দীৰ্ঘ ১৭ বছৰ ধৰি ভুৱা লাইচেন্স ব্যৱহাৰ কৰি বিমান চলোৱাৰ অভিযোগত কানাডাৰ বিমান সংস্থা ‘এয়াৰ কানাডা’ৰ এজন প্ৰাক্তন পাইলটক গ্ৰেপ্তাৰ কৰা হৈছে। এই ঘটনাত এখন ফৌজদাৰী গোচৰ ৰুজু কৰাৰ পাছত যোৱা মঙলবাৰে কানাডাৰ আৰক্ষীয়ে তেওঁক গ্ৰেপ্তাৰ কৰে।
তদন্তকাৰীসকলে জানিবলৈ দিয়া মতে, অভিযুক্ত জেফ্ৰী ৱালে প্ৰয়োজনীয় লাইচেন্স অবিহনে আৰু কোনো বাধ্যতামূলক পৰীক্ষা নিদিয়াকৈয়ে ২০০৯ চনৰ পৰা ২০২৫ চনলৈকে ৯০০ খনতকৈও অধিক ঘৰুৱা আৰু আন্তঃৰাষ্ট্ৰীয় বিমান চলাইছিল।
অন্টাৰিঅ’ত এখন সংবাদমেলত পিল ৰিজিঅ’নেল আৰক্ষীৰ উপ-প্ৰধান মিলিনোভিচে কয় যে এই ঘটনাটো শুনিবলৈ কোনো চিনেমাৰ কাহিনীৰ দৰে লাগে। ৱালে পাইলট ইন কমাণ্ড পদলৈ পদোন্নতি লাভ কৰিছিল আৰু প্ৰায় ১৭ বছৰ ধৰি তেওঁ বোয়িং ৭৬৭, ৭৭৭ আৰু ৭৮৭ বিমান চলাইছিল। এই সময়ছোৱাত তেওঁ প্ৰায় ৩ মিলিয়ন কানাডিয়ান ডলাৰ (২ মিলিয়ন মাৰ্কিন ডলাৰতকৈ অধিক) দৰমহা হিচাপে লৈছিল।
এই ঘটনাটোৱে যেন ২০০২ চনৰ বিখ্যাত হলিউড চিনেমা ‘কেচ মি ইফ ইউ কেন’ৰ কাহিনীহে মনত পেলাই দিয়ে, য’ত এজন কিশোৰে মিছা পৰিচয়েৰে পেনআম বিমান সংস্থাৰ পাইলটৰ ভাও ধৰিছিল।
জেফ্ৰী ৱালে এয়াৰ কানাডাত ২৭ বছৰ ধৰি কাম কৰিছিল আৰু তেওঁৰ কমাৰ্চিয়েল পাইলট লাইচেন্সো আছিল। কিন্তু আৰক্ষীয়ে জনোৱা মতে, ২০০৯ চনত যেতিয়া তেওঁ কেপ্তেইন পদলৈ পদোন্নতি পায়, তেতিয়া তেওঁৰ ‘এয়াৰলাইন ট্ৰেন্সপোৰ্ট পাইলট লাইচেন্স’ বা এটিপিএল থকাটো প্ৰয়োজন আছিল, যিটো তেওঁৰ কেতিয়াও নাছিল।
এই সন্দৰ্ভত উপ-প্ৰধান মিলিনোভিচে কয় যে এইটো এনেকুৱা এটা কথা, যেন এজন ডাক্তৰৰ সাধাৰণ চিকিৎসাৰ লাইচেন্স আছে কিন্তু তেওঁ নিজৰ চেম্বাৰত ব্ৰেইন চাৰ্জাৰী কৰি আছে। তেওঁ লগতে কয় যে অভিযুক্ত ব্যক্তিজনে নিজৰ নিয়োগকৰ্তা আৰু নিয়ন্ত্ৰণকাৰী সংস্থা দুয়োৰে আগত নিজৰ যোগ্যতাৰ বিষয়ে মিছা তথ্য দাঙি ধৰিছিল।
২০২৫ চনত পাইলটৰ নথিপত্ৰ নিয়মীয়াকৈ পৰীক্ষা কৰাৰ সময়ত জেফ্ৰী ৱালৰ লাইচেন্সত ডাঙৰ খেলিমেলি ধৰা পৰে। ইয়াৰ পাছতে এয়াৰ কানাডা কৰ্তৃপক্ষই বিষয়টো নিয়ন্ত্ৰণকাৰী সংস্থাক জনায়। অৱশ্যে এই ঘটনাৰ তদন্ত আৰু ‘প্ৰজেক্ট ইকাৰাছ’ নামৰ ফৌজদাৰী অভিযান যোৱা জানুৱাৰী মাহত আৰম্ভ হোৱাৰ আগতেই ২০২৫ চনত জেফ্ৰীয়ে চাকৰিৰ পৰা অৱসৰ লয়।
সোমবাৰে দিয়া এক বিবৃতিত এয়াৰ কানাডাই জনায় যে এই ঘটনাৰ বাবে যাত্ৰীৰ নিৰাপত্তাত কোনো ধৰণৰ প্ৰভাৱ পৰা নাছিল। কাৰণ এয়াৰ কানাডাৰ সকলো পাইলটে নিজৰ দক্ষতা প্ৰমাণ কৰিবলৈ প্ৰতি ছমাহৰ মূৰে মূৰে বাধ্যতামূলক প্ৰশিক্ষণ ল’ব লাগে আৰু প্ৰতি ১২ মাহত এজন প্ৰমাণিত চেক-পাইলটৰ সৈতে তেওঁলোকৰ ফ্লাইট চেক কৰা হয়। তথাপিও সঠিক লাইচেন্স থকাটো বিমান সেৱাৰ নিৰাপত্তাৰ এক অতি দৰকাৰী অংশ, সেয়েহে এয়াৰ কানাডাই এই বিষয়টো অতি গুৰুত্বসহকাৰে লৈছে।
ইতিমধ্যে ‘ট্ৰেন্সপোৰ্ট কানাডা’ই জেফ্ৰী ৱালক জৰিমনা বিহিছে। ইয়াৰ উপৰিও তেওঁৰ বিৰুদ্ধে ৫ হাজাৰ ডলাৰতকৈ অধিক জালিয়াতি কৰা, জাল নথিপত্ৰ ব্যৱহাৰ কৰা আৰু নকল ছীল ৰখাৰ অভিযোগত মুঠ সাতটা ফৌজদাৰী গোচৰ ৰুজু কৰা হৈছে। অহা ২৯ জুনত তেওঁক আদালতত হাজিৰ কৰোৱাৰ কথা আছে, পিছে তেওঁৰ হৈ কোনো অধিবক্তা নিয়োগ কৰা হৈছে নে নাই সেয়া এতিয়াও জানিব পৰা হোৱা নাই।
