ডোনাল্ড ট্ৰাম্প ৰাষ্ট্ৰপতি পদৰ বাবে যোগ্য নহয়; জন বল্টনৰ মন্তব্যত আমেৰিকা তোলপাৰ
আমেৰিকাৰ প্ৰাক্তন সুৰক্ষা উপদেষ্টাই কৰা এক মন্তব্যৰ বাবে সমগ্ৰ আমেৰিকা যুক্তৰাষ্ট্ৰতে এতিয়া এক ৰাজনৈতিক জোকাৰণিৰ সৃষ্টি হৈছে।
আনহাতে, ৰাষ্ট্ৰপতি ডোনাল্ড ট্ৰাম্পৰ সন্মুখত দেখা দিছে আন এক সমস্যাই।
সম্প্ৰতি আমেৰিকাত তিনিটা সমস্যাই দেশখনক অস্থিৰ কৰি ৰাখিছে। সেয়া হ’ল কৰ’না ভাইৰাছ, বৰ্ণবাদ আৰু আৰক্ষীৰ বৰ্বৰতা।
কিন্তু শেহতীয়াকৈ দেশখনৰ প্ৰাক্তন ৰাষ্ট্ৰীয় সুৰক্ষা উপদেষ্টাগৰাকীয়ে সৃষ্টি কৰিছে আন এক সমস্যাৰ।
প্ৰাক্তন ৰাষ্ট্ৰীয় সুৰক্ষা উপদেষ্টা জন বল্টনে মন্তব্য কৰিছে যে দেশখনক নেতৃত্ব দিয়াৰ বাবে ৰাষ্ট্ৰপতি ডোনাল্ড ট্ৰাম্প যোগ্য নহয়।
বল্টনৰ এনে মন্তব্যৰ প্ৰতি সমৰ্থন জনাইছে ডেম’ক্ৰেট নেতা নেন্সি পেলোচিয়ে।
আমেৰিকাৰ হাউছ অফ ৰিপ্ৰেজেন্টেটিভৰ অধ্যক্ষ পেলচিয়ে কয় যে এই কথা স্পষ্ট হৈ পৰিছে যে ডোনাল্ড ট্ৰাম্প নৈতিকতাৰ দৃষ্টিৰে তথা বৌদ্ধিকভাৱে আমেৰিকাৰ ৰাষ্ট্ৰপতি হোৱাৰ বা হৈ থকাৰ বাবে যোগ্য নহয়।
প্ৰাক্তন ৰাষ্ট্ৰীয় সুৰক্ষা উপদেষ্টা জন বল্টনে তেওঁৰ গ্ৰন্থত উল্লেখ কৰিছে যে ৰিপাব্লিকান নেতা তথা দেশৰ ৰাষ্ট্ৰপতি ডোনাল্ড ট্ৰাম্পে কেইবাটাও ভুল কাম কৰিছে। ইয়াৰ ভিতৰত এটা হৈছে তেওঁ চীনৰ ৰাষ্ট্ৰপতি সি জিনপিঙৰ পৰা নিৰ্বাচন জয়ী হ’বলৈ লহায় বিচাৰিছে।
উল্লেখযোগ্য যে জন বল্টনে লিখা গ্ৰন্থখন এতিয়াও বজাৰলৈ অহা নাই যদিও ইয়াৰ কিছু অংশ ফাদিল হৈ পৰিছে আৰু ইয়ে দেশখনত ধুমুহাৰ সৃষ্টি কৰিছে।
ইপিনে, ডোনাল্ড ট্ৰাম্পৰ সহযোগী হিচাপে পৰিচিত ৰিপাব্লিকান পাৰ্টিৰ নেতা কেবিন মেক্কাৰ্থীয়ে কয় যে বল্টনে নিজৰ গ্ৰন্থৰ বিক্ৰী বৃদ্ধি কৰাৰ বাবে জানিবুজিয়েই এনে স্পৰ্শকাতৰ মন্তব্য কৰিছে।