কৰ্ণাটকৰ মাণ্ডিয়া জিলাৰ মুথাতি অঞ্চলত এক অতি শোকাৱহ ঘটনা সংঘটিত হৈছে। কাবেৰী নদীত ফটো উঠিবলৈ গৈ একেটা পৰিয়ালৰে পাঁচজন সদস্যৰ পানীত ডুব গৈ কৰুণ মৃত্যু হয়। প্ৰাথমিক তদন্তৰ পৰা জানিব পৰা গৈছে যে পৰিয়ালটোৱে নদীৰ পাৰত ফটো উঠিবলৈ গৈছিল আৰু হঠাতে অহা প্ৰবল সোঁতত উটি যায়।
মৃত লোককেইজনক চৈত্ৰা (২০), প্ৰিয়ংকা (২৮), শ্বেতা (৩৮), বিজয়াম্মা (৫০) আৰু মহেশ বুলি চিনাক্ত কৰা হৈছে। তেওঁলোক আটাইকেইজন কৰ্ণাটকৰ চান্নাপাটনাৰ বিয়াদাৰাহল্লি অঞ্চলৰ বাসিন্দা আছিল।
জানিব পৰা মতে, পৰিয়ালৰ সদস্যসকলে সেইদিনা বিখ্যাত মুথাথিৰায়া মন্দিৰত পূজা কৰিবলৈ গৈছিল। পূজা শেষ কৰাৰ পিছত তেওঁলোকে ফুৰিবলৈ কাবেৰী নদীৰ পাৰলৈ যায়। তাত পানীত নামি ফটো উঠি থকাৰ সময়তে হঠাতে পানীৰ সোঁত বাঢ়ি আহে আৰু প্ৰথমে কেইজনমান উটি যায়। তেওঁলোকক বচাবলৈ পানীত জাঁপ দিয়া আনকেইজনো পানীত ডুব যায় বুলি আৰক্ষীয়ে অনুমান কৰিছে।
খবৰ পোৱাৰ লগে লগে হালাগুৰু থানাৰ আৰক্ষী ঘটনাস্থলীত উপস্থিত হয়। অগ্নিনিৰ্বাপক বাহিনী আৰু দুৰ্যোগ ব্যৱস্থাপনা বাহিনীৰ লোকসকলেও ততাতৈয়াকৈ উদ্ধাৰ অভিযান আৰম্ভ কৰে। কিছু সময়ৰ তল্লাশিৰ পিছতে পাঁচোটা মৃতদেহ উদ্ধাৰ কৰা হয়। পৰৱৰ্তী সময়ত মৃতদেহকেইটা মৰণোত্তৰ পৰীক্ষাৰ বাবে মাণ্ডিয়া ইনষ্টিটিউট অৱ মেডিকেল চাইন্সেছ (মিমছ) হাস্পাতাললৈ প্ৰেৰণ কৰা হয়। মাণ্ডিয়াৰ আৰক্ষী অধীক্ষক ভি. জে. শোভা ৰাণীয়ে ঘটনাস্থলী পৰিদৰ্শন কৰে। ঘটনাটো কেনেকৈ সংঘটিত হ’ল তাৰ তদন্ত চলি আছে আৰু এই সন্দৰ্ভত হালাগুৰু থানাত এটা গোচৰ ৰুজু কৰা হৈছে।
এই শোকাৱহ ঘটনাৰ পিছত নদী বা জলাশয়ৰ পাৰত সাৱধানতা অৱলম্বন নকৰাৰ ভয়ংকৰ বিপদ পুনৰবাৰ পোহৰলৈ আহিছে। বিশেষকৈ বাৰিষা কালত নদীৰ সোঁত হঠাতে বাঢ়ি যোৱাৰ সম্ভাৱনা থকাৰ বাবে প্ৰশাসনে পৰ্যটকসকলক সতৰ্ক হৈ থাকিবলৈ পৰামৰ্শ দিছে। উল্লেখযোগ্য যে, কেইদিনমান আগতে বিহাৰৰ দানাপুৰত গংগা নদীত গা ধুবলৈ গৈ তিনিজন বন্ধুৰ মৃত্যু হৈছিল। আনহাতে, পশ্চিমবঙ্গৰ পঞ্চানন নদীত ভৰি ধুবলৈ গৈ এজন কিশোৰ আৰু তেওঁক বচাবলৈ গৈ তেওঁৰ বায়েকৰো পানীত ডুবি মৃত্যু হোৱাৰ খবৰ আহিছিল। সেয়েহে বাৰিষা সময়ত নদীত নমাৰ ক্ষেত্ৰত প্ৰশাসনে সকলো ৰাইজকে কঠোৰভাৱে সতৰ্ক কৰি দিছে।
