দিনটোৰ কামৰ অন্তত পথৰ দাঁতিত শুই পৰিছিল নিৰ্মাণ শ্ৰমিকসকল। সেই শুই থকা শ্ৰমিকসকলক মহতিয়াই নিলে তীব্ৰবেগী ট্ৰাকে। মহাৰাষ্ট্ৰৰ বুলধনা জিলাত সংঘটিত হৈছে এই মৰ্মান্তিক ঘটনা। এই ঘটনাত ৫ জন শ্ৰমিকৰ মৃত্যু হয়। ইয়াৰ উপৰিও আন ২১ জন শ্ৰমিক গুৰুতৰভাৱে আহত হৈছে।
আৰক্ষীৰ মতে, বুলধনা জিলাৰ ৱাডনাৰৰ ভোলজী গাঁৱত ৬ নম্বৰ ৰাষ্ট্ৰীয় ঘাইপথ নিৰ্মাণৰ কাম চলি আছে। সেই কামত নিয়োজিত শ্ৰমিকসকল ৰাতি পথৰ কাষত থাকে। আন দিনৰ দৰে দেওবাৰৰ নিশাও কাম শেষ কৰি তেওঁলোকে নাগপুৰ-মুম্বাই ৬নং ৰাষ্ট্ৰীয় ঘাইপথৰ কাষতে শুই পৰে।
লগতে পঢ়কঃ ভূমি কেন্দ্ৰিক সংঘাত : উন্মত্ত ৰাইজৰ প্ৰহাৰত মৃত্যু একেটা পৰিয়ালৰে ৫ সদস্য
সোমবাৰে পুৱা প্ৰায় ৫:৩০ বজাত এখন তীব্ৰবেগী ট্ৰাকে আহি তেওঁলোকক মহতিয়াই নিয়ে। ট্ৰাকখন পথৰ পৰা আঁতৰি ফুটপাথত উঠি শুই থকা শ্ৰমিকসকলক মহতিয়াই নিয়ে। ৩ জন শ্ৰমিকৰ থিতাতে মৃত্যু হয়। আন ২ জন গুৰুতৰভাৱে আহতক চিকিৎসালয়ত ভৰ্তি কৰোৱাৰ সময়ত তেওঁলোকৰ তাতেই মৃত্যু হয়। স্থানীয় চিকিৎসালয়ত চিকিৎসাধীন হৈ আছে আৰু ৫ জন আহত শ্ৰমিক।
ইপিনে, শ্ৰমিকক মহতিয়াই নিয়াৰ পিছৰে পৰা পলাতক হৈ আছে হত্যাকাৰী ট্ৰাক চালকজন। বুলধনা জিলা আৰক্ষীৰ এগৰাকী বিষয়াই জনোৱা মতে, নন্দুৰা থানাত তেওঁৰ বিৰুদ্ধে এজাহাৰ দাখিল কৰা হৈছে আৰু তেওঁক বিচাৰি উলিয়াবলৈ তদন্ত অব্যাহত আছে।
