দেশৰ ৭২ সংখ্যক স্বাধীনতা দিৱস উপলক্ষে আজি পুৱা ৮.৩০ বজাত ৰাজীৱ ভৱনত ৰাষ্ট্ৰীয় পতাকা উত্তোলন কৰে প্ৰদেশ কংগ্ৰেছৰ সভাপতি ৰিপুণ বৰাই। দলটোৰ ভালে সংখ্যক নেতা-কৰ্মীৰ উপস্থিতিত অনুষ্ঠিত স্বাধীনতা দিৱসৰ কাৰ্য্যসূচীত সভাপতি বৰাই ৰাষ্ট্ৰীয় পতাকা উত্তোলন কৰে।
আনহাতে পতাকা উত্তোলনৰ সময়ত প্ৰদেশ কংগ্ৰেছৰ সভাপতিজনে ভৰিৰ ছেণ্ডেল খুলি নোলোৱাত মৃদু প্ৰতিক্ৰিয়াৰ সৃষ্টি হয়। ইয়াৰ প্ৰত্যুত্তৰত সভাপতি ৰিপুণ বৰাই ছেণ্ডেল পিন্ধি পতাকা উত্তোলন কৰাটো ভুল নহয় বুলি দাবী কৰে।
অৱশ্যে এই কথা সত্য যে ৰাষ্ট্ৰীয় পতাকা উত্তোলনৰ সময়ত ছেণ্ডেল-জোতা খুলি ল’ব লাগে নে নালাগে সেইটোত কোনো স্বীকৃত নিৰ্দেশনা বা নিয়ম নাই। flag code, 2002-তো এইটোৰ উল্লেখ নাই।
কিন্তু সকলো ভক্তিযুক্ত কাম-কাজত জোতা-ছেণ্ডেল পৰিহাৰ কৰি খালী ভৰিৰে ভাগ লোৱাটো এটা সামাজিক পৰম্পৰা বুলিব পাৰি। বিশেষকৈ অসমীয়া সমাজত।
পতাকাখনৰ প্ৰতি সন্মান প্ৰদৰ্শনৰ আন্তৰিকতাৰ প্ৰমাণ হিচাপেই সভাপতিজনে ছেণ্ডেলযোৰ খুলি ল’ব পাৰিলে হেঁতেন বুলি মন্তব্য কৰিছে উপস্থিত একাংশই।
উল্লেখযোগ্য যে যোৱা বছৰো বিজেপিৰ ৰাষ্ট্ৰীয় সভাপতি অমিত শ্বাহে জোতা পিন্ধিয়ে ৰাষ্ট্ৰীয় পতাকা উত্তোলন কৰা কাৰ্য্যই ব্যাপক প্ৰতিক্ৰিয়াৰ সৃষ্টি কৰিছিল।
