উত্তৰ পূৰ্বাঞ্চলৰ উদ্যোগ আৰু বাণিজ্য ফেডাৰেচনে (ফাইনাৰ) ঘোষণা কৰিছে উত্তৰ-পূব নৱীকৰণযোগ্য শক্তি আৰু বৈদ্যুতিক বাহন প্ৰদৰ্শনী (নাৰ্ভ ২০২৫)ৰ দ্বিতীয় সংস্কৰণ। এই প্ৰদৰ্শনীখন ২১ নৱেম্বৰৰ পৰা ২৩ নৱেম্বৰ ২০২৫লৈকে গুৱাহাটীৰ সৰুসজাই ষ্টেডিয়ামত পুৱা ১০ বজাৰ পৰা সন্ধিয়া ৭ বজালৈ অনুষ্ঠিত হ‘ব। পূৰ্বৰ নাৰ্ভ ২০২৪ৰ বৃহৎ সফলতাৰ পিছত, এই দ্বিতীয় সংস্কৰণ অধিক ব্যাপক, অধিক গতিশীল আৰু অধিক প্ৰভাৱশালী হ‘ব বুলি আশা কৰা হৈছে, য‘ত নৱীকৰণযোগ্য শক্তি আৰু ই-মবিলিটিৰ পৰিৱেশ তন্ত্ৰৰ ৰাষ্ট্ৰীয় আৰু আঞ্চলিক অংশীদাৰসকল একত্ৰিত হ‘ব।
উল্লেখ্য যে, নাৰ্ভ ২০২৫ৰ লক্ষ্য হৈছে উত্তৰ-পূৰ্বাঞ্চলত নৱীকৰণযোগ্য শক্তি গ্ৰহণ আৰু বৈদ্যুতিক গতিশীলতাৰ বিকাশ ত্বৰান্বিত কৰাৰ বাবে এক বিস্তৃত মঞ্চ প্ৰদান কৰা। এই প্ৰদৰ্শনীয়ে ভাৰতৰ স্বচ্ছ শক্তি ৰোডমেপত এই অঞ্চলটোৰ কৌশলগত গুৰুত্বক উজ্জ্বল কৰি তুলিব।
ভাৰত চৰকাৰৰ নৱ আৰু নৱীকৰণযোগ্য শক্তি মন্ত্ৰালয়, ক্ষুদ্ৰ, লঘু আৰু মজলীয়া উদ্যোগ মন্ত্ৰালয়, পথ পৰিবহন আৰু ঘাইপথ মন্ত্ৰালয় আৰু শক্তি মন্ত্ৰালয়ৰ সমৰ্থন লাভ কৰিছে এই অনুষ্ঠানটিয়ে। নাৰ্ভ ২০২৫-এ ভাৰতৰ স্বচ্ছ প্ৰযুক্তি ৰূপান্তৰত উত্তৰ-পূৰ্বাঞ্চলৰ উদীয়মান ভূমিকাক গুৰুত্ব প্ৰদান কৰে।
ইফালে, এই বছৰৰ প্ৰদৰ্শনীখনত ৭০টা অংশগ্ৰহণকাৰী কোম্পানী আৰু ১২০টা প্ৰদৰ্শনী ষ্টল থাকিব। নতুন তথা আহিবলগীয়া মডেলসমূহ প্ৰদৰ্শন কৰিবলৈ বৈদ্যুতিক বাহন নিৰ্মাতাসকলৰ বাবে এক বিশেষ মুকলি প্ৰদৰ্শনী ক্ষেত্ৰ সৃষ্টি কৰা হৈছে। এই তিনিদিনীয়া কাৰ্যসূচীত নীতি আলোচনা, কাৰিকৰী সন্মিলন, জ্ঞানৰ অধিৱেশন আৰু বি২বি/বি২জি বৈঠক অনুষ্ঠিত হ‘ব, যাৰ ফলত উদ্যোগ, চৰকাৰ, শিক্ষাবিদ আৰু উদ্ভাৱকসকলৰ মাজত সহযোগিতাৰ ব্যাপক সুযোগ সৃষ্টি কৰিব পৰা যাব।
নাৰ্ভ ২০২৫ৰ এক মুখ্য গুৰুত্ব হৈছে উত্তৰ-পূৰ্বাঞ্চলৰ উদ্যোগী আৰু ষ্টাৰ্টআপসমূহক শক্তিশালী কৰা। এই প্ৰদৰ্শনীয়ে উদীয়মান প্ৰযুক্তি, বজাৰৰ ধাৰা, আৰু কেন্দ্ৰীয় মন্ত্ৰালয়, ৰাজহুৱা খণ্ডৰ উদ্যোগ আৰু আগশাৰীৰ কোম্পানীসমূহৰ সৈতে পোনপটীয়া মত বিনিময়ৰ সুযোগ আগবঢ়াব। এই জ্ঞানৰ অধিৱেশনসমূহে ক্ষমতা-নিৰ্মাণ আৰু দক্ষতা বিকাশতো অধিক সহায় আগবঢ়াব।
এই পদক্ষেপৰ জৰিয়তে ফাইনাৰ-এ উদ্যোগীকৰণক প্ৰতিপালিত কৰা, উদ্যোগৰ বিকাশ আগুৱাই নিয়া আৰু ভাৰতৰ বহনক্ষম বিকাশৰ দৃষ্টিভংগীত অঞ্চলটোৰ অৱদান শক্তিশালী কৰাৰ প্ৰতি নিজৰ দায়বদ্ধতাক পুনৰ দৃঢ় কৰিছে।
