জাত-পাত, ধৰ্ম-বৰ্ণক লৈ ভাৰতৰ বহু ৰাজ্যৰ বিভিন্ন সমাজ ব্যৱস্থা আজিও প্ৰভাৱিত ৷ কিন্তু তাৰ মাজতে এটা এনেকুৱা বতৰা আহিছে আপোনাৰ মুখলৈ যিয়ে সামান্য পৰিমাণে হ’লেও কঢ়িয়াই আনিছে আশাৰ বতৰা ৷ ঘটনাটো ভাৰতৰ অংগৰাজ্য পশ্চিমবংগৰ ৷
পশ্চিমবংগৰ পূব বৰ্ধমান জিলাৰ অন্তৰ্গত এখন ঠাই কিশোৰীগঞ্জ মনমোহনপুৰ ৷ এই কিশোৰীগঞ্জতে আছে এখন চৰকাৰী বিদ্যালয় মনমোহনপুৰ প্ৰাথমিক বিদ্যালয় ৷ এই চৰকাৰী বিদ্যালয়খনত প্ৰায় যোৱা ২৫ বছৰজুৰি কি হৈ আছিল সেই কথা জানিলে আপুনিও ভাবিবলৈ বাধ্য হ’ব।
এই প্ৰাথমিক বিদ্যালয়খনত হিন্দু-মুছলমান উভয় ধৰ্মৰে কণ-কণ শিক্ষাৰ্থীসকলক যি মধ্যাহ্ন ভোজন যোৱা ২৫ বছৰে দি অহা হৈছিল, সেয়া ৰন্ধা হৈছিল দুটা সুকীয়া সুকীয়া পাকঘৰত ৷ হিন্দুৰ বাবে এটা পৃথক পাকঘৰ আৰু মুছলমানৰ বাবে এটা বেলেগ পাকঘৰ ৷ স্কুল কৰ্তৃপক্ষই নিজেই স্থাপন কৰি লৈছিল এই দুটা সুকীয়া পাকঘৰ ৷ চৌকাৰ পৰা আৰম্ভ কৰি ৰন্ধা বাচন-বৰ্তনলৈকে সকলো ব্যৱস্থা আছিল পৃথক ৷ শিক্ষাৰ্থীসকলক মধ্যাহ্ন ভোজন পৰিৱেশন কৰাৰ সময়তো ভাগে ভাগে দিয়া হৈছিল খাদ্য ৷
যোৱা ২৫ টা বছৰে এই চৰকাৰী বিদ্যালয়খনত এই নিয়ম চলি আহিছিল ৷ শেহতীয়াকৈ স্থানীয় একাংশ লোকে বিষয়টো জিলা প্ৰশাসনৰ দৃষ্টিগোচৰ কৰে ৷ জিলা প্ৰশাসনে এই অভিযোগ পোৱাৰ পাছতে স্থানীয় গাওঁ পঞ্চায়তৰ এখন সভা অনুস্থিত কৰি বিহিত ব্যৱস্থা গ্ৰহণ কৰে ৷
আনহাতে এই সমগ্ৰ ঘটনা সন্দৰ্ভত জিলা প্ৰশাসনৰ এগৰাকী শীৰ্ষ বিষয়াই কয়- “শিশুসকলেই দেশৰ ভৱিষ্যৎ ৷ তেওঁলোকক এইদৰে ধৰ্মৰ ভিত্তিত ভাগ ভাগ কৰাটো উচিত হোৱা নাই ৷ জিলা প্ৰশাসনে এই অভিযোগ পোৱাৰ পাছতে তাৎক্ষণিকভাৱে ব্যৱস্থা গ্ৰহণ কৰিছে ৷ পঞ্চায়তৰ সভাত সিদ্ধান্ত লোৱা হৈছে যে এতিয়াৰে পৰা আৰু এই ব্যৱস্থা নচলিব ৷ সকলো শিক্ষাৰ্থীৰ বাবে এটাই উমৈহতীয়া পাকঘৰত খাদ্য প্ৰস্তুত কৰা হ’ব ৷ অৱশ্যে সেই সভাখনত দুজনমান অভিভাৱকে উমৈহতীয়া পাকঘৰৰ বিৰোধিতা কৰিছিল ৷ কিন্তু জিলা প্ৰশাসনে তেনে অভিযোগক গুৰুত্ব দিবলগীয়া বুলি ভবা নাই ৷ এতিয়াৰে পৰা দুয়োগৰাকী ৰান্ধনীয়ে একেলগে একেটা পাকঘৰতে সকলো শিক্ষাৰ্থীৰ বাবে উমৈহতীয়াকৈ খাদ্য প্ৰস্তুত কৰিব আৰু সকলো শিক্ষাৰ্থীয়ে একেলগে খাব ৷”
