বিশ্বনাথ আঞ্চলিক ব্ৰহ্মপুত্ৰ মৎস্যজীৱি সমিতিৰ উদ্যোগত বিশ্বনাথ ঘাটৰ নাট্য মন্দিৰ প্ৰাংগণত আজি অনুষ্ঠিত হয় এখনি গুৰুত্বপূৰ্ণ বিশাল ৰাজহুৱা সভা ।
বিগত সময়ছোৱাত বন বিভাগে কাজিৰঙা ৰাষ্ট্ৰীয় উদ্যানৰ উত্তৰ পাৰত জীৱন নিৰ্বাহ কৰি অহা মৎস্যজীৱি লোকসকলক ব্ৰহ্মপুত্ৰ নদীত পূৰ্বৰে পৰা মৎস্যৰ ওপৰত নিৰ্ভৰ কৰি অহা লোকসকলক হঠাৎ মাছ ধৰাত বাধা আৰোপ কৰাৰ বিৰুদ্ধেগৰজি উঠিছে ব্ৰহ্মপুত্ৰৰ নৈপৰীয়া লোকসকল ।
তাৰে পৰিপ্ৰেক্ষিতত আজি বিশ্বনাথ ঘাটৰ নাট্য মন্দিৰ প্ৰাংগনত এখনি গুৰুত্বপূৰ্ণ আলোচনা অনুষ্ঠিত হয় ।
য’ত উপস্থিত থাকে সদৌ অসম অনুসুচিত জাতি যুৱ ছাত্ৰ সন্থাৰ কেন্দ্ৰীয় সভাপতি নৃপেন দাস, কেন্দ্ৰীয় সাংগঠনিক সম্পাদক বিজয় দাস ,বিশ্বনাথ জিলাৰ সভাপতি সিংহজিৎ হাজৰিকা, সদৌ অসম ছাত্ৰ সন্থাৰ কেন্দ্ৰীয় কাৰ্যনিৰ্বাহক সদস্য ৰূপম দাস, সহ বহু কেইজন বিশিষ্ট ব্যক্তি ।
স্থানীয় যুৱক তথা বিশ্বনাথ ঘাট কৈৱৰ্ত অনুসুচিত জাতি আঞ্চলিক সমিতিৰ সম্পাদক বিশ্বজিৎ দাসে আঁত ধৰা অনুষ্ঠানটিত সভাপতিত্ব কৰে বিশ্বনাথ ঘাট কৈৱৰ্ত অনুসুচিত জাতি আঞ্চলিক সমিতিৰ সভাপতি গদাপাণি দাসে ।
সভাত মাছমৰীয়া সকলে দীৰ্ঘদিনীৰ পৰা সন্মুখীন হ’ব লগা বিভিন্ন সমস্যা সন্দৰ্ভত আইনীভাৱে কেনেকৈ সঠিক ফলাফল পাব পাৰি সেই বিষয়ে বিষদভাৱে আলোচনা কৰে।
লগতে আগন্তুক দিনত কাজিৰঙা ৰাষ্ট্ৰীয় উদ্যানৰ উত্তৰ পাৰৰ বৃহৎ অঞ্চলৰ ৰাইজে ব্ৰহ্মপুত্ৰৰ বুকুত মাছ ধৰাৰ ক্ষেত্ৰত যি বাধা আৰোপ কৰি আহিছে সেই আইন প্ৰত্যাহাৰ কৰাৰ বাবে অনাগত দিনত কেনেধৰণৰ পৰিকল্পনাৰ মাজেৰে আগুৱাই যাব পাৰি সেই সন্দৰ্ভতো কেতবোৰ গুৰুত্বপূৰ্ণ প্ৰস্তাৱ গ্ৰহণ কৰা হয় ।
প্ৰস্তাৱ সমূহ হ’ল অসমৰ সকলো অনুসুচিত জাতিৰ মন্ত্ৰী বিধায়কৰ সহ উত্তৰ পাৰৰ মন্ত্ৰী- বিধায়ক সকলৰ সৈতে লগ লাগি এলানি আলোচনা কৰি সদনত উক্ত বিষয়টি উত্থাপন কৰি আইন খন বাতিল কৰিব লাগিব ।
সমস্যা সমাধান নোহোৱা পৰ্যন্ত গণতান্ত্ৰিক প্ৰক্ৰিয়াৰে সকলো একত্ৰিত হৈ প্ৰতিবাদী কাৰ্যসূচী ৰূপায়ন কৰিবলৈ আগবাঢ়ি আহিব লাগিব ।
তাৎক্ষণিক ভাৱে বিশ্বনাথ জিলা উপায়ুক্তৰ হস্তক্ষেপত কাজিৰঙা ৰাষ্ট্ৰীয় উদ্যানৰ সঞ্চালকৰ উপস্থিতিত বিশ্বনাথ জিলা উপায়ুক্ত কাৰ্যালয়ত এখন ত্ৰিপাক্ষিক বৈঠক অনুষ্ঠিত হ’ব লাগিব ।
মাছমৰীয়া সকলৰ পুন: সংস্থাপন নকৰা পৰ্যন্ত ষষ্ঠ সংযোজনৰ সীমা বৃদ্ধি সিন্ধান্ত কেতিয়াও মানি লোৱা নহ’ব বুলি আলোচনাত প্ৰস্তাৱ গ্ৰহণ কৰে ।
উল্লেখ্য যে এই আলোচনা চক্ৰত বিশ্বনাথৰ পৰা গহপুৰলৈকে অন্তৰ্গত মৎস্য জীৱি সমিতিৰ বহু সংখ্যক সদস্য উপস্থিত থাকি অনুষ্ঠানটি সাফল্য মণ্ডিত কৰে ।
