এছিয়ান চেম্পিয়নশ্বিপত পদক বিজয়ী এজন প্ৰাক্তন ভাৰতীয়ে ক্ৰীড়াবিদে নিজ মাতৃ আৰু পত্নীক হত্যা কৰিছে।
এই চাঞ্চল্যকৰ ঘটনাটো সংঘটিত কৰি এই হত্যাকাণ্ডৰ কথা ক্ৰীড়াবিদজনে নিজেই আৰক্ষীলৈ ফোন কৰি অৱগত কৰে।
আমেৰিকাৰ পেনচিলভেনিয়াৰ ডেলৱাবেৰৰ নিৱাসী ইকবাল সিং নামৰ ভাৰতৰ প্ৰাক্তন ক্ৰীড়াবিদজনে যোৱা দেওবাৰে এই লোমহৰ্ষক হত্যাকাণ্ড সংঘটিত কৰিছে।
৫২ বছৰীয়া ভাৰতীয় ক্ৰীড়াবিদজনে আৰক্ষীক খবৰ দিয়াৰ পিছতে ফিলাডেলফিয়াৰ আৰক্ষীয়ে গৈ তেওঁৰ ঘৰ উপস্থিত হৈ দুগৰাকী মহিলাৰ ৰক্তাক্ত মৃতদেহ দুটা পৰি থকা অৱস্থাত প্ৰত্যক্ষ কৰে।
আৰক্ষীৰ মতে দুয়ো গৰাকী মহিলাৰে ডিঙিৰ নলী কাটি হত্যা কৰা হৈছে।
আৰক্ষীয়ে প্ৰকাশ কৰিছে যে ইকবাল সিঙৰ শৰীৰতো ছুৰীৰ আঘাতৰ চিহ্ন স্পষ্ট হৈ আছে। তেওঁ আৰক্ষীৰ আগত নিজ মাতৃ আৰু পত্নীক হত্যা কৰাৰ কথা স্বীকাৰ কৰিছে।
সিঙৰ বিৰুদ্ধে ইতিমধ্যে ফাৰ্ষ্ট আৰু থাৰ্ড ডিগ্ৰী মাৰ্ডাৰৰ চাৰ্জ লগোৱা হৈছে আৰু তেওঁক জামিনৰ বিপৰীতে বিচাৰ বিভাগৰ জিম্মাত ৰখা হৈছে।
আনহাতে নিজৰ আইনী যুঁজৰ বাবে ইকবাল সিঙে কোনো অধিবক্তাও লোৱা নাই বুলি জানিব পৰা গৈছে।
ইফালে জানিব পৰা মতে ১৯৮৩ চনৰ কুৱইট এছিয়ান এথলেটিকছ চেম্পিয়নশ্বিপত ভাৰতৰ হৈ শ্বটপুটত ব্ৰঞ্জৰ পদক জয় কৰা ইকবাল সিং অতি শান্ত স্বভাৱৰ আছিল।
উক্ত চেম্পিয়নশ্বিপত বঞ্জৰ পদক জয় কৰাৰ পিছতে ইকবাল সিঙে আমেৰিকালৈ গৈ টেক্সী চাবলৈ আৰম্ভ কৰে বুলি মাৰ্কিন সংবাদ মাধ্যমে প্ৰকাশ কৰিছে।
ক্ৰীড়াবিদজনে কিয় এই হত্যাকাণ্ড সংঘটিত কৰিলে সেয়া জানিব পৰা নাই যদিও আৰক্ষীৰ প্ৰাথমিক তদন্তৰ মতে ইকবালে মাতৃ-পত্নীক হত্যা কৰি নিজেও আত্মঘাতী হোৱাৰ চেষ্টা কৰিছিল।
ইফালে ইকবালে মাতৃ আৰু পত্নীক হত্যা কৰাৰ পিছত নিজ পুত্ৰলৈ ফোন কৰি কয়, “তোমাৰ আইতা আৰু মাক মই হত্যা কৰিছো। তুমি আৰক্ষীক ফোন কৰি মোক গ্ৰেপ্তাৰ কৰিবলৈ কৈ দিয়া।” পুত্ৰৰ পিছত ইকবালে নিজ কন্যালৈও এইবুলি কৈ ফোন কৰা বুলি জানিব পৰা গৈছে।