বৰমা উচ্চতৰ মাধ্যমিক বিদ্যালয়ৰ এগৰাকী প্ৰাক্তন অধ্যক্ষ আৰু তেওঁৰ ভগ্নীয়ে নিবনুৱা যুৱকক চৰকাৰী চাকৰিৰ প্ৰতিশ্ৰুতি দি প্ৰায় ১৮ কোটি টকা সংগ্ৰহ কৰাৰ অভিযোগ উত্থাপন হৈছে। এই সন্দৰ্ভত মহানগৰীৰ দিছপুৰ থানাত এখন এজাহাৰ দাখিল কৰা হৈছে।
অৱসৰপ্ৰাপ্ত অধ্যক্ষ অনুপমা দেৱীৰ প্ৰাক্তন ছাত্ৰ ধ্ৰুৱজ্যোতি হালৈয়ে এই এজাহাৰ দাখিল কৰিছে। তেওঁ অভিযোগ কৰিছে যে অনুপমা দেৱী, তেওঁৰ ভগ্নী দীপিকা দেৱী আৰু আন তিনিজনে চৰকাৰী চাকৰি দিয়াৰ প্ৰতিশ্ৰুতিৰে বৰমা, পাটাছাৰকুছি, নলবাৰী আৰু দাঁতিকাষৰীয়া অঞ্চলৰ প্ৰায় ৭০-৮০ জন চাকৰি প্ৰত্যাশীৰ পৰা ধন সংগ্ৰহ কৰিছিল।
অভিযোগ অনুসৰি, ২০২৪ চনৰ পৰা প্ৰমোদ বড়ো মুখ্য কাৰ্যবাহী সদস্য হিচাপে কাৰ্যনিৰ্বাহ কৰি থকাৰ সময়ত বড়োলেণ্ড টেৰিটৰিয়েল কাউন্সিল (বিটিচি)ৰ অধীনত বিভিন্ন বিভাগত চাকৰিৰ আশ্বাস দি এই ধন সংগ্ৰহ কৰা হৈছিল।
অভিযোগকাৰীয়ে অভিযোগ কৰিছে যে অনুপমা দেৱীৰ পুত্ৰই বিটিচিৰ প্ৰাক্তন মুৰব্বী প্ৰমোদ বড়োৰ খুলশালীয়েকৰ সৈতে বিবাহপাশত আবদ্ধ হৈছিল। অভিযোগত কোৱা হৈছে যে চাকৰি প্ৰত্যাশীসকলক পতিয়ন নিয়াবলৈ চেষ্টাকৰা হৈছিল যে অভিযুক্তসকলে প্ৰভাৱশালী স্থানত থকা লোকসকলৰ সৈতে যোগাযোগ কৰিব পাৰে।
হালৈয়ে লগতে অভিযোগ কৰিছে যে উক্ত চাকৰি কেলেংকাৰী চক্ৰৰ সৈতে জড়িত বিত্তীয় লেনদেন দিছপুৰ শাখাত থকা তেওঁৰ ভাৰতীয় ষ্টেট বেংক একাউণ্টৰ জৰিয়তে কৰা হৈছিল। তেওঁৰ অভিযোগ অনুসৰি অনুপমা দেৱীয়ে সংগ্ৰহ কৰা বুলি অভিযোগ উত্থাপন কৰা ধন তেওঁৰ একাউণ্টত জমা কৰি পৰৱৰ্তী সময়ত উলিয়াই নিয়া হয়। বিনিময়ত তেওঁ ধনৰ এটা অংশ পোৱা বুলিও জনায়।
চাকৰি প্ৰত্যাশীৰ পৰা বৃহৎ পৰিমাণৰ ধন সংগ্ৰহ কৰিও অভিযুক্তই প্ৰতিশ্ৰুতি দিয়া চাকৰিৰ ব্যৱস্থা কৰাত ব্যৰ্থ হোৱাৰ অভিযোগ উত্থাপন কৰিছে হালৈয়ে। তেওঁ লগতে অভিযোগ কৰে যে পৰিস্থিতি জটিল হৈ পৰাত অনুপমা দেৱীয়ে তেওঁক মৃত্যুৰ বাবে উৎসাহিত কৰিছিল।
এই অভিযোগৰ পাছতে হালৈয়ে পাঁচজন লোকৰ বিৰুদ্ধে এজাহাৰ দাখিল কৰে। তেওঁলোক হৈছে- পুলেন চন্দ্ৰ গোস্বামী, তেওঁৰ পত্নী দিপিকা দেৱী, অনুপমা দেৱী, চক্ৰধৰ বৰ্মন আৰু বনজিৎ ৰায়।
দিছপুৰ আৰক্ষীয়ে ভাৰতীয় ন্যায় সংহিতাৰ (বিএনএছ) ধাৰা ৩১৬(২), ৩১৮(৪), ৩৩৬(৩) আৰু ৬১(২) আৰোপ কৰি গোচৰ নং ০৬১৭ৰ অধীনত ২০ আগষ্টত এটা গোচৰ ৰুজু কৰে।
এই সমস্ত অভিযোগৰ তদন্ত দিছপুৰ থানাৰ উপ-পৰিদৰ্শক দিপাংকৰ চুতীয়াই অব্যাহত ৰাখিছে।
