উচ্চতম ন্যায়ালয়ৰ প্ৰাক্তন ন্যায়াধীশ শৈলেন্দু নাথ ফুকনৰ আজি পৰলোকপ্ৰাপ্তি ঘটে। আইনৰ ক্ষেত্ৰখনত বৰ্ণাঢ্য কেৰিয়াৰেৰে কৰ্ম জীৱন সামৰা এছ এন ফুকনৰ আজি পুৱা যোৰহাটৰ মিছন হাস্পাতলত বাৰ্দ্ধক্যজনিত কাৰণত পৰলোকপ্ৰাপ্তি ঘটে।
মৃত্যুৰ সময়ত ফুকনে দুজন পুত্ৰ আৰু দুগৰাকী কন্যাক এৰি থৈ গৈছে। মৃত্যুৰ সময়ত ফুকনৰ বয়স হৈছিল ৮১ বছৰ।
১৯৩৭ চনৰ ১ এপ্ৰিলত জন্মগ্ৰহণ কৰা এছ এন ফুকনে আইনৰ স্নাতক ডিগ্ৰী লাভ কৰি প্ৰথমতে যোৰহাট জিলা আদালতত যোগদান কৰাৰ পাছত ১৯৬২ চনত গুৱাহাটী উচ্চ ন্যায়ালয়ত ওকালতি আৰম্ভ কৰে।
১৯৬৩ চনত তেওঁ অসম ন্যায়িক সেৱাত উত্তীৰ্ণ হয়। ১৯৭০ চনত তেওঁ ডেপ্যুটেশ্যনত মেঘালয় চৰকাৰৰ আইন সচিব হিচাপে যোগদান কৰিছিল।
তেওঁ শ্বিলং আইন মহাবিদ্যালয়ত অংশকালীন প্ৰৱক্তা হিচাপে কাম কৰাৰ উপৰি ৰাজ্যখনৰ বিভিন্ন নিগমৰ আইনী উপদেষ্টা হিচাপেও সেৱা আগবঢ়াইছিল।
১৯৮৫ চনত ফুকনে গুৱাহাটী উচ্চ ন্যায়ালয়ৰ স্থায়ী ন্যায়াধীশ পদ লাভ কৰে। ১৯৯৪ চনৰ ৩০ ছেপ্টেম্বৰত তেওঁক হিমাচল প্ৰদেশ উচ্চ ন্যায়ালয়লৈ ভাৰপ্ৰাপ্ত মুখ্য ন্যায়াধীশ হিচাপে বদলি কৰা হয়।
১৯৯৬ চনত এছ এন ফুকন উৰিষ্যা উচ্চ ন্যায়ালয়ৰ মুখ্য ন্যায়াধীশ পদত অধিষ্ঠিত হয়। ন্যায়াধীশ ফুকনে ১৯৯৯ চনৰ ২৮ জানুৱাৰীত ভাৰতৰ উচ্চতম ন্যায়ালয়ৰ এগৰাকী ন্যায়াধীশ হিচাপে যোগদান কৰে।
২০০২ চনৰ ১ এপ্ৰিলত ন্যায়াধীশ ফুকনে কৰ্ম জীৱনৰ পৰা অৱসৰ গ্ৰহণ কৰে।
উল্লেখযোগ্য যে ন্যায়াধীশ ফুকনে প্ৰতিৰক্ষা চুক্তিৰ সন্দৰ্ভত গঠন কৰা টেহেলকা আয়োগৰো অধ্যক্ষ আছিল।
ন্যায়াধীশ শৈলেন্দু নাথ ফুকনৰ মৃত্যুত শোক প্ৰকাশ কৰিছে মুখ্যমন্ত্ৰী সৰ্বানন্দ সোণোৱালে। মুখ্যমন্ত্ৰীয়ে লগতে সম্পূৰ্ণ ৰাজ্যিক মৰ্যাদাৰে উচ্চতম ন্যায়ালয়ৰ অৱসৰপ্ৰাপ্ত ন্যায়াধীশ শৈলেন্দু নাথ ফুকনৰ শেষকৃত্য সম্পন্ন কৰিবলৈ মুখ্য সচিবক নিৰ্দেশ দিছে।