ৰাজ্যৰ মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে গুৱাহাটীৰ লতাশিল আৰক্ষী থানাত এখন এজাহাৰ দাখিল কৰিছে ‘দ্য অসম চিভিল ছ’চাইটি’ নামৰ সংগঠনটোৱে। মুখ্যমন্ত্ৰীগৰাকীয়ে বিগত কিছুদিন ধৰি সংবাদ মাধ্যমৰ আগত বংগমূলীয় অসমীয়া মুছলমানসকলৰ বিৰুদ্ধে ধাৰাবাহিকভাৱে বিদ্বেষমূলক আৰু প্ৰৰোচনামূলক মন্তব্য আগবঢ়াই অহাৰ অভিযোগ তুলি সোমবাৰে এই এজাহাৰ দাখিল কৰা হয়।
অসম চিভিল ছ’চাইটিৰ সভাপতি তথা জ্যেষ্ঠ অধিবক্তা হাফিজ ৰছিদ আহমেদ চৌধুৰী, কাৰ্যকৰী সভাপতি অধ্যাপক আব্দুল মান্নান আৰু কাৰ্যনিৰ্বাহক সদস্য আব্দুৰ ৰহিম শিকদাৰে সোমবাৰে বিয়লি লতাশিল থানাত উপস্থিত হৈ এই এজাহাৰ দাখিল কৰে। লতাশিল থানাৰ ভাৰপ্ৰাপ্ত বিষয়াই GDE No. 25, Dated 02/02/2026 যোগে এজাহাৰখন গ্ৰহণ কৰিছে। জানিব পৰা মতে, বিভিন্ন বাতৰি কাকতৰ প্ৰতিলিপি আৰু মুখ্যমন্ত্ৰীৰ ভাষণৰ ভিডিঅ’ ক্লিপ থকা এটা পেনড্ৰাইভসহ মুঠ ১৮ পৃষ্ঠাৰ এক বিস্তৃত নথি আৰক্ষীক জমা দিয়া হৈছে।
এজাহাৰখনত অভিযোগ কৰা হৈছে যে যোৱা ২৪ জানুৱাৰীৰ পৰা ২৯ জানুৱাৰীৰ ভিতৰত মুখ্যমন্ত্ৰী ড৹ শৰ্মাই বিভিন্ন ছপা আৰু ইলেক্ট্ৰনিক সংবাদ মাধ্যমৰ সন্মুখত ‘মিঞা’ বুলি সম্বোধন কৰি এটা বিশেষ সম্প্ৰদায়ৰ বিৰুদ্ধে শত্ৰুতা আৰু ঘৃণা বিয়পোৱাৰ উদ্দেশ্যে ইচ্ছাকৃতভাৱে সাম্প্ৰদায়িক মন্তব্য কৰিছিল। সংগঠনটোৰ মতে, মুখ্যমন্ত্ৰীৰ এনে ঘৃণাসূচক ভাষণে ৰাজ্যখনৰ ৰাজহুৱা শান্তি আৰু সাম্প্ৰদায়িক সংহতি বিঘ্নিত কৰিছে।
তদুপৰি, এই ভাষণৰ দ্বাৰা প্ৰৰোচিত হৈ ৰাজ্যৰ বিভিন্ন প্ৰান্তত উক্ত জনগোষ্ঠীটোৰ লোকসকলক হাৰাশাস্তি আৰু ভীতি প্ৰদৰ্শন কৰাৰ বাতৰিও সংবাদ মাধ্যমত প্ৰকাশ পাইছে বুলি এজাহাৰত উল্লেখ কৰা হৈছে।
অসম চিভিল ছ’চাইটিয়ে দাবী কৰিছে যে মুখ্যমন্ত্ৰীৰ এনে কাৰ্য ভাৰতীয় ন্যায় সংহিতা (BNS)-ৰ ১৯২, ১৯৬, ১৯৭, ২৯৯, ৩০২ আৰু ৩৫৩ ধাৰাৰ অধীনত শাস্তিযোগ্য অপৰাধ। ইয়াৰ উপৰি, অসম চিভিল ছ’চাইটিয়ে এজাহাৰখনত উচ্চতম ন্যায়ালয়ৰ শেহতীয়া কঠোৰ নিৰ্দেশনাৰ কথাও সোঁৱৰাই দিয়ে। ৰাজহুৱা শান্তি আৰু আইন-শৃংখলা ৰক্ষাৰ স্বাৰ্থত উচ্চতম ন্যায়ালয়ে ঘৃণাসূচক ভাষণৰ বিৰুদ্ধে আৰক্ষীক স্বতঃস্ফূৰ্তভাৱে ব্যৱস্থা গ্ৰহণৰ নিৰ্দেশ দিছিল। সেই নিৰ্দেশনাৰ আলম লৈয়ে লতাশিল থানাৰ ভাৰপ্ৰাপ্ত বিষয়াক মুখ্যমন্ত্ৰীৰ বিৰুদ্ধে গোচৰ পঞ্জীয়ন কৰি বিহিত ব্যৱস্থা গ্ৰহণ কৰিবলৈ সংগঠনটোৱে অনুৰোধ জনাইছে।
