পশ্চিম বংগৰ প্ৰাক্তন মুখ্যমন্ত্ৰী মমতা বেনাৰ্জী পুনৰ এবাৰ ডাঙৰ ৰাজনৈতিক বিতৰ্কৰ মাজত সোমাই পৰিছে। অলপতে ৰাজ্যখনত চলি থকা প্ৰতিবাদ আৰু ৰাজনৈতিক সংঘাতৰ মাজতে তেওঁৰ মন্তব্যক লৈ বিতৰ্ক তীব্ৰতৰ হৈ পৰিছে। এইবাৰ কেন্দ্ৰীয় গৃহ মন্ত্ৰালয়ৰ বিৰুদ্ধে উচটনিমূলক মন্তব্য কৰাৰ অভিযোগত তেওঁৰ বিৰুদ্ধে এখন এজাহাৰ ৰুজু কৰা হৈছে। কলকাতাৰ এক প্ৰতিবাদী সভাত তেওঁ দিয়া বক্তব্যৰ বাবেই এই গোচৰ ৰুজু হৈছে আৰু আৰক্ষীয়ে অভিযোগ লাভ কৰাৰ পিছত তদন্ত প্ৰক্ৰিয়া আৰম্ভ কৰিছে।
শিলিগুৰি চাইবাৰ ক্ৰাইম আৰক্ষী থানাত দাখিল কৰা অভিযোগ অনুসৰি, মমতা বেনাৰ্জীয়ে যোৱা দুই জুনত কলকাতাৰ ৰাণী ৰশ্মণি ৰোডত আয়োজিত এক প্ৰতিবাদী কাৰ্যসূচীত এনে এক বক্তব্য দিছিল, যিটো বক্তব্যক অভিযোগকাৰীয়ে উচটনিমূলক বুলি অভিহিত কৰিছে। এই অভিযোগ অধিবক্তা ৰিংকী সেন চেটাৰ্জীয়ে দাখিল কৰিছে। অভিযোগ অনুসৰি, মমতা বেনাৰ্জীয়ে বাংলাদেশী নাগৰিক উচমান হাদীৰ হত্যাকাণ্ডৰ কথা উল্লেখ কৰি কেন্দ্ৰীয় গৃহ মন্ত্ৰালয় আৰু কেন্দ্ৰীয় গৃহমন্ত্ৰী অমিত শ্বাহৰ বিৰুদ্ধে পৰোক্ষভাৱে গুৰুতৰ অভিযোগ উত্থাপন কৰিছিল।
মমতা বেনাৰ্জীয়ে নিজৰ ভাষণত কৈছিল যে এই হত্যাকাণ্ড আন এখন দেশত হৈছিল, কিন্তু ইয়াৰ আঁৰত কোন লোক আছিল তেওঁ ভালদৰে জানে। তেওঁ দাবী কৰিছিল যে অপৰাধীসকল সীমান্ত পাৰ হৈ ভাৰতত প্ৰৱেশ কৰিছিল আৰু পিছত পশ্চিম বংগৰ স্পেচিয়েল টাস্ক ফৰ্চে তেওঁলোকক গ্ৰেপ্তাৰ কৰে। অভিযোগকাৰীৰ মতে, এনে ধৰণৰ মন্তব্যই ভাৰত আৰু বাংলাদেশৰ মাজৰ দ্বিপাক্ষিক সম্পৰ্কত বিৰূপ প্ৰভাৱ পেলাব পাৰে। আনহাতে তৃণমূল কংগ্ৰেছৰ ভিতৰচৰাত চলি থকা সংঘাতৰ মাজতে মমতা বেনাৰ্জীয়ে দলৰ সকলো কমিটি আৰু সংগঠন ভংগ কৰি এক ডাঙৰ পদক্ষেপ গ্ৰহণ কৰিছে। এই সমগ্ৰ ইছ্যুটোক লৈ বিজেপি নেতাসকলে তৃণমূল কংগ্ৰেছক তীব্ৰ সমালোচনা কৰাৰ বিপৰীতে তৃণমূলৰ নেতাসকলে ইয়াক বিৰোধীৰ ৰাজনৈতিক প্ৰতিশোধ বুলিহে অভিহিত কৰিছে।
এই এজাহাৰ ৰুজু হোৱাৰ পিছত পশ্চিম বংগৰ ৰাজনীতিত অভিযোগ আৰু প্ৰতি-অভিযোগৰ পৰিৱেশ অধিক উত্তপ্ত হৈ পৰিছে। অলপতে ৰাজ্যখনত ঘটা কেইবাটাও ৰাজনৈতিক ঘটনা আৰু প্ৰতিবাদৰ বাবে পৰিৱেশ ইতিমধ্যে উত্তপ্ত হৈ আছিল। ৰাজনৈতিক বিশ্লেষকসকলৰ মতে, আগন্তুক সময়ত এই গোচৰে অধিক ৰাজনৈতিক বিতৰ্কৰ সৃষ্টি কৰিব পাৰে। বৰ্তমান আৰক্ষীয়ে আইনী প্ৰক্ৰিয়া অনুসৰি সকলো বক্তব্য আৰু অভিযোগৰ সৈতে জড়িত তথ্যসমূহ পুঙ্খানুপুঙ্খভাৱে পৰীক্ষা কৰি আছে।
