বৃহস্পতিবাৰৰ তুলনাত কিছু পৰিমাণে স্বাস্থ্যৰ অৱস্থা উন্নিত হৈছে প্ৰাক্তন মুখ্যমন্ত্ৰী তৰুণ গগৈৰ।
জনতা ভৱনত সম্বোধন কৰা এক সংবাদমেলত এই কথা জনাইছে স্বাস্থ্য মন্ত্ৰী হিমন্ত বিশ্ব শৰ্মাই।
উল্লেখযোগ্য যে, প্ৰাক্তন মুখ্যমন্ত্ৰীগৰাকীক কালি পুৱাৰ ভাগত অক্সিজেনৰ মাত্ৰা হ্ৰাস পোৱাৰ বাবে ততাতৈয়াকৈ ভৰ্তি কৰোৱা হৈছিল GMCH ৰ আই.চি.য়ুত।
আজি পুৱা ৯:১৫ বজাত এইমছৰ পৰিচালন সঞ্চালকৰ সৈতে জিএমচিএইছৰ চিকিৎসকৰ এক ভিডিঅ’ কনফাৰেন্সিং অনুষ্ঠিত হয় বুলি সংবাদমেলত হিমন্তই জানিবলৈ দিয়ে।
তৰুণ গগৈৰ দেহত বৰ্তমান অক্সিজেনৰ মাত্ৰা ৯৪ লৈ বৃদ্ধি পাইছে বুলি উল্লেখ কৰি স্বাস্থ্যমন্ত্ৰীয়ে লগতে কয় ‘তেওঁ যোৱা নিশা ৬ লিটাৰ অক্সিজেন লৈ আছিল যদিও অক্সিজেনৰ মাত্ৰা ৯২ হে আছিল। কিন্তু আজি পুৱা ৩ লিটাৰ অক্সিজেন লৈয়ো তেওঁৰ অক্সিজেনৰ পৰিমাণ ৯৪ ত আছে।‘
গগৈৰ অক্সিজেন লেভেল বৃহস্পতিবাৰে ৮৪ লৈ হ্ৰাস পাইছিল। আজি পুৱাৰ ভাগত এইমছৰ পৰিচালন সঞ্চালকৰ পৰা GMCH ৰ চিকিৎসকে চিকিৎসা প্ৰণালীৰ সম্পৰ্কে কিছু পৰামৰ্শ গ্ৰহণ কৰে।
মন্ত্ৰীয়ে সংবাদমেলত জনোৱা অনুসৰি ‘পৰিচালন সঞ্চালকে গগৈৰ কিছুমান অতিৰিক্ত পৰীক্ষা কৰাবলৈ পৰামৰ্শ দিয়াৰ লগতে দুই এদিনতে এইমছৰ এজন চিকিৎসকক অসমলৈ পঠিয়াব বুলি আশ্বাস দিছে।’
এই ভিডিঅ’ কনফাৰেন্সিঙত জিএমছিএইছৰ চিকিৎসকৰ লগতে স্বাস্থ্যমন্ত্ৰী ড০ হিমন্ত বিশ্ব শৰ্মা আৰু গগৈৰ পুত্ৰ গৌৰৱ গগৈয়ো অংশগ্ৰহণ কৰে।
উল্লেখযোগ্য যে, যোৱা ২৫ আগষ্টত প্ৰাক্তন মুখ্যমন্ত্ৰীগৰাকী কোভিড-১৯ ত আক্ৰান্ত হৈছিল আৰু পাছদিনা তেওঁক GMCH ত ভৰ্তি কৰোৱা হৈছিল। তেতিয়াৰে পৰা তেওঁ GMCH তে চিকিৎসাধীন হৈ আছিল।
