‘’জে পি চিত সদস্য হিচাপে অসমৰ যিকেইগৰাকী সাংসদ আছে তেওঁলোকে বিধেয়কখনৰ বিৰুদ্ধে সবল স্থিতি গ্ৰহণ নকৰিলে। ৰাইজৰ সহযোগত অসমৰ সাংসদসকলৰ ঘৰ ঘেৰাও কৰিব লাগে,’’ –এই মন্তব্য প্ৰাক্তন মুখ্যমন্ত্ৰী তথা অগপ নেতা প্ৰফুল্ল কুমাৰ মহন্তৰ।
শুকুৰবাৰে বিয়লি স্থানীয় ভগৱতী প্ৰসাদ বৰুৱা ভৱনৰ সভাকক্ষত অনুষ্ঠিত ‘অসম বচাওক’ শীৰ্ষক আলোচনা সভাত অংশগ্ৰহণ কৰি মহন্তই এইদৰে মন্তব্য কৰে।
উক্ত আলোচনা সভাত অংশগ্ৰহণ কৰি ৰাজ্যৰ বহুকেইজন বুদ্ধিজীৱী, ৰাজনৈতিক দলৰ প্ৰতিনিধি তথা বিশিষ্ট ব্যক্তিয়ে জাতিধ্বংসী বিধেয়কখন সন্দৰ্ভত কেন্দ্ৰৰ সিদ্ধান্তৰ বিৰুদ্ধে তীব্ৰ প্ৰতিবাদ সাব্যস্ত কৰিবলৈ সিদ্ধান্ত গ্ৰহণ কৰে।
জে পি চিয়ে অহা ৭ জানুৱাৰিত নাগৰিকত্ব সংশোধনী বিধেয়ক সন্দৰ্ভত প্ৰতিবেদন দাখিল কৰাৰ দিনাই নাগৰিক সমাজে ৰাজ্যত ধিক্কাৰ দিৱস পালন কৰিব। তদুপৰি, সেইদিনা ধিক্কাৰ দিৱস পালনৰ লগতে নাগৰিক সমাজে ক’লা পতাকা প্ৰদৰ্শনেৰে প্ৰতিবাদ সাব্যস্ত কৰিব।
আলোচনা সবাখনত উপস্থিত থাকি চিন্তাবিদ লক্ষ্মীনাথ তামুলীয়ে বিধেয়কখনৰ বিৰুদ্ধে গাঁৱে গাঁৱে জন সজাগতা সৃষ্টিৰ আহ্বান জনায়।
আনহাতে, বিধেয়কখনৰ বিৰুদ্ধে আন্দোলন কৰি থকা সংগঠনসমূহৰ সৈতে ঐক্যবদ্ধ আন্দোলন গঢ়ি তুলিবলৈও শুকুৰবাৰৰ আলোচনা সভাত সিদ্ধান্ত গ্ৰহণ কৰা হয়। তদুপৰি, প্ৰয়োজন হ’লে লক্ষাধিক লোকৰ সমাৱেশেৰে বিশাল প্ৰতিবাদী সমাৱেশ অনুষ্ঠিত কৰি দিল্লীৰ বিৰুদ্ধে প্ৰতিবাদ কৰাৰ বিষয়তো সহমত পোষণ কৰা হয়।
আলোচনা সভাৰ অন্যতম আহ্বায়ক মনজিৎ মহন্তই অগপই বৰষুণ গ’লে জাপি লৈ লাভ নাই বুলি কৈ যি কৰে এতিয়াই কৰি দেখুৱাবলৈ আহ্বান জনায়। লগতে আলোচনা সভাত অংশগ্ৰহণ কৰা অধিকাংশই শুকুৰবাৰে প্ৰধানমন্ত্ৰীয়ে স্পষ্টকৈ বিধেয়কখনৰ সপক্ষে কোৱাৰ পাছত অগপই বিজেপিৰ লগত থকাৰ কোনো যুক্তি নাই বুলি মন্তব্য কৰে।