চাৰিখন ৰাজ্য আৰু এখন কেন্দ্ৰীয় শাসিত অঞ্চলৰ বিধানসভা নিৰ্বাচনৰ ভোটদান প্ৰক্ৰিয়া ইতিমধ্যে সমাপ্ত হৈছে। এতিয়া সকলো প্ৰাৰ্থীৰ ভাগ্য ইলেক্ট্ৰনিক ভোটিং মেচিন বা ইভিএমৰ ভিতৰত বন্দী হৈ আছে। অহা ৪ মে’ তাৰিখে এই নিৰ্বাচনৰ আনুষ্ঠানিক ফলাফল ঘোষণা কৰা হ’ব। কিন্তু তাৰ পূৰ্বেই সাধাৰণ জনতাৰ লগতে ৰাজনৈতিক বিশ্লেষকসকলৰ দৃষ্টি নিবদ্ধ হৈছে এগজিট প’ল বা নিৰ্বাচনী সমীক্ষাৰ ওপৰত। কোনখন ৰাজ্যত কোনে চৰকাৰ গঠন কৰিব, তাক লৈ সকলোৰে মাজত ব্যাপক চৰ্চা চলিছে।
নিৰ্বাচনী সমীক্ষা অনুসৰি অসমত মুখ্যমন্ত্ৰী হিমন্ত বিশ্ব শৰ্মাৰ নেতৃত্বত পুনৰবাৰ চৰকাৰ গঠন হোৱাৰ পূৰ্ণ সম্ভাৱনা আছে। এক্সিছ-মাই ইণ্ডিয়াৰ সমীক্ষা অনুসৰি ১২৬খন আসনৰ ভিতৰত এন ডি এ মিত্ৰজোঁটে ৮৮ৰ পৰা ১০০খন আসন আৰু কংগ্ৰেছ মিত্ৰজোঁটে ২৪ৰ পৰা ৩৬খন আসন লাভ কৰিব পাৰে। আনহাতে মেট্ৰিজৰ সমীক্ষামতে এন ডি এয়ে ৮৫ৰ পৰা ৯৫খন, কংগ্ৰেছে ২৫ৰ পৰা ৩২খন আৰু অন্যান্যই ৬ৰ পৰা ১২খন আসন পোৱাৰ সম্ভাৱনা আছে। অৰ্থাৎ দুয়োটা সমীক্ষাই অসমত পুনৰবাৰ বিজেপি নেতৃত্বাধীন চৰকাৰ অহাৰ স্পষ্ট ইংগিত দিছে।
পশ্চিমবংগৰ বিধানসভা নিৰ্বাচনৰ এগজিট প’ল অনুসৰি এইবাৰ বিজেপিয়ে মমতা বেনাৰ্জীৰ দুৰ্গত আঘাত হানিব পাৰে বুলি ধাৰণা কৰা হৈছে। চাৰিটা সমীক্ষাৰ ভিতৰত তিনিটা সমীক্ষাই প্ৰকাশ কৰিছে যে বিজেপিয়ে ১৪৬খনৰ পৰা ১৭৫খন আসন লাভ কৰিব পাৰে। আনহাতে কেৱল পিপলছ পালছ নামৰ এটা সমীক্ষাইহে তৃণমূল কংগ্ৰেছ একেৰাহে চতুৰ্থবাৰৰ বাবে ক্ষমতালৈ আহিব বুলি প্ৰকাশ কৰিছে। তেওঁলোকৰ মতে তৃণমূল কংগ্ৰেছে ১৭৭ৰ পৰা ১৮৭খন আসন পাব পাৰে। অৱশ্যে এই সমীক্ষাসমূহৰ ওপৰত সম্পূৰ্ণ বিশ্বাস কৰা টান, কিয়নো ২০২১ চনৰ নিৰ্বাচনতো বহু সমীক্ষাই বিজেপি আৰু তৃণমূলৰ মাজত তীব্ৰ প্ৰতিযোগিতাৰ ভৱিষ্যতবাণী কৰিছিল। কিন্তু শেষত মমতা বেনাৰ্জীৰ দলে ২১৫খন আসন লাভ কৰি বিশাল জয় সাব্যস্ত কৰিছিল আৰু বিজেপিয়ে ৭৭খন আসন লাভ কৰি প্ৰধান বিৰোধী দল হিচাপেহে থিয় দিছিল।
আনহাতে কেৰালাত বৰ্তমানৰ বাওঁপন্থী চৰকাৰে ক্ষমতা হেৰুৱাৰ সম্ভাৱনা আছে। এক্সিছ-মাই ইণ্ডিয়াৰ মতে বাওঁ মৰ্চাই ৪৯ৰ পৰা ৬২খন আসন পোৱাৰ বিপৰীতে কংগ্ৰেছ নেতৃত্বাধীন মিত্ৰজোঁটে ৭৮ৰ পৰা ৯০খন আসন লাভ কৰি চৰকাৰ গঠন কৰিব পাৰে। তামিলনাডুত মেট্ৰিজৰ সমীক্ষা অনুসৰি মুখ্যমন্ত্ৰী এম কে ষ্টেলিনৰ ডি এম কে দলে ১২২ৰ পৰা ১৩২খন আসন লাভ কৰি পুনৰ ক্ষমতালৈ অহাৰ সম্ভাৱনা আছে। এই নিৰ্বাচনত প্ৰথমবাৰৰ বাবে অৱতীৰ্ণ হোৱা অভিনেতা থালাপথী বিজয়ৰ দলে ১০ৰ পৰা ১২খন আসন পোৱাৰ অনুমান কৰা হৈছে। পুডুচেৰীতো কংগ্ৰেছৰ অৱস্থা বেয়া বুলি প্ৰকাশ পাইছে, য’ত বিজেপি নেতৃত্বাধীন এন ডি এয়ে ৩০খন আসনৰ ভিতৰত ১৬ৰ পৰা ২০খন আসন পোৱাৰ সম্ভাৱনা আছে।
অৱশেষত এই কথা মনত ৰখা উচিত যে এগজিট প’ল সদায় সম্পূৰ্ণ সঠিক নহয়। বহু সময়ত এই সমীক্ষাসমূহ প্ৰকৃত ফলাফলৰ সৈতে মিলি যায় যদিও কেতিয়াবা আকৌ ইয়াৰ বিপৰীত ফলাফল হোৱাও দেখা যায়। ভোটদান কৰি ওলাই অহা লোকসকলৰ মতামমৰ ওপৰত ভিত্তি কৰি এই সমীক্ষাবোৰ কৰা হয়। এগজিট প’লবোৰ কেৱল ভোটাৰৰ মনোভাৱ বুজিবলৈ কৰা এটা প্ৰয়াসহে। সেয়েহে কেৱল এই সমীক্ষাৰ ওপৰত ভিত্তি কৰি আনন্দিত বা নিৰাশ হোৱাৰ কোনো কাৰণ নাই, চূড়ান্ত আৰু সঠিক ফলাফল জানিবলৈ সকলোৱে ৪ মে’লৈকে অপেক্ষা কৰিব লাগিব।
