ভাৰতীয় জনতা পাৰ্টিৰ প্ৰাক্তন জ্যেষ্ঠ নেতা তথা প্ৰাক্তন কেন্দ্ৰীয় মন্ত্ৰী যশোৱন্ত সিনহাই শনিবাৰে তৃণমূল কংগ্ৰেছত যোগদান কৰে।
তৃণূমূল নেতা ডেৰেক অ’ব্ৰায়ানৰ উপস্থিতিত কলকাতাত তেওঁ গেৰুৱা শিবিৰৰ পৰা তৃণমূল শিবিৰলৈ যায়।
এই সম্পৰ্কত বিজেপিৰ প্ৰাক্তন নেতাজনে কয় যে মমতা বেনাৰ্জীক নন্দীগ্ৰামত দুৰ্বৃত্তই আক্ৰমণ কৰাৰ পাছতে তেওঁ মমতাক সমৰ্থন জনাবলৈ তৃণমূলত যোগদান কৰিথে।
”দেশখনে আজি অভাৱনীয় পৰিস্থিতিৰ মুখামুখি হৈছে। গণতন্ত্ৰৰ শক্তি নিৰ্ভৰ কৰে গণতান্ত্ৰিক প্ৰতিষ্ঠানসমূহৰ শক্তিৰ ওপৰত। ন্যায়পালিকাকে ধৰি এই সকলো প্ৰতিষ্ঠান এতিয়া দুৰ্বল হৈ পৰিছে।”- সিনহাই কয়।
প্ৰাক্তন প্ৰধানমমন্ত্ৰী অটল বিহাৰী বাজপেয়ীক সোঁৱৰণ কৰি তেওঁ কয় যে বাজপেয়ীৰ নেতৃত্বত বিজেপিয়ে ঐক্যমতত বিশ্বাস কৰিছিল কিন্তু বৰ্তমানৰ বিজেপি চৰকাৰখনে নিষ্পেষণ আৰু বিজয়ী হোৱাত বিশ্বাস কৰে।
”আাকালি আৰু বিজেডিও বিজেপিৰ লগ এৰিলে, আৰু কোনে বিজেপিৰ লগত একলগ হৈ আছে?”- সিনহাই প্ৰশ্ন কৰে।
তৃণমূলত যোগদানৰ পূৰ্বে, মমতা বেনাৰ্জীক আক্ৰমণ কৰাৰ অভিযোগত সিনহাই বিজেপিক সমালোচনা কৰিছিল।
”বিজেপিক লৈ লাজ পাইছো। আক্ৰমণত আঘাটপ্ৰাপ্ত মমতাক সমবেদনা জনোৱাৰ বিপৰীতে তেওঁলোকে ইয়াক লৈ ধেমালি কৰিছে।”- বুধবাৰে তেওঁ এইদৰে টুইট কৰিছিল।
”বংগৰ যুদ্ধখনেই ভাৰতৰ যুদ্ধ। এই নিৰ্বাচনত বংগৰ ভোটাৰসকলে ভাৰতৰ ভৱিষ্যতৰ বাবে ভোটদান কৰিব।”- টুইটটোত তেওঁ লিখিছিল।
উল্লেখযোগ্য যে ২০১৮ চনত বিজেপিৰ দলীয় নেতৃত্বৰ স’তে মতভেদৰ ফলস্বৰুপে তেওঁ দলটোৰ পৰা পদত্যাগ কৰিছিল।
দুবাৰকৈ কেন্দ্ৰীয় বিত্ত মন্ত্ৰী হিচাপে কাৰ্যনিৰ্বাহ কৰা সিনহাই বাজপেয়ী চৰকাৰৰ দিনত বৈদেশিক মন্ত্ৰীও আছিল।
তেওঁৰ পুত্ৰ জয়ন্ত সিনহা বৰ্তমান ঝাৰখণ্ডৰ হাজাৰিবাঘ সমষ্টিৰ বিজেপি সাংসদ।
