শুকুৰবাৰে লাষ্টগেটত প্ৰতিবাদকাৰীক সংগ দিৱলৈ উপস্থিত হয় প্ৰাক্তন মুখ্য মন্ত্ৰী তৰুণ গগৈ ৷ প্ৰতিবাদকাৰী সকলৰ দাবীসমূহৰ বুজ লোৱাৰ লগতে বিধান সভাত মজিয়াত তেওঁলোকৰ দাৱী সমূহ উত্থাপন কৰিব বুলি তেওঁ প্ৰতিশ্ৰুতি দিয়ে ৷
কিন্তু অসম প্ৰশিক্ষণ প্ৰাপ্ত গৃহৰক্ষী সন্থাৰসকলৰ প্ৰতিবাদক বাই বাই দি গুচি যায় প্ৰাক্তন মুখ্য মন্ত্ৰীগৰাকীয়ে ৷
এই সন্দৰ্ভত সদৌ অসম প্ৰশিক্ষণ প্ৰাপ্ত গৃহৰক্ষী সন্থাৰ সভাপতি কামাখ্যা দাসে কয় যে প্ৰত্যেক নেতাৰ বাই বাই দিয়াটো এটা স্বভাৱত পৰিনত হৈছে ৷ ঠিক তেনেদৰে প্ৰাক্তন মুখ্য মন্ত্ৰী তৰুণ গগৈও আমাৰ মাজলৈ আহিল আৰু যিদৰে এখন সভাত বাই বাই দি গুচি যায় ঠিক তেনেকে বাই বাই দি গুচি গ’ল ৷
‘’কিন্তু তেখেতে আমাৰ লগত কথা পতাৰ সৎসাহসকণো থাকিব লাগিব ৷ তেখেতৰ ১৫ বছৰীয়া শাসনকালতো এনেকৈ আমি গৃহৰক্ষী বাহিনীয়ে ধৰ্ণা কাৰ্যসূচী পালন কৰিছিলো বা পথ অবৰোধ কাৰ্যসূচী পালন কৰিছিলো। লগতে বিভিন্ন ধৰণৰ স্মাৰক পত্ৰ আমি প্ৰদান কৰিছিলো ৷ কিন্ত দুখৰ কথা ১৫ বছৰে তেখেতে আমাৰ কাৰনে কোনো এটা পদক্ষেপ লব নোৱাৰিলে ৷ তেখেতে কোন খন মুখ লৈ আমাৰ লগত কথা পাতিব?’’-দাসে কয়।
তেওঁ লগতে কয়, ‘’ৰাজনৈতিক মুনাফা আদায় কৰাৰ বাবে তেখেতে বাকী দল সংগঠন সমূহৰ লগত কথা পাতিলে ৷ ২১’ত নিৰ্বাচন আহি আছে গতিকে ভোটৰ অংক মিলাবলৈ বাকী সংগঠন সমূহক কিবা আশ্বাস দিলে বা প্ৰতিশ্ৰুতি দিলে ৷ যিহেতু প্ৰতিশ্ৰুতি আজিকালিৰ নেতা সকলৰ ধৰ্ম ৷’’
দাসে কয়, ‘’তেওঁ আমাৰ ওচৰত আহিল সঁচা কিন্তু দেখিলে গৃহৰক্ষী ৷ গৃহৰক্ষী সকলেতো আন্দোলন কৰিয়ে আছে ৷ ইমান দিনেতো মই একো কৰিব নোৱাৰিলো ৷ আজি তেওঁলোকক কি আশ্বাস দিম ৷ সেইকাৰনে তেওঁ নিৰ্লজভাবে আঁতৰি গুচি গ’ল৷’’
‘’এইটো তেখেতৰ ব্যক্তিগত লাভৰ কাৰনে আহিছে ৷ আগন্তুক নিৰ্বাচন আহি আছে ৷ এতিয়া টঙালী বান্ধিবই ৷ আমাৰ বেয়া পাব লগীয়া তেওঁক নাই যদিও এটাই আক্ষেপ ৰৈ গ’ল তেখেতৰ দিনতো একো নাপালো আৰু পৰিবৰ্তনকামী বিজেপি চৰকাৰৰ পৰাও আমি বৰ্তমানলৈ একো নাপালো,’’-দাসে আক্ষেপেৰে কয়।