ডেৰাডুনৰ পিছত এইবাৰ মধ্যপ্ৰদেশত। পুনৰ উত্তৰ-পূব ভাৰতৰ এগৰাকী ছাত্ৰক হাৰাশাস্তি কৰাৰ অভিযোগ উত্থাপন হৈছে।
মধ্যপ্ৰদেশৰ অনুপপুৰ জিলাৰ অমৰকন্টকস্থিত ইন্দিৰা গান্ধী নেশ্যনেল ট্ৰাইবেল ইউনিভাৰ্ছিটিৰ হোষ্টেলত ছাত্ৰগৰাকীক বৰ্ণবাদী মন্তব্য কৰি প্ৰহাৰ কৰা বুলিও অভিযোগ উত্থাপন হৈছে।
এই সন্দৰ্ভত আৰক্ষীয়ে তদন্ত আৰম্ভ কৰিছে। আনহাতে, যি পাঁচজনৰ বিৰুদ্ধে এই অভিযোগ উত্থাপন হৈছে, তেওঁলোকক ইতিমধ্যে বিশ্ববিদ্যালয়ৰ পৰা বহিষ্কাৰ কৰা হৈছে বুলি কৰ্তৃপক্ষই জনাইছে।
উল্লেখ্য যে যোৱা মাহত ডেৰাডুনত ত্ৰিপুৰাৰ এগৰাকী ছাত্ৰক হত্যা কৰাৰ অভিযোগ উত্থাপন হৈছে। এঞ্জেল চাকমা নামৰ ছাত্ৰগৰাকীয়ে তাতেই এখন ব্যক্তিগত মহাবিদ্যালয়ত এম বি এ পঢ়ি আছিল। তাতেই থকা বজাৰ এখনত এঞ্জেল আৰু তেওঁৰ ভাতৃক বৰ্ণবিদ্বেষ প্ৰকাশ কৰি একাংশ শিক্ষাৰ্থীয়ে গালি-গালাজ কৰা বুলি অভিযোগ উত্থাপন হৈছে।
এঞ্জেল আৰু তেওঁৰ ভাতৃক ‘চাইনিজ মোমো’ বুলি ঠাট্টা কৰা হৈছিল। প্ৰতিবাদ কৰাৰ বাবে এঞ্জেল আৰু তেওঁৰ ভাতৃ মাইকেলক প্ৰহাৰ কৰা হয়। ছুৰীৰে আঘাত কৰা এঞ্জেলৰ মৃত্যু হয়।
দিল্লীত অধ্যয়ন কৰি থকা উত্তৰ ভাৰত আৰু উত্তৰ-পূব ভাৰতৰ ছাত্ৰ-ছাত্ৰীসকলে এই ঘটনাৰ বিৰুদ্ধে প্ৰতিবাদ সাব্যস্ত কৰে। এই ঘটনাৰ প্ৰতিক্ৰিয়া চলি থকাৰ মাজতেই মধ্যপ্ৰদেশৰ ৰাষ্ট্ৰীয় বিশ্ববিদ্যালয়ত এগৰাকী অসমৰ ছাত্ৰক হাৰাশাস্তি কৰা বুলি অভিযোগ উঠিছে।
সংবাদ সংস্থাৰ সূত্ৰৰ পৰা জানিব পৰা মতে, বিশ্ববিদ্যালয়খনৰ হোষ্টেলত অসমৰ তেজপুৰ অঞ্চলৰ নিবাসী হিৰকজ্যোতি দাসক হাৰাশাস্তি কৰা হয়। তেওঁ বিশ্ববিদ্যালয়খনৰ অৰ্থনীতি বিভাগৰ স্নাতকোত্তৰ ছাত্ৰ। যোৱা মঙলবাৰে তেওঁ টয়লেটৰ পৰা হোষ্টেলৰ নিজৰ কোঠালৈ গৈ আছিল। সেই সময়ত কেইজনমান শিক্ষাৰ্থীয়ে তেওঁৰ পৰিচয় জানিব বিচাৰিছিল। শিক্ষাৰ্থীসকলে জানিব বিচাৰিছিল যে তেওঁ ক’ৰ পৰা আহিছে। অভিযোগ অনুসৰি হীৰক অসমৰ পৰা অহা বুলি গম পাই তেওঁক তীব্ৰ প্ৰহাৰ কৰা হৈছিল।
অনুপপুৰ মহকুমা আৰক্ষী বিষয়া নবীন তিৱাৰীয়ে জানিবলৈ দিয়া মতে, ছাত্ৰজনে দাখিল কৰা এজাহাৰৰ ভিত্তিত তদন্ত আৰম্ভ কৰা হৈছে। তেওঁ লগতে কয় যে বিশ্ববিদ্যালয়ে অভিযুক্তসকলক বহিষ্কাৰ কৰা বুলি অৱগত কৰিছে। আৰক্ষী বিষয়াগৰাকীয়ে কয় যে বৰ্ণবৈষম্যমূলক কোনো মন্তব্য কৰা হৈছে নেকি সেই বিষয়েও তদন্ত চলি আছে।
অৱশ্যে মধ্যপ্ৰদেশ বিধানসভাৰ বিৰোধী দলপতি উমাং সিঙে বৰ্ণবিদ্বেষৰ অভিযোগ উত্থাপন কৰিছে। তেওঁ লগতে সকলো অভিযুক্ত শাসকীয় বিজেপিৰ সৈতে জড়িত বুলিও দাবী কৰে।
