বিত্ত আৰু সমাজ কল্যান মন্ত্ৰী অজন্তা নেওগে শনিবাৰে গোলাঘাট পৌৰ সভাৰ ১৩ নং ৱাৰ্ডৰ চন্দন নগৰত প্ৰধানমন্ত্ৰী আৱাস যোজনা (নগৰ)ৰ প্ৰদীপ সন্দিকৈ নামৰ হিতাধিকাৰীজনৰ নৱনিৰ্মিত গৃহটোৰ গৃহ প্ৰৱেশ অনুষ্ঠানত অংশগ্ৰহণ কৰে।
তেওঁ কয় যে এই আঁচনিৰ অধীনত গোলাঘাট নগৰত এতিয়ালৈকে ৫৯০ টা ঘৰৰ অনুমোদন লাভ কৰিছে। ইয়াৰে ৬০ শতাংশ হিতাধিকাৰীয়ে প্ৰথম কিস্তিৰ ধন লাভ কৰিছে আৰু ১৪৭ জনে আচঁনিখনৰ দ্বিতীয় কিস্তিৰ ধনো লাভ কৰিছে।
প্ৰধানমন্ত্ৰী নৰেন্দ্ৰ মোদী চৰকাৰখনে দুখীয়া ৰাইজৰ কল্যানৰ বাবে ভালেখিনি উন্নয়নমূলক পদক্ষেপ গ্ৰহণ কৰিছে বুলিও তেওঁ উল্লেখ কৰে।
তেওঁ লগতে প্ৰধানমন্ত্ৰী আৱাস যোজনাৰ অধীনত প্ৰথম কিস্তিৰ ধন লাভ কৰা লোকসকলক সোনকালে এই ধন খৰছ কৰিবলৈ আহ্বান জনায় যাতে তেওঁলোকে অচিৰেই দ্বিতীয় কিস্তিৰ ধনো লাভ কৰে।
আনহাতে, বৰ্তমান এই আঁচনিৰ অধীনত গৃহৰ বাবে যিসকলে আবেদন কৰিছে যোগ্য প্ৰতিজন লোকে গৃহ লাভ কৰিব বুলি তেওঁ আশ্বাস দিয়ে।
উল্লেখযোগ্য যে হিতাধিকাৰীগৰাকীয়ে এই আঁচনিৰ অধীনত লাভ কৰা ২লাখ টকাৰ লগতে নিজেও কিছু ধন ব্যয় কৰি এই গৃহটো নিৰ্মাণ কৰি উলিয়াইছে।
এই অনুষ্ঠানত গোলাঘাট সদৰৰ মহকুমাধিপতি ডঃ সংগীতা বৰঠাকুৰ আৰু জিলা প্ৰশাসনৰ কেইবাগৰাকীও বিষয়া উপস্থিত আছিল।
