দীৰ্ঘদিনীয়া শাৰিৰীক অসুস্থতাৰ পাছত নগাঁও জিলাৰ পুৰণিগুদামৰ নিকটৱৰ্তী চলচলিৰ ৰামটিলা আটিত আজি উপস্থিত হয় অসমৰ প্ৰাক্তন মুখ্য মন্ত্ৰী তথা বৰ্তমানৰ বঢ়মপুৰ সমষ্টিৰ বিধায়ক প্ৰফুল্ল কুমাৰ মহন্ত।
দীৰ্ঘদিনীয়া অসুস্থতাৰ অন্তত গৃহ সমষ্টি বঢ়মপুৰৰ বিভিন্ন প্ৰান্তত দিনজোৰা কাৰ্যসূচী হাতত লৈ উপস্থিত হোৱা প্ৰাক্তন মুখ্য মন্ত্ৰী মহন্তই বিয়লিলৈ চলচলি ৰামটিলা আটিৰ পৰা বালিজুৰি সংযোগ হোৱা পথৰ নিৰ্মাণৰ কাম অনুষ্ঠানিকভাৱে আৰম্ভ কৰে।
উক্ত কাৰ্যসূচীত প্ৰাক্তন মুখ্য মন্ত্ৰী প্ৰফুল্ল কুমাৰ মহন্তৰ লগতে নগাঁও জিলা অগপৰ সাধাৰণ সম্পাদক নিৰঞ্জন বৰাও উপস্থিত থাকে।
অসুস্থতাৰ পাছত পোন প্ৰথমবাৰৰ বাবে প্ৰাক্তন মুখ্য মন্ত্ৰী গৰাকীয়ে সাংবাদিকক সম্বোধন কৰে কাৰ্যসূচী ৰূপায়ণ কৰা স্থানতে।
সাংবাদিকৰ সন্মুখত মিঞা মিউজিয়ামৰ প্ৰসংগত প্ৰাক্তন মুখ্য মন্ত্ৰী গৰাকীয়ে প্ৰতিক্ৰিয়া প্ৰকাশ কৰি কয় যে এইক্ষেত্ৰত চৰকাৰৰ কোনো সিদ্ধান্ত হোৱা নাই বুলি কৈছে আৰু সেই সভাত সকলো ৰাজনৈতিক দলৰ লোক উপস্থিত আছিল বুলি কোৱাৰ লগতে মিউজিয়াম বনালে তাতেই এটা সংস্কৃতি কেতিয়াও সীমাবদ্ধ হৈ নাথাকে, তাৰ পৰিবৰ্ধন ক্ৰমবিকাশ ঘটিব লাগিব।
গতিকে সিদ্ধান্তটো সময়োপযোগী হৈছেনে নাই সেই কথা সদনৰ কমিটিয়ে সিদ্ধান্ত ল’ব বুলি মন্তব্য কৰে।
আনহাতে অগপৰ চৈধ্যটা সমষ্টিৰ প্ৰাৰ্থীৰ প্ৰসংগত দলৰ শীৰ্ষ কৰ্মীয়ে সিদ্ধান্ত ল’ব বুলি মত প্ৰকাশ কৰি প্ৰাক্তন মুখ্য মন্ত্ৰী গৰাকীয়ে লগতে তেখেতৰ ক্ষেত্ৰত ২০২১ৰ নিৰ্বাচনত বঢ়মপুৰ সমষ্টিত ৰাইজে সিদ্ধান্ত ল’ব বুলি জানিবলৈ দিয়ে।
ইয়াৰ উপৰি প্ৰাক্তন মুখ্য মন্ত্ৰী তৰুণ গগৈৰ আশু আৰোগ্য কামনা কৰি অসমৰ ৰাজনীতিত গগৈ ডাঙৰীয়াৰ অৱদান উল্লেখনীয় আৰু অসমৰ ৰাজনীতিত তেখেতৰ প্ৰয়োজন আছে গতিকে প্ৰাক্তন মুখ্য মন্ত্ৰী তৰুণ গগৈ অতি সোনকালে সুস্থ হৈ উঠক বুলি মহন্তই আশু আৰোগ্য কামনা কৰে।
উল্লেখ্য যে, চলচলী ৰামটিলাআটিত এই কাৰ্যসূচীত ভাগ লোৱাৰ পাছতেই প্ৰাক্তন মুখ্য মন্ত্ৰীগৰাকী পুনৰ বঢ়মপুৰ সমষ্টিৰ আন বহুকেইটা কাৰ্যসূচীত ভাগ ল’বলৈ ৰাওনা হয়।