সমগ্ৰ দেশতে বৃদ্ধি পাইছে প্ৰদূষণৰ মাত্ৰা। দেশৰ প্ৰদূষিত চহৰ সমূহৰ ভিতৰত আগস্থানত আছে দেশৰ ৰাজধানী দিল্লী।
সেয়েহে দিল্লী চৰকাৰে নিষিদ্ধ কৰিছে সকলো ধৰণৰ আতচবাজী। দিল্লীত এইবাৰ কোনেও ফুটাব নোৱাৰিব বোমা-ফটকা। আনকি বিক্ৰীতো কঠোৰ নিষেধাজ্ঞা জাৰি কৰিছে প্ৰশাসনে।
অহা ১ জানুৱাৰীলৈকে দিল্লী চহৰত কোনোধৰণৰ আতচবাজী বিক্ৰী কৰিব নোৱাৰিব। দিল্লী প্ৰদূষণ নিয়ন্ত্ৰণ সমিতিয়েও এই সন্দৰ্ভত এক অধিসূচনা জাৰি কৰিছে।
প্ৰদূষণ নিয়ন্ত্ৰণ সমিতিয়ে বিবৃতিত উল্লেখ কৰা মতে, কেৱল বিক্ৰীয়েই নহয়, আতচবাজীৰ উৎপাদন, মজুতকৰণ আদিৰ ওপৰতো নিষেধাজ্ঞা জাৰি কৰা হৈছে।
সোমবাৰে দিল্লীৰ পৰিৱেশ মন্ত্ৰী গোপাল ৰয়ে নিজৰ এক্স হেণ্ডেলত লিখিছে যে ২০২৫ চনৰ ১ জানুৱাৰীলৈকে সকলো ধৰণৰ আতচবাজী উৎপাদন, ব্যৱহাৰ আৰু বিক্ৰী নিষিদ্ধ কৰা হৈছে। দিল্লীত শীতকালত প্ৰদূষণৰ মাত্ৰা বৃদ্ধি পায়। সেয়েহে তেওঁ দিল্লীবাসীক পৰিৱেশ ৰক্ষাৰ বাবে আগবাঢ়ি আহিবলৈ আহ্বান জনাইছে।
উল্লেখ্য যে কেৱল কালি পূজা বা দশহৰাতেই নহয়, নৱবৰ্ষতো এইবাৰ দিল্লীত আতচবাজী ফুটাব নোৱাৰিব৷
পৰিসংখ্যাই দেখুৱাইছে যে দশহৰাৰ পিছত দিল্লীৰ বায়ুৰ গুণাগুণ অৱনতি ঘটিবলৈ আৰম্ভ কৰে। যোৱা বছৰ দিল্লীৰ বায়ুৰ গুণাগুণ সূচকাংকই (AQI) ১০০০ৰ সীমা অতিক্ৰম কৰিছিল। যিটো অতি বিপদজনক বুলি গণ্য কৰা হয়।
বিশেষজ্ঞসকলে কয় যে আাতচবাজীৰ ফলত ওলোৱা ধূলিৰ কণাবোৰত নাইট্ৰেট, কাৰ্বন আদি বিভিন্ন বিষাক্ত পদাৰ্থ থাকে। এইবোৰে তেজৰ লগতে ধমনীত প্ৰৱেশ কৰি তেজৰ সোঁত বন্ধ কৰি দিয়ে। ফলত উচ্চ ৰক্তচাপৰ সম্ভাৱনা বৃদ্ধি পায়। পলিচিষ্টিক অভাৰী চিনড্ৰম, ডায়েবেটিছ, হাইপোথাইৰয়ডিজম আদি ৰোগো আতচবাজীৰ প্ৰদূষণে বৃদ্ধি কৰিব পাৰে।
