ভাৰতত ক’ৰ’না ভাইৰাছৰ অন্যতম কেন্দ্ৰ হিচাবে পৰিগণিত হোৱা মহাৰাষ্ট্ৰত কালি ৰাজ্য খনৰ চৰকাৰে ১৫ দিনৰ বাবে জনতা কাৰ্ফিউ ঘোষণা কৰিছে।
ক’ৰ’না ভাইৰাছৰ অধিক সংক্ৰমণ ৰোধ কৰাৰ বাবেই এনে কঠোৰ ব্যৱ্স্থা গ্ৰহণ কৰিবলৈ বাধ্য হৈছে মহাৰাষ্ট্ৰৰ উদ্ধৱ থাকৰে নেতৃত্বাধীন চৰকাৰখনে।
জনতা কাৰ্ফিউ ঘোষণা কৰাৰ ফলত স্তব্ধ হৈ পৰিছে দেশৰ বাণিজ্যিক ৰাজধানী স্বৰূপ মুম্বাই মহানগৰীও।
দেশৰ চলচ্চিত্ৰ জগতৰ অভিকেন্দ্ৰ বলীউডলৈও নামি আহিছে স্থৱিৰতা।
বন্ধ হৈ পৰিছে সকলো ছবিৰ শ্বুটিং। তথাপি হতাশ হোৱা নাই বলীউডৰ শিল্পী-কলা-কুশলীসকল।
মহাৰাষ্ট্ৰৰ চৰকাৰে ক’ৰ’না প্ৰতিৰোধ কৰাৰ বাবে জাৰি কৰা জনতা কাৰ্ফিউলৈ পূৰ্ণ সমৰ্থন আগবঢ়াইছে বলীউডৰ ছবি উদ্যোগে।
চলচ্চিত্ৰ সমন্বয়ৰক্ষী সমিতিয়ে চৰকাৰে ঘোষণা কৰা জনতা কাৰ্ফিউলৈ সমৰ্থন জনাই কৈছে যে ক’ৰ’না ভাইৰাছৰ সংক্ৰমণ ৰোধ কৰাৰ বাবে ইয়াৰ বাদে গ্ৰহণ কৰিব পৰা আন বিকল্প ব্যৱস্থা নাছিল।
জনতা কাৰ্ফিউৰ প্ৰতি সমৰ্থন ব্যক্ত কৰি চলচ্চিত্ৰ সমন্বয়ৰক্ষী সমিতিৰ শীৰ্ষ পদাধিকাৰ অশোক ডুবেই কৈছে যে এই সময়ছোৱাত চৰকাৰে দিন হাজিৰা কৰা লোক আৰু নিৰ্মাণ খণ্ডৰ সৈতে জৰিত শ্ৰমিকসকলক সাহায্য প্ৰদান কৰিব বুলি কৰা ঘোষণা আদৰণীয়।
তেওঁ চৰকাৰক বলীউডৰ ছবি উদ্যোগত দৈনিক মজুৰিৰ ভিত্তিত কাম কৰা লোকসকলকো সহায় কৰিবলৈ চৰকাৰক আহ্বান জনায়।