আজি গণেশ চতুৰ্থী। এই উপলক্ষে দেশৰ আন আন প্ৰান্তৰ লগতে অসমৰো বিভিন্ন মন্দিৰত ভক্তপ্ৰাণ ৰাইজে ভিৰ কৰা পৰিলক্ষিত হৈছে।
বুধবাৰে সন্ধিয়াৰ পৰা হোজাই নগৰৰ নেতাজী পইণ্টত ধৰ্মীয় উৎসাহ উদ্দিপনাৰ মাজেৰে হোজাই ব্যৱসায়ী গণপতি পূজা উদযাপন সমিতিৰ উদ্যোগত পাঁচ দিনীয়া কাৰ্সূচীৰে গণেশ চতুৰ্থতি উদযাপন আৰম্ভ হৈছে। উল্লেখযোগ্য যে হোজাই ব্যৱসায়ী গণপতি পূজা উদযাপন সমিতিয়ে যোৱা ১৮ বছৰ ধৰি গণেশ চতুৰ্থতি পালন কৰি আহিছে।
এই উদ্দেশ্যে সাজি উলিওৱা বৃহৎ আলোকউজ্জল পেণ্ডেলে সকলোৰে দৃষ্টি আকৰ্ষণ কৰিছে। ১৬ ছেপ্তেম্বৰৰ সন্ধিয়া সামৰণি পৰিব লগীয়া এই উৎসৱত বক্তসকলে ভগৱান গণেশৰ মূৰ্তিলৈ নগৰখনৰ মাজেৰে পৰিক্ৰমা কৰি কালি বাৰীত মূৰ্তি বিসৰ্জন কৰিব।
ব্যৱসায়ী পূজা উদযাপন সমিতিৰ উপৰি শ্ৰী শ্ৰী সাৰ্বজনিক গণেশ উৎসৱ সমিতিয়েও হোজাই নতুন বজাৰৰ ২ নং ৱাৰ্ডত গণেশ চতুৰ্থী উদযাপন কৰিছে।
তদুপৰি হোজাইৰ লক্ষ্মীনাৰায়ন মন্দিৰ আৰু বিশ্বনাথ মন্দিৰতো অগণন লোকে মঙ্গল প্ৰাৰ্থনা জনাই, অপায় অমংগল আঁতৰ কৰি মনোবাঞ্চা সিদ্ধিৰ বাবে শ্ৰীগণেশৰ আশিস বিচাৰি পূজা অৰ্চনা কৰে।