জেঠমাহৰ দ্বিতীয়টো বানে প্লাৱিত কৰিলে কৃষ্ণাইৰ বহু কেইখন গাওঁ ৷ মেঘালয়ৰ ঢলে পুনৰ বুৰালে কৃষ্ণাইৰ বহু গাওঁৰ লগতে বহু কৃষিভূমি।
হঠাৎ নামি অহা পানীৰ ঢলে হাহাকাৰৰ সৃষ্টি কৰিছে কৃষ্ণাই অঞ্চলত। কৃষ্ণাইৰ মইনামতী উন্মুক্ত মথাউৰিৰে হুৰাহুৰে পানী সুমাইছে।
ইয়াৰ ফলত মাজগাওঁ,ভোজমালা,টেঙাবাৰী, গজিয়াজানী, টাকাদিয়াবড়ী এতিয়া বানৰ কবলত।
সেইদৰে পানীৰ ঢলে কৃষ্ণাই-মৰনৈ সংযোগী গড়কাপ্তানী পথ বুৰাই পেলোৱাৰ লগতে ভেলাখামাৰ-পাখৰিগুৰী পথো এতিয়াপানীৰ তলত।
ইপিনে, কৃষ্ণাই নৈৰ জলস্তৰ এতিয়াও বাঢ়ি আছে। নিশাৰ ভিতৰতে বহু গাওঁ প্লাৱিত হোৱাৰ আশংকাত আতংকিত হৈ আছে ৰাইজ।
ইতিমধ্যে মাজগাঁও,কুলীয়াগাঁও আৰু পাখিৰীগুৰীৰ বহুলোক ঘৰ এৰি আন ঠাই আশ্ৰয় লোৱাৰ খবৰ পোৱা গৈছে ৷
আনহাতে, মেঘালয়ৰ পৰা নামি অহা প্ৰৱল ঢলে পলকতে উটুৱাই নিলে এখন কাঠৰ দলং। বানৰ কোৱাল সোঁতে চাটাইমাৰী গুমাইঝাৰ সংযোগী দলংখন উটুৱাই লৈ যায়।
তদুপৰি, বানপানীত বুৰ গৈছে বিদ্যুৎ বিভাগৰ কাৰ্য্যালয় আৰু মানুহৰ ঘৰ-দুৱাৰৰ ওপৰেৰে বানপানীৰ তীব্ৰ সোঁত বৈছে।
শিমলাবাৰী, ধূমেৰঘাট, খলিচাভিটা, গৌৰনগৰ আদি গাওঁ পঞ্চায়তৰ কুৰিখন গাওঁত হাহাকাৰ পৰিস্থিতিৰ সৃষ্টি হৈছে l
একেদৰে,আতংকময় পৰিবেশ বিৰাজ কৰিছে শিমলাবাৰী, ধূমেৰঘাট, খলিচাভিটা, গোসাইডুবি গাওঁ, গৌৰনগৰ আদি অঞ্চলত।