দেওবাৰে পুৱা ওড়িশাত সংঘটিত হয় এক ভয়ংকৰ দুৰ্ঘটনা। পথ দুৰ্ঘটনাত ৫ আৰক্ষী জোৱানৰ মৃত্যু হয়। এখন বৃহৎ মালবাহী গাড়ী আৰু আৰক্ষীৰ ভ্যানৰ সংঘৰ্ষত আহত হয় আৰু তিনিজন। তেওঁলোকৰ অৱস্থা সংকটজনক। স্থানীয় চিকিৎসালয়ত চিকিৎসাধীন হৈ আছে।
ওড়িশাৰ ঝাৰছুগুড়া জিলাত সংঘটিত হৈছে এই ঘটনা। মৃত আৰক্ষী জোৱান কেইজনৰ নাম হৈছে কাশীৰাম ভোই, দেৱদত্ত সা, নিৰঞ্জন কুজুৰ, লিংগৰাজ ধুৰুৱা আৰু ভক্তবন্ধু মিৰ্ধা। নিহতসকলৰ ভিতৰত কাশীৰাম আৰু দেৱদত্ত আছিল সশস্ত্ৰ আৰক্ষী জোৱান। লিংগৰাজে সেই বাহিনীত হাবিলদাৰ হিচাপে কাম কৰি আছিল। নিৰঞ্জন কুজুৰ আছিল ড্ৰিল চাব ইন্সপেক্টৰ। ভক্তবন্ধু আছিল হোমগাৰ্ড।
আহত আন তিনিজন আৰক্ষীৰ ভিতৰত দুজন এ পি আৰ জোৱান আৰু এজন চাৰ্জেণ্ট। ঝাৰছুগুডা জিলা সদৰ চিকিৎসালয়লৈ লৈ যোৱা হৈছে। সংকটজনক অৱস্থাত তাত চিকিৎসাধীন হৈ আছে।
জানিব পৰা মতে, দেওবাৰে পুৱা টহলদাৰী কৰ্তব্যত আছিল আৰক্ষীকেইজন। আৰক্ষীৰ ভ্যানখন থানাৰ সমীপত উপস্থিত হৈছিল। কিন্তু বিপৰীত দিশৰ পৰা বেগেৰে গৈ থকা ডাঙৰ গাড়ীখনে নিয়ন্ত্ৰণ হেৰুৱাই আৰক্ষীৰ ভ্যানত খুন্দা মাৰে। মুখামুখি সংঘৰ্ষত গাড়ীখন ছিন্নভিন্ন হৈ পৰে।
প্ৰচণ্ড শব্দ শুনি স্থানীয় ৰাইজে ততাতৈয়াকৈ সেই স্থানত উপস্থিত হয়। আৰক্ষী জোৱানকেইজনক উদ্ধাৰ কৰি ততাতৈয়াকৈ চিকিৎসালয়লৈ প্ৰেৰণ কৰা হয়। কিন্তু তাত ৫ জনক মৃত বুলি ঘোষণা কৰা হয়। ঝাৰছুগুড়াৰ আৰক্ষী অধীক্ষক গুণ্ডালা ৰাঘবেন্দ্ৰ ৰেড্ডীয়ে কয়, ‘ৰাতিপুৱা ঝাৰছুগুড়া সদৰ থানাৰ সন্মুখত সংঘটিত হৈছে এই ঘটনা।দুৰ্ঘটনাৰ কাৰণ এতিয়াও স্পষ্ট হোৱা নাই। আমি ট্ৰাক চালকজনক গ্ৰেপ্তাৰ কৰিছো। জেৰা অব্যাহত আছে।”
উল্লেখ্য যে ২০২৪ চনত চৰকাৰী তথ্য অনুসৰি ৰাজ্যখনত অত্যধিক বেগত চলাচলৰ বাবে ৭,২৬৯টা পথ দুৰ্ঘটনা সংঘটিত হৈছিল। ইয়াত ৩,৮৪৬ জন লোকৰ মৃত্যু হয়। আনহাতে, ভুল পথেৰে গাড়ী চলোৱাৰ ফলত ১১০৩টা দুৰ্ঘটনাত ৪৭০জন লোকৰ মৃত্যু হয়। গাড়ী চলোৱাৰ সময়ত মোবাইল ফোন ব্যৱহাৰ কৰাৰ ফলত ৫৮৫টা দুৰ্ঘটনাত ২৩৫জন লোকৰ মৃত্যু হয়।
