বোকাখাতৰ ধনশিৰিমুখত যোৱা নিশাৰে পৰা ব্ৰহ্মপুত্ৰ নদীৰ জলপৃষ্ঠ সামান্য নিম্নগামী হোৱাৰ পাছত আজি পুনৰ উৰ্দ্ধগামী হোৱাৰ বাবে কাজিৰঙা ৰাষ্ট্ৰীয় উদ্যানৰ ন ন অঞ্চল প্লাৱিত হৈছে৷
আজি বিয়লি ধনশিৰিমুখত ব্ৰহ্মপুত্ৰ নদীৰ জলপৃষ্ঠ বিপদসীমাৰ ওপৰেদি বৈ আছে৷ কাজিৰঙা ৰাষ্ট্ৰীয় উদ্যানৰ বিস্তীৰ্ণ অঞ্চল প্লাৱিত হৈছে৷
সম্প্ৰতি ৰাষ্ট্ৰীয় উদ্যানখনৰ মুঠ ৭৮টা বন শিৱিৰৰ তলেৰে পানী প্ৰবাহিত হৈছে৷ ৰাষ্ট্ৰীয় উদ্যানখনৰ বিশ্বনাথ বন সংমণ্ডলৰ ষষ্ঠ সংযোজন এলেকাৰ দুটা বনশিৱিৰ অস্থায়ীভাৱে স্থানান্তৰিত কৰা হৈছে৷
উদ্যানৰ ভিতৰত জলপৃষ্ঠ বাঢ়ি থকাৰ বাবে কিছু বন্যপ্ৰাণী ৰাষ্ট্ৰীয় উদ্যানৰ দক্ষিণে থকা কাৰ্বি পাহাৰলৈ যোৱা তথ্য পোৱা গৈছে৷
যাৰ বাবে আজি নিশাৰে পৰা ৰাষ্ট্ৰীয় উদ্যানখনৰ ৰাষ্ট্ৰীয় পথাংশত যান-বাহনৰ গতি নিয়ন্ত্ৰণৰ বাবে টাইম কাৰ্ড দিয়াৰ ব্যৱস্থা কৰিছে উদ্যান কৰ্তৃপক্ষই৷
কাজিৰঙাৰ কহঁৰা ৰেঞ্জৰ পূব হালধিবাৰী বনশিৱিৰ আৰু পশ্চিম দিশৰ বুঢ়াপাহাৰ ৰেঞ্জৰ আমগুৰি বনশিৱিৰত এই যান বাহনক টাইম কাৰ্ড দিয়াৰ কাম আজি নিশাৰ পৰা আৰম্ভ কৰিব বুলি জনাইছে কাজিৰঙাৰ ডি এফ অ’ ৰমেশ কুমাৰ গগৈয়ে৷
ইয়াৰ বাবে সকলো প্ৰস্তুতি সম্পূৰ্ণ কৰিছে উদ্যান কৰ্তৃপক্ষই৷
উল্লেখ্য যে যোৱা সময়চোৱাত বনকৰ্মীয়ে এটা পহু আৰু এটা অজগৰ সাপ উদ্ধাৰ কৰাৰ বাহিৰে এতিয়ালৈকে কোনো বন্যপ্ৰাণী যান-বাহন বা অন্য কাৰণত মৃত্যু হোৱা নাই৷
