কালি অনুষ্ঠিত হোৱা অসম মন্ত্রী সভাৰ কেবিনেট বৈঠকক লৈ প্ৰাক্তন মুখ্যমন্ত্রী তৰুণ গগৈয়ে অসন্তুষ্টি ব্যক্ত কৰিছে।
নৰ্থ ইষ্ট নাওলৈ প্ৰেৰণ কৰা এক ভিডিঅ’ত গগৈয়ে প্ৰতিক্ৰিয়া প্ৰকাশ কৰি কয়, “ক’ৰ’নাৰ ফলত বেয়াকৈ ক্ষতিগ্রস্ত হোৱা আমাৰ কৃষক, পশুপালক, মধ্যম আৰু ক্ষুদ্র ব্যৱসায়ীসকল, দৈনন্দিন উপাৰ্জন কৰা দৈনিক মজদুৰ, ঠেলাৱালা, ৰিক্সাৱালা আদিক সকাহ দিবৰ বাবে কেবিনেটে কোনো ব্যৱস্থা গ্রহণ নকৰাতো অতি পৰিতাপৰ বিষয়।”
গগৈৰ অভিযোগ, “চৰকাৰখনে বিশেষকৈ গ্ৰাম্য অঞ্চলৰ এই লোকসকলৰ বাবে কোনো আঁচনিয়েই গ্রহণ কৰা নাই।”
সেয়েহে গগৈয়ে ৰাজ্য চৰকাৰক গৰিহণা দি লগতে কয়, “ক’ৰ’নাৰ ফলত বিস্তৰ ক্ষতিগ্রস্ত হোৱা এই লোকসকল যাতে ইয়াতকৈ অধিক দুৰ্দশাগ্ৰস্ত হৈ মৃত্যুৰ সন্মুখীন হ’বলগীয়া নহয় তাৰবাবে অনতিপলমে সকাহ দিব পৰা এখন আঁচনি গ্রহণ কৰিব লাগে।”
ইপিনে, ৰাজস্থানৰ কোটাত আৱদ্ধ হৈ থকা অসমৰ ছাত্র-ছাত্রীসকলক ৰাজ্য চৰকাৰে নিজ ৰাজ্যলৈ ঘূূৰাই আনি তেওঁলোকৰ লগতে পৰিয়ালসমূহক যি সকাহ প্ৰদান কৰিলে তাৰ বাবে প্ৰাক্তন মুখ্যমন্ত্রী তৰুণ গগৈয়ে অসম চৰকাৰক ধন্যবাদ জনায়।
অৱশ্যে, কোটাৰ ওপৰিও দেশৰ বিভিন্ন ঠাইত এতিয়াও অসমৰ বহু হাজাৰ ছাত্র-ছাত্রী দুৰ্ভাগ্যজনকভাৱে আৱদ্ধ হৈ আছে বুলি উল্লেখ কৰি তেওঁ লগতে কয়, “ঠিক তেনেদৰে চিকিৎসা লাভৰ বাবে যোৱা বহুতো লোক বিভিন্ন ঠাইত আবদ্ধ হৈ আছে। যিসকলৰ দুখ কুলাই পাচিৰে নধৰা হৈছে। এই সকলোকে মানৱীয়তাৰ দৃষ্টিভংগীৰে অসম চৰকাৰে নিজ ৰাজ্যলৈ ঘূৰাই আনিব লাগে।”
