।
উল্লেখ যে মেছিয়ে বিগত ছিজনত পেৰিছ চেণ্ট জাৰ্মেইনৰ সৈতে লিগ ১ খিতাপ জয় কৰাৰ পিছত মেজৰ লীগ ছকাৰত ইণ্টাৰ মিয়ামীক লীগ কাপ জয় কৰাত সহায় কৰিছিল। আনহাতে মেছিৰ নিকটতম প্ৰতিদ্বন্দী হালাণ্ড যোৱা ছিজনত আছিল দুৰন্ত ফৰ্মত।
মানচেষ্টাৰ চিটিৰ হৈ ট্ৰেবল (প্ৰিমিয়াৰ লীগ, চেম্পিয়ন্ছ লীগ আৰু এফ এ কাপ) বিজয়ী হালাণ্ডে যোৱা ছিজনতম স্ক’ৰ কৰিছিল ৫২টা গ’ল। ফিফাৰ ৰেটিং ব্যৱস্থাত মেছি আৰু হালাণ্ড, দুয়োগৰাকীয়েই ৪৮ পইণ্ট লাভ কৰিছিল।
কিন্তু ৰাষ্ট্ৰীয় দলৰ অধিনায়কসকলৰ দ্বাৰা অধিক ভোট লাভ কৰাৰ বাবে মেছি শ্ৰেষ্ঠ বিবেচিত হয়। উল্লেখ্য যে ভাৰতীয় অধিনায়ক সুনীল ছেত্ৰীয়েও বৰ্ষশ্ৰেষ্ঠ খেলুৱৈৰ বাবে মেছিক ভোট দিয়ে। ৩৫ পইণ্টেৰে ফৰাচী তাৰকা এমবাপে থাকে তৃতীয় স্থানত।
লক্ষণীয়ভাৱে মেছিয়ে হালাণ্ডক দিয়ে নিজৰ ভোট। ব্ৰাজিলে ফিফা ফেয়াৰ প্লে বঁটা লাভ কৰাৰ বিপৰীতে পুস্কাছ বঁটা লাভ কৰে ব্ৰাজিলৰ খেলুৱৈ তথা ক্লাৱ ফুটবলত ইটালিয়ান ক্লাৱ বটাফ’গ’ক প্ৰতিনিদ্হিত্ব কৰা গুইলাৰ্ম মাড্ৰাগাই।
