সোমবাৰে পুৱা উত্তৰ প্ৰদেশৰ কানপুৰত সংঘটিত পথ দুৰ্ঘটনাত প্ৰাণ হেৰুৱালে এখন ব্যক্তিগত মহাবিদ্যালয়ৰ ৪ গৰাকী ছাত্ৰ-ছাত্ৰীয়ে।
এই দুৰ্ঘটনাটোত এজন ট্ৰাক চালকৰো মৃত্যু হয়।
আৰক্ষী আৰু স্থানীয় সূত্ৰৰ পৰা জানিব পৰা মতে, মহানগৰীৰ সমীপৱৰ্তী ঘাইপথত দুখন দ্ৰুতবেগী ট্ৰাকৰ মাজত হোৱা সংঘৰ্ষত এখন সৰু গাড়ী চেপা খাই সোমাই যোৱাৰ ফলত ছাত্ৰ-ছাত্ৰী কেইগৰাকীৰ মৃত্যু হয়।
কানপুৰৰ ৰুমা-ভাউন্টি উৰণীয়া সেতুত সংঘটিত হৈছে এই ঘটনা।
এজন আৰক্ষী বিষয়াই জনোৱা মতে, ছাত্ৰ-ছাত্ৰীসকল কলেজলৈ গৈ আছিল। তেতিয়াই দুৰ্ঘটনাটো সংঘটিত হয়।
আৰক্ষীয়ে জনোৱা মতে, কম্পিউটাৰ বিজ্ঞানৰ প্ৰথম বৰ্ষৰ ছাত্ৰী আয়ুষী পেটেল, কম্পিউটাৰ বিজ্ঞানৰ দ্বিতীয় বৰ্ষৰ ছাত্ৰী গৰিমা ত্ৰিপাঠী, কম্পিউটাৰ বিজ্ঞান আৰু অভিযান্ত্ৰিক বিজ্ঞানৰ তৃতীয় বৰ্ষৰ ছাত্ৰ সতীশ কুমাৰ আৰু ইলেক্ট্ৰনিকছৰ চতুৰ্থ বৰ্ষৰ ছাত্ৰ প্ৰতীক সিং এই দুৰ্ঘটনাত মৃত্যু হয়।
মৃত চালকজনৰ নাম বিজয় সাহু।
প্ৰাণবীৰ সিং ইনষ্টিটিউট অৱ টেকন’লজি কলেজ অভিমুখে গৈ থকা এখন অচিনাকি বাহনত উঠিছিল ছাত্ৰ-ছাত্ৰীসকল।
সংবাদ মাধ্যমত প্ৰকাশ পোৱা অনুসৰি তেওঁলোকৰ গাড়ীৰ সন্মুখত থকা ডাম্পাৰ এখনে হঠাৎ ব্ৰেক মাৰে। আকস্মিকভাবে ডাম্পাৰখনে ব্ৰেক মৰাৰ বাবে পিছফালে থকা সৰু গাড়ীখন ৰ’ব নোৱাৰি ডাম্পাৰখনৰ পিছফালে খুন্দা মাৰে। এনেতে আন এখন তীব্ৰবেগী ট্ৰাকে পিছফালৰ পৰা ছাত্ৰ-ছাত্ৰীসকলৰ গাড়ীখনত খুন্দা মাৰে। ফলত সৰু গাড়ীখন দুখন ডাঙৰ গাড়ীৰ মাজত সম্পূৰ্ণৰূপে বিধ্বস্ত হৈ পৰে।
দুৰ্ঘটনা সংঘটিত হোৱাৰ পিছতে দুয়োজন ট্ৰাক চালকে পলায়ন কৰে। আৰক্ষীয়ে দুইখন ট্ৰাক জব্দ কৰে ।
ইতিমধ্যে মৃতদেহ কেইটা মৰণোত্তৰ পৰীক্ষাৰ বাবে প্ৰেৰণ কৰা হৈছে আৰু ঘটনাৰ তদন্ত অব্যাহত আছে।
