প্ৰথম পৰ্যায়ৰ নিৰ্বাচনৰ মনোনয়ন দাখিলৰ অন্তিম দিনটোত কলিয়াবৰ সমষ্টিত পাঁচ গৰাকী প্ৰাৰ্থীৰ মনোনয়ন পত্ৰ দাখিল কৰে।অন্তিম দিনা পুৱাতে প্ৰথমেই নিৰ্দলীয় প্ৰাৰ্থী ৰূপে মনোনয়ন পত্ৰ দাখিল কৰে ভাস্কৰ শৰ্মাই।
পৰৱৰ্তী সময়ত মনোনয়ন দাখিল কৰে ভাৰতীয় জাতীয় কংগ্ৰেছ দলৰ প্ৰশান্ত শইকীয়াই।
তাৰ পাছতেই ক্ৰমে অসম জাতীয় পৰিষদৰ হৈ মনোনয়ন পত্ৰ দাখিল কৰে মুকুল বৰুৱাই।
আনহাতে¸ ভাৰতীয় ট্ৰাইবেল সঙ্ঘৰ হৈ মনোনয়ন পত্ৰ দাখিল কৰে ৰমেশ প্ৰধানে।
আজি এনেদৰে কলিয়াবৰ সমষ্টিত মুঠ পাঁচ গৰাকী প্ৰাৰ্থীয়ে মনোনয়ন পত্ৰ দাখিল কৰে।
কলিয়াবৰৰ সচেতন জাতীয়তাবাদী ৰাইজে অসম জাতীয় পৰিষদক ইতিমধ্যেই আকোৱালি লৈছে।
সেই বিশ্বাসতে জাতীয় পৰিষদৰ প্ৰাৰ্থীগৰাকীক বিজয়ী কৰিব বুলি দৃঢ় বিশ্বাসৰে প্ৰকাশ কৰে মুকুল বৰুৱাই।
কলিয়াবৰৰ নৱ-প্ৰজন্মৰ সংস্থাপনৰ বিষয়টোক মূল লক্ষ্য হিচাবে লৈ এই নিৰ্বাচনত অৱতীৰ্ণ হোৱাৰ কথা প্ৰকাশ কৰে প্ৰাৰ্থীগৰাকীয়ে।
তদুপৰি, ভাৰতীয় ট্ৰাইবেল পাৰ্টীৰ হৈ নিৰ্বাচনত অৱতীৰ্ণ হোৱা ৰমেশ প্ৰধানে প্ৰায় অকলশৰীয়াকৈয়ে মহকুমা কাৰ্য্যালয়ত উপস্থিত হৈ মনোনয়ন পত্ৰ দাখিল কৰে।
চাহ জনগোষ্ঠীক কৰা প্ৰতাৰণাৰ বিৰুদ্ধে আৰু কলিয়াবৰৰ বানত ক্ষতিগ্ৰস্ত হোৱা লোকৰ প্ৰাপ্য দাবী নিৰ্বাচনৰ মুখ্য বিষয় হ’ব বুলি প্ৰধানে মন্তব্য প্ৰকাশ কৰে।
আনহাতে, কলিয়াবৰৰ পৰা বিগত লোকসভা আৰু বিধান সভা নিৰ্বাচনত প্ৰতিদ্বন্দ্বিতা কৰা ভাস্কৰ শৰ্মায়ো সকলোৰে অগোচৰে পুৱাতেই মনোনয়ন পত্ৰ দাখিল কৰে বুলি জানিব পৰা গৈছে।